رواية الغريبة الفصل التاسع عشر 19 إلى الفصل الثامن والعشرون 28 كاملة وحصري على لمحة نيوز
الفصل التاسع عشر
وصلا نهله و حازم إلى تركيا بعد رحلة طيران صامته الا من بعض الكلمات البسيطه.
حازم حمدا لله على السلامه.
نهله الله يسلمك.
حازم دلوقتى هنروح الفندق لأن الوقت مش هيسمح انى افسحك و اوريكى البلد.
نهله احنا اصلا مش جايين نتفسح.
حازم ايوا بس طالما جينا اكيد هنلف شويه فى اسطنبول.
ركبا سياره من المطار إلى الفندق الذى حجز فيه حازم لهما.. صعدا إلى الدور الذى به غرفهم.
حازم دى أوضتك و انا أوضتى اللى جنبها دى.. و لو عايزه اى حاجه كلمينى فى التليفون هجيلك على طول.
نهله اوكى.
حازم بعد ساعه هننزل عشان العشاء.
نهله عشان حضرتك قررت انى هجوع بعد ساعه.
حازم بإبتسامه مستفزه لا لأن دى مواعيد العشاء هنا فى الاوتيل.
فتح كلا منهما غرفته و دخلها.. اعجبت نهله بغرفتها فقد كانت جميله و تطل على البحر فأستمتعت بالمنظر كثيرا.. ارتاحت قليلا ثم بدلت ثيابها و مر عليها حازم لينزلا لتناول العشاء و دار بينهما حوارا قصيرا.
حازم بكره الاجتماع هيبقى الساعه 10 الصبح ان شاء الله.
نهله اوكى هبقى جاهزه من 9.
حازم تمام... تقلى فى لبسك و انتى خارجه عشان الجو هنا برد.
نهله و اعمل ايه تانى
حازم انا بنصحك لمصلحتك.
نهله شكرا.
حازم هو انتى ليه طريقتك كدا... لما حد بيعمل معاكى حاجه كويسه المفروض تتعاملى معاه كويس.
نهله متعودتش ان حد يعمل واصى عليا.
حازم انا بحاول اساعدك.
نهله لو المساعده دى معناها انى الاقيك بتتدخل فى كل شئونى مش عاوزاك تساعدنى... انا من صغرى و انا متحمله مسئولية نفسى و بعرف اخد قراراتى و افكر كويس مش محتاجه حد لا يفكرلى و لا يقررلى.
حازم انا اسف لو شوفتى دا تدخل بس انا كل اللى قاصده عشان اساعدك.
نهله عاوز تساعدنى اتعامل معايا على انى زيي زيك لانك بكدا هتريحنى و سيبنى انا اتصرف فى حياتى براحتى.. و متخدش اى قرار يخصنى من غير ما تسألنى الأول.
حازم أى أوامر تانيه.
نهله لا شكرا... انا عاوزه اطلع انام عشان اعرف اصحى بكره بدرى.
حازم اطلعى.
نهله و انت مش طالع.
حازم لا.
نهله رايح فى حته.
حازم هسهر الواحد مبيجيش اسطنبول كتير و ليله زى دى مينفعش اضيعها.
شعرت نهله بالغيظ من كلام حازم و ارادت بشده ان تعرف اين سيسهر و مع من.. هل له اصدقاء فى تركيا هل ستكون هناك بنات فى هذه السهره اسئلة كثيره شغلت بالها و هى وحيدة بغرفتها حتى استسلمت اخيرا للنوم.
غضب حازم كثيرا من طريقة نهله معه فهو لم يقصد ان يفرض سيطرته عليها و لكن هذه هى طريقته فى الاهتمام بمن يخصه من اشخاص.
تمشى حازم قليلا بالقرب من الفندق ثم عاد لينام تعمد الا يخبر نهله بعودته لتعتقد انه سهر لمدة طويله.
استيقظت نهله و جهزت نفسها للاجتماع و بدأت تراجع بعض الاوراق.. تأخر حازم خمس دقائق عن ميعاده متعمدا ذلك فاتصلت به نهله.
نهله ايوا يا حازم... اتأخرت ليه عاوزين نلحق الاجتماع.
حازم طيب قولى صباح الخير الاول.
نهله صباح الخير... ايه اللى اخرك.
حازم سهرت جامد امبارح فراحت عليا نومه.
احست نهله بغيظ من رده فما الذى يجعله يتأخر فى السهر فى بلد اخرى و هو لا يفعل ذلك فى بلده.
نهله طيب قدامك اد ايه و تخلص.
