رواية اغفر لي ( الفصل الثالث 3 ) كاملة بقلم أوتار حزينة

اغفر لي
بقلم أوتار حزينة
هل كنت أحلم
وهل ما عشته معك
كان وهما جميلا
أم سرابا خداعا
مر بي كنسمة ثم اختفى
همست لي بالحب 
ثم سكت
تركتني في منتصف الطريق
أجمع ما تبقى من الحنين
وألملم شتاتي كل مساء.
أكنت صادقا
أم كنت تمثل دور العاشق
وترحل قبل أن يسدل الستار
قائد
رجعت سنين ليوره لذيج الايام الجنت عايشها
وي اهلي قبل لا اعرف الحب وينكسر
گلبي من وراه
شفت روحي راجع من الشغل امشي بشارعنا
والهموم تارس عقلي وگلبي وشي
واحد مصيطر على تفكيري
وهو الهجرة لمحت اخويه كاعد هو وشباب
المنطقه سلمت
شلونكم شباب
هلا قائد تعال اكعد ويانا اشربلك جكاره
تسلم مااريد 
احمد كام فتحلي الباب دخلت الماطور رحت للمطبخ جان ماكو احد بي شربت مي من البراد اني واكف سمعت صوت امي
هاي شوكت اجيت
هسه
جاوبت مختصر
اليوم تعرف منو جان يمنا
مارديت كملت مبتسمه
مرة خالك جاسم وسرى
اي وشتريدين اسوي افرح مثلا
جاوبتني بعصبيه
يول تالي وياك يعني شنو راح تظل بهل الراس اليابس وتعاندنا اني وابوك
قربت ليمي كملت
كلي انت راح تلكي احسن من بنت خالك شوفها حسن وجمال وام بيت
جاوبت باستهزاء
اووه حجيه اشوفج شكثر عندي
معجبات ووحدتهن گمر واحلى
من بنت اخوج النادرة
مشيت من يمها لحكتني تردد
قائد لاتعاند تره اني غير بنت اخويه ماراح
اخذلك
وكفت يم الدرج وجاوبت بروده
يمه من الاخير حتى يرتاح گلبج وتعوفيني بحالي اكلج اني ماراح ازوج لا هي ولا غيرها هذا
اشرت لراسي وكملت
هذا قافل على العزوبيه واعيد للمره المليون اني ماراح اظل هنا اهاجر اهاجر اذا مو هالسنة
سنة اللخ
صعدت الدرج سهام جانت نازله وكفت بنصه
وظلت ادحك عليه حجيت بضوجه
ماتنزلين شكو وكفتي مثل الصنم
ووولك لااتحجي وياها هيج
دحكت لامي من صاحت بيه جاوبت
مستهزء
عيني ست الحسن ملكه سبأ ممكن تنزلين حتى
اصعد واروح لغرفتي

وانخمد
مقداد اجه من فوك وسمع الكلام بس حجه
بهدؤ
يووولي شعندج واكفه ماتنزلين
سمعت اخوك شلون يحجي وياي
خزرها ورد
لا ماسمعت وطولتيها كلش لو تصعدين لو تنزلين
تعالي يمه وعوفيهم واحدهم صاير بارود
ومايتحمل حجايه
امي حجت واشرت الها نزلت وهي كالبه الخلقه
صعدت لفوك وكفت يم مقداد وكتله
اسف ماجان اقصدي احجي وياها هيج بس
والله امك اطلع الواحد من طوره بعد ماطبيت بدت
تلحن على سرى
اخويه سكت بعدين كال
لاتغلط غلطتي وتسمع كلامها
صفنت علي من حجه هيج كمل من راح لغرفته
روح ارتاح
مشيت لغرفتي اني واحمد
اخذت هدوم سبحت بالحمام الفوك طلعت انشف
شعري وكفت بالصاله من سمعت صوته
هو مرته عرفتها تعاركت ويا من ورايه امي صعدت
من شافتني صاحت بيه
هاي الردتها ياوجه البومه
شوف علكت بين اخوك ومرته
وكله من وراك بعد ماطبيت علكتها بينهم
ااستغفر الله ياربي شااحجي وياج جبتي
البلوه وخليتها براسه وهي لا خلقه ولا اخلاق
اخويه وين وبنت اخوج وين تراب هي
وهو الماس
اانجب ولك تاج راسك بنت اخويه
جاوبتني وطبت تعلعل بصوتها على مقداد
رحت لغرفتي شمرت الخاولي
على الحايط وكلت بعصبيه
ولك بس اريد اافتهم مو جنت مااارايدها ورافضها شجاك وگلبت
احمد طب وسال
هاي شكو عبالك هم علكت بين بين اخوك ومرته
اي وامك يمهم وكالعاده راح ترزله اله وتعوف بنت اخوها واخلاقها السسز
هز راسه باي كملت بضوجه
سد الباب تره جاي تعبان ومالي خلك لهل لعبان
نفس
سد الباب واجه كعد على جربايته كال
ادري هذا خالك وبناته مسوين سحر لامك مااتريد غير رضاهن هن وابوهن لو على حسابنا
تمددت بفراشي وجاوبته
ياربي شوكت اخلص من هالبيت ومشاكله
اكلك انت بعدها سالفه الهجرة براسك
هزيت راسي اجه ليمي كعد وكمل
يمعود شيل هالسالفه من راسك وشوفلك
عقد باي مكان وتوظف
يول ماتسكت على اساس الوظيفه هيانها بالباب ادكلي تعال توظف ماشفتني حفيت واني
اريد بس واحد گواد يوظفني وكلها
جذابه تريد كومه دفاتر