حازم هلبس بسرعه و عشر دقايق و اعدى عليكى.
انتظرته نهله و هى تتسائل يا ترى ما الذى جعله يتأخر كل ذلك.. بعد قليل مر عليها.
حازم انا مش قولتلك تتقلى شويه فى لبسك.. الجو برد هنا و اللى انتى لابساه دا هيبردك.
نهله لا مش برد و لا حاجه و انا لابسه كويس و بطل تفرض رأيك عليا.. و بعدين قول صباح الخير الاول.
حازم عادى ما احنا قولنا صباح الخير فى التليفون.
نهله طيب يالا نمشى عشان منتاخرش.
حازم يالا.
ذهبا معا إلى الاجتماع الذى مر بنجاح كبير مما جعلهما يخرجا سعيدين منه.
حازم الحمد لله كل حاجه مشيت زى ما احنا عاوزين و احسن.
نهله اه الحمد لله.
حازم يالا بقى هخدك نتغدى فى مطعم بيطل على منظر حلو اوى هيعجبك.
ذهبا إلى المطعم و جلسا يتناولا الطعام.
حازم بعد ما نتغدى هخدك الففك فى البلد شويه.
نهله انا فعلا عاوزه اتعرف على البلد اكتر و عاوزه اصور صور كتير اوريها لفارس اكيد هيتبسط بيها.
حازم اه فارس زى الاطفال بيتبسط بأى حاجه.
نهله على فكره بقى فارس مخه كبير و ليه افكار حلوه اوى و يمكن مخه اكبر من ناس كتير.
فهم ما ترمى اليه و لكنه استمر فى الكلام و كأنه لم يفهم انها تحاول ان تضايقه بالكلام.
حازم يمكن فعلا بس فارس رغم انه مش اصغر منى بكتير لكن من صغرنا و انا اللى مربيه و بحس انى مسئول عنه فدايما بحس انه طفل و على فكره انا لما بنتقده عمرى مببقى قصدى اقلل منه بالعكس انا حابب كل حاجه فيه و هو اهم حاجه عندى فى الدنيا بس ببقى بغلس عليه و هو فاهمنى عشان كدا عمره ما بيزعل منى.
نهله هو كمان بيحبك اوى.
ابتسم حازم قائلا عارف.
نهله هو انت ليك اصحاب هنا فى تركيا
حازم لا... بتسألى ليه
نهله يعنى عشان بتقول اتاخرت
امبارح فقولت اكيد كنت مع اصحابك.
حازم لا بس ليا شوية معارف.
نهله طيب مش يالا بقى نقوم نتمشى و أصور شويه.
حازم يالا.
استمتعت نهله كثيرا بالجوله و لكنها و مع مرور ساعات النهار بدأت تشعر ببرد شديد و لكن كبريائها منعها من الاعتراف بذلك و اكملت جولتها مع حازم رغم ذلك.
عندما حل الليل عادا إلى الفندق على ان يرتاحا قليلا ثم ينزلا لتناول العشاء.
دخلت نهله غرفتها و اخذت حماما دافئا و فجأه شعرت بدوار و ان جسدها
بعد قليل اتصل بها حازم.
حازم الو نهله... جاهزه اعدى عليكى عشان ننزل نتعشى.
نهله بصوت واهن لا انزل انت انا مش هقدر انزل.
حازم بقلق ليه... مالك
نهله مفيش حاجه... انزل انت.
حازم نهله متكابريش صوتك تعبان فهمينى مالك
نهله مفيش بس حاسه انى مرهقه شويه.
حازم طيب انا جايلك دلوقتى... باى.
نهله باى.
ما ان اغلق الخط حتى ذهب و طرق باب غرفة نهله التى قامت بصعوبه من فراشها لتفتح له الباب.. كان التعب باد على وجهها و عيونها تفتحها بصعوبه.
حازم انتى شكلك تعبان اوى... ما انا كنت لسه سايبك كويسه من شويه ايه اللى حصلك
نهله مش عارفه... انا بس تلاقينى محتاجه ارتاح هنام شويه و هبقى كويسه.
ما ان انهت كلامها حتى عطست بقوه و شعرت بدوار فأستندت على الحائط المجاور.
حازم مالك
نهله مفيش دايخه بس شويه.
حازم طيب تعالى ارتاحى فى السرير.
أمسك يدها ليساعدها لتذهب لفراشها فشعر ان يدها ساخنة.
حازم نهله انتى شكلك سخنه.
وضع يده على جبينها فوجده مرتفع الحراره بشكل كبير.. ساعدها لتنام بسريرها.
حازم انتى سخنه اوى... انا هجيبلك دكتور.
نهله لا انا هنام و هبقى كويسه.
حازم لا لازم اجيب دكتور.
نهله حازم ريحنى مره واحده و اعمل اللى انا عاوزاه مش اللى انت شايفه.
حازم ما هو انتى اللى تعبك انك عندتى معايا و متقلتيش و احنا خارجين و اصريتى انك تنفذى اللى فى دماغك.
نهله خلاص بطل خناق و انا هنام و ارتاح.
حازم طيب نامى.
نهله هنام بس روح انت اتعشى.
حازم لا انا هفضل قاعد لما تنامى.
نهله ليه
حازم عشان اطمن عليكى و لو عاوزه تخلصى منى نامى على طول عشان اسيبك و امشى.
لم تكن تريد ان يتركها و كانت سعيده بوجوده إلى جانبها و لكنها رغما عنها استسلمت للنوم.. بعد قليل سمعها حازم تتكلم فى نومها بكلام لم يفهم منه شيئا و لكن من الواضح انها تهذى.. وضع يده على جبينها فوجد ان حرارتها ارتفت.. شعر بخوف شديد عليها و قرر ان يتصل بإدارة الفندق لتبعث له بطبيب.
حاول ايقاظها ليعلمها ان الطبيب سيحضر ليعاينها.
حازم و هو يربت على كتفها برقه نهله... نهله.
فتحت عيونها بصعوبه قائله نعم.
حازم حرارتك عليت و شكلك كل شويه بتتعبى اكتر و انا كلمت ادارة الفندق هيبعتوا الدكتور دلوقتى فحاولى تصحى عشان يعرف يكشف عليكى.
كانت مريضه لدرجه لم تجعلها قادرة على العناد فأعتدلت فى جلستها و ساعدها حازم و بعد قليل حضر الطبيب.. تركهما حازم معا و خرج ينتظر بالخارج حتى انتهى الطبيب من معاينتها و خرج له و اخبره انها على وشك الاصابه بالاتهاب فى الشعب الهوائيه و انه كتب لها ادوية ستساعدها على المقاومه و التحسن و خافضات للحراره لأن لابد
ان تنخفض الحراره سريعا لأن حرارتها تعدت ال 41 سأله حازم اذا كانت كمادات المياه البارده من الممكن ان تساعد فى خفض حرارتها و شجع الطبيب الفكره و قال ان ذلك سيساعد كثيرا.. غادر الطبيب و اوصى ادارة الفندق ان ترسل لغرفة نهله الأدويه.
اعطاها الأدويه و نامت فأحضر تيشرت من خزانته و ملأ طبق بالماء البارد و اقترب منها و جلس يعمل لها كمادات و يقيس لها الحراره لساعتين متواصلتين حتى بدأت الحراره تنخفض بالتدريج.. ارتاح قليلا ثم عاد يكرر نفس الموضوع.. كان حازم طوال الليل يلوم نفسه و يرى انه هو السبب فى تعبها لانه لم يجبرها على ارتداء ملابس ثقيله و تركها لعندها.. اخذ ينظر لها و يشعر بأن قلبه يتمزق من حزنه لمرضها.. سهر بجانبها و لم ينم دقيقة واحدة حتى طلع الصباح.. بدأت نهله تفتح عيونها بثقل.
حازم ها عامله ايه دلوقتى
نهله انت هنا من امبارح
حازم ايوا.
نهله ليه مرحتش أوضتك و نمت فين
حازم منمتش مكنش ينفع اسيبك
نهله ليه
حازم قوليلى بس عامله ايه دلوقتى
نهله الحمد لله احسن.
حازم طيب خلينى اقيسلك الحراره.
وجد الحراره 38 مرتفعه نسبيا و لكن افضل بكثير من الليله الماضيه.
حازم الحمد لله نزلت كتير عن امبارح بس لازم تاخدى الدواء دلوقتى.
لاحظت نهله تيشرت حازم الموضوع فى طبق به ماء.
نهله ايه دا
حازم كنت بعملك كمادات.
نهله بدهشه كنت سهران جنبى بتعملى كمادات.
حازم و فيها ايه يعنى.
ابتسمت له نهله بإمتنان.
نهله طيب ليه تبوظ التيشرت بتاعك كدا
حازم تيشيرت ايه اللى بتفكرى فيه دلوقتى.. انتى رعبتينى امبارح.
نهله خوفت عليا
حازم طبعا.
نهله ليه
حازم يييييييي يادى ليه انتى عليكى عفريت اسمه ليه
ضحكت نهله.