يله توظفني وبعقد لو
يثبت لو لاا
احمد سكت كملت
خليني بقهري وكوم طفي الضوه حتى
انخمد
ماتتعشه
تعشيت خوش عشه من امك وتزهورت سم
افتهم عليه وكام لحيله طفى الضوه وطلع
من يمي سد الباب غمضت عيوني
وخليت ايدي عليهن ذبيت
حسره وكلت
والله مااظل هنا اهج اهج واروح لغير مكان
لان اذا اظل هنا معناها موت بطيء اليه
اني قائد عامر عمري 25 سنه متخرج كليه هندسه ميكانيك ومثل كل واحد تخرج بالعراق اخذنا
الشهاده وخلينها برواز معلك بالحايط
تاخذنا الصفنه علي ونسأل روحنا وين تعب هالسنين الي درسنها واخذت 
من عمرنا عمر غير نحصل نتيجه هالتعب بوظيفه
تسد حاجتنا ونكدر نبني مستقبلنا بيها
هالشي ماصار رغم شكد حاولت وي ناس واصله
تنطي وعود وكله كذب وناس طلبت شدات حتى توظفني واني ماعندي هالشي
الجنت اشتغله بوكت الدراسه اصرفه على روحي
لان ابويه ماجان يساعدني ولا جان
يحب الدراسه واصلا جان
يستهزء بينا اني ومقداد من يشوفنا ندرس
وكاتلين روحنا على المعدل
عشنا بمشاكل ويا لا هو فهم شنو نريده ولا امي
شجعتنا ولا فهمت احنا نختلف عنهم وعن طريقه
تفكيرهم
هم بعالم واحنا بعالم ثاني بس رغم حربهم ويانا
مقداد كدر يكمل بتعبه وصار مدرس وتعين قبل سنتين بس اكبر خطأ سواه بحياته هو استسلامه لامي وابويه وبعد الحاح منهم وضغط اخذ 
بنت خالي وهي اصلا ماتلوك اله وهالشي 
كمت اشوفه واشوف شلون كام
يدفع ثمن موافقته عليها
بعد مااايأست من الوظيفه بديت اشتغل بالصناعه
بس مااظليت هناك لان جنت مااتحمل حجايه
من احد وااكثر من مشكله صارت
اليه
بطلت مناك واشتغلت بمحل ملابس وهم ماطولت
لان مو جوي ولا كدرت اتحمل الي يسأل
جثير
اخر شي اشتغلت عامل بمصطر وظليت هيج
لان اليومي زينه صح تعب وكسران ظهر
بس اكدر اجمع منها جم فلس
حتى اهج من العراق
ولد صديقي من ايام الكليه اسمه حسين
خله براسي فكره الهجره كلي سنه زمان ارتب
وضعي ونطلع اني وياك بالقارب على اليونان مناك
عمي يسهل النا امر ويسحبنا لالمانيا
خليت هالفكره براسي واشتغلت عليها وهم جنت
مااكدر اضم غير القليل من ورة
ابويه الي جان يريد مصرف
للبيت بالاضافه لاسبوعيه
امي واذا ماانطي معناها احترك البيت
على راسي
هاي حياتي باختصار شاب ماشاف من الدنيا بس
التعب حتى ايام الكليه ماافتهمت منها شي
لان گضيتها ركض بركض اني بالمحاضره
افكر لازم اطلع بهيج ساعه
حتى الحك على الشغل
ارجع للبيت تعبان وطايح حتى حظي اشوف
الوجه مگلوبه واسمع من ابويه وامي
العيشه صعبه والمصرف صاير هوايه حسو
بينا منين انجيب الكم نبوك نمد ايدينا للعالم
وجثير كلام يسم البدن جنت انطي من راتبي النص
واخلي النص اليه وهم مايكفيني
لا لبست مثل غيري ولا طلعت لمطاعم مثل باقي الشباب وظليت السنه كلها هيج اشتغل
حتى اكفي روحي وانطي لاهلي
وياريت راضين
بس وي الوكت من شفت ظلمهم النا وتعاملهم ويانا
گلبي قسى وكمت ماادير بال لكلامهم وارد الكلمه
بعشره وحلفت امشي الي براسي والي
هو الهجره
حسيت من راح اطلع من العراق راح الدنيا
تضحك اليه وحالي يتغير للاحسن
اي مكان هو احسن من
العيشه العايشها ماجنت احس اني عندي اهل اسند عليهم جنت اشوفهم اعداء اليه
جنت أگول اني رجال وأتحمل
بس بيني وبين روحي جنت محطم
ما أحد حاس بيه
أبتسم وهمي للركب
أطلع وأضحك وأرجع أموت
كلشي ما بيه حقيقي
حتى اسمي كرهته لان هم سموني بي
البيت مو بيت سجن بارد
أبوي چنه جلاد مو سند
وأمي بس همها اخوها مو احنا
صرت أحچي ويا روحي أفضفض لنفسي
قائد سافر ولك راح تموت هنا وانت ماشايف من
الدنيا شي ما بقى بيه شي غير حلم أفلت
أحجز تذكرة أركب أول طيارة
وأهج منهم
أريد مكان بعيد كلش
يخليني أتنفس براحتي
أصيح أضحك أحچي وما أنداس
أريد أكون اني... مو نسخة هم صنعوها بايدهم
النوم اجاني ورحمني من هالافكار السوده 
صبحت نهار جمعه جنت اتريك وي اهلي كالعاده الوجوه مگلوبه والنفسيه