حازم انا هتصل الغى حجز الطياره بتاع النهارده و اخليه بكره عشان متسافريش و انتى تعبانه.
نهله لا بلاش انا لما ارجع هرتاح و بعدين انا دلوقتى احسن و هقدر اسافر.
حازم ليه العند
نهله مش عند ولا حاجه بس هنا هقعد فى الأوضه و هزهق و انا بقيت احسن... عشان خاطرى.
حازم حاضر... هعملك اللى يريحك.
جهزا نفسيهما و خلال ساعه كانا فى المطار ليلحقا برحلتهما.
خلال سفر حازم و نهله كان فارس يبحث عن اماكن جديده لمشروعه هو و نهله و كانت ندى تتحدث بأستمرار كعادتها مع ادهم أما نغم فكانت تهتم بعملها و متابعة كل خطوط الموضه.
عادا حازم و نهله إلى الفيلا و استقبلهما الجميع بالترحاب و سألوا عن حالة نهله.
حازم ندوش... نهله دلوقتى مسئوليتك خلى بالك منها عشان انا فى مشوار مهم لازم اروحه.
ندى مشوار ايه بليل كدا و انت لسه راجع من السفر.
حازم شغل ضرورى.
فارس ايه يا كبير انت مصدقت تسيب البنت و تخلع و لا ايه.
نهله بغيظ سيبه يا فارس هو تعب معايا جامد و ضيعت عليه الرحله.
حازم عن اذنكم.
تركهم و غادر الفيلا.
فارس فظيع اخويا دا... كلنا حاولنا نستفزه و هو و لا كانه سمع كل العك اللى قولناه و بمنتهى الهدوء رد بكلمتين مختصرتين عن اذنكم خير الكلام ما قل و دل.
ضحك الجميع على تعليق فارس ثم اخذت ندى نهله و صعدت معها إلى غرفتها لتساعدها كى ترتاح.
الفصل العشرون
اخذت ندى تساعد نهله فى تبديل ملابسها و الراحه فى السرير و بعد قليل دخلا فارس و نغم إلى الغرفه للإطمئنان على نهله.
نغم انتى تعبتى كدا ازاى
نهله الجو هناك برد اوى و انا مكنتش عامله حسابى و خففت جامد.
ندى طيب و ازاى حازم مينبهكيش لحاجه زى دى.
نهله بصراحه قالى بس انتى عارفه اسلوبه و الاوامر اللى بيديها بتنرفزنى فعندت معاه.
نغم انتى ليه دايما مخك كدا مش المشكله الناس تقولك النصيحه ازاى المهم طالما ان الحاجه فى مصلحتك تعمليها.. انتوا كلكم عاطفيين بزياده و كل اللى بيهمكم الطريقه لكن مبتبصوش للهدف عشان كدا مش عمليين.
فارس و انتى بصراحه ذوق زياده عن اللزوم يعنى على الاقل قوليلها سلامتك دلوقتى و بعدين سمعينا أرائك البناءه.
نهله خلاص يا فارس انا فاهمه نغم.. و يمكن هى عندها حق بس المشكله ان دى طبيعة الانسان هى لو كانت اتربت هنا كانت هتبقى زينا و احنا لو اتربينا بره كنا هنبقى عمليين زيها.
فارس الحمد لله انى اتربيت هنا عشان مبقاش مدب.
نظرت له نغم بغيظ.
ندى طيب اكيد روحتى لدكتور احكيلنا قالك ايه.
نهله اه حازم جابلى دكتور و تقريبا قاله انى داخله على نزله شعبيه او حاجه كدا انا بصراحه مكنتش فايقه لأن حرارتى كانت عاليه اوى
لدرجة ان حازم سهر جنبى طول الليل يعملى كمادات.
نغم ايه الكمادات دى
فارس نهله راعى ان معانا خواجات.. الكمادات دى بتجيبى قماشه... عارفه القماشه
نغم اه عارفاها و بلاش خفة دم انا بس مش فاهمه الكلمه اللى هى قالتها.
نهله تنظر لفارس بعتاب بنحط قماشه مبلوله بميه فاتره او بارده على الجسم السخن عشان تسحب حرارته و كل شويه بنحطها فى ميه جديده عشان متبقاش سخنه.
نغم اهاااا... طيب و حازم عملك كدا بنفسه
نهله اه.
نغم يبقى اللى بفكر فيه صح.
ندى و ايه بقى اللى بتفكرى فيه
نغم اكيد حازم بيحب نهله.
ندى نغم انتى دايما حاشره نفسك فى كل حاجه كدا
نغم فيها ايه انا مقولتش حاجه غلط او عيب.
نهله نغم مفيش حاجه من اللى فى دماغك دى و خلينا نتكلم فى حاجه تانيه.
فارس لا لا تانيه و لا تالته دى اول مره تقول حاجه صح... حازم اخويا يقعد يعمل كمادات طول الليل.. و الله و لاقيتلك حاجه يا حزوم اشتغلك بيها.
ندى طيب ياللا انتوا الاتنين اتفضلوا قدامى عشان نسيب البنت ترتاح شويه.
خرجا نغم و فارس و اقتربت ندى من نهله و قبلتها من جبهتها و همست لها قائلة انا قولت اخلصك منهم بس بصراحه هما معاهم حق.. تصبحى على خير.
و ابتسمت لها و تركتها لحيرتها و خرجت.. تساءلت نهله مع نفسها ايعقل ان يكون هذا الكلام حقيقيا فحازم غير واضح احيانا تشعر بإهتمامه و غيرته و احيانا تشعر انها لا تعنى له شيئا على الاطلاق.
غفت نهله من التعب و التفكير لتستيقظ فى الصباح على لمسات حانيه لشخص يحاول ايقاظها.. حاولت نهله ان تفتح عيونها بصعوبه من التعب لتجد والدتها امامها توقظها ظنت فى البدايه انها تحلم و لكن تأكدت عندما ارتمت فى حضن والدتها.
الأم يا قلبى الف سلامه عليكى يا حبيبتى.
نهله الله يسلمك يا ماما... وحشانى انتى جيتى امتى و ازاى.
الأم انتى كمان وحشانى يا نور عيون ماما... حازم جه خدنى من البيت و وصلنا قرب الفجر.
نهله حازم
الأم اه ربنا يكرمه جه و قالى انك تعبانه و اكيد محتاجه انى ابقى جنبك و استنانى جهزت نفسى و رجعنا على طول... قال اكيد لما تصحى و تشوفينى هتتبسطى.
حضنتها نهله بقوه و هى تشعر بسعاده كبيره.
الأم ياللا يا حبيبتى قومى خدى دش و غيرى هدومك عشان تفوقى شويه.
نهله ايوا انا عاوزه انزل اشوف الجنينه اخبارها ايه لأنى سايباها للجناينى بقالى كام يوم و معرفش عنها حاجه.
الأم لا جنينة ايه... مفيش جنينه الا لما تخفى خالص انا بس عاوزاكى تنزلى تقعدى مع اخواتك تحت عشان تفوقى شويه.
نهله اخواتى
الأم طبعا يا حبيبتى اخواتك هما بيحبوكى اوى كلهم... انا شوفتهم من شويه كلهم طيبين و يجننوا.
نهله ايه دا معقوله صحيوا بدرى كدا.
الأم بدرى ايه يا حبيبتى احنا بقينا الظهر.
قفزت نهله من السرير.
نهله الظهر... و ليه سايبنى انام كل دا
الأم جسمك كان محتاج راحه يا حبيبتى... ياللا بس سيبك من الكلام دا و قومى اعملى زى ما قولتلك على ما اطلب من حد يحضرلك فطار عشان كلنا فطرنا خلاص.
نهله يعنى كمان هفطر لوحدى.
الأم خلاص يا نهله بطلى دلع يا حبيبتى و لما تنزلى هنبقى نقعد معاكى.
قبلت نهله امها و ذهبت لتأخذ حماما دافئا حتى تفيق.. كانت تشعر بسعاده كبيرة لحضور والدتها و اهتمام حازم بإحضارها مما جعل وجهها مشرقا رغم مرضها.. ارتدت فستان رقيق و مشطت شعرها و تركته يتهادى برقه على ظهرها و نزلت للأسفل.
كانت نغم تجلس مع والدتها تتحدثان عندما اقتربت نهله.
نغم اخبارك ايه النهارده
نهله الحمد لله احسن.
نغم طبعا اتبسطتى عشان شوفتى طنط.
نهله مبتسمه اوى.
الأم ياللا يا حبيبتى روحى افطرى.
نهله مش هقعد افطر لوحدى.
الأم خلاص هنقعد معاكى.
شعرت نغم بالإحراج لوجودها وسط الأم و ابنتها.
نغم طيب انا هقوم دلوقتى و اسيبكم تقعدوا مع بعض براحتكم.
الأم لا طبعا خليكى قاعده معانا هو احنا يعنى هنقول اسرار.
نهله تعالى اقعدى معانا انا بحب افطر و حواليا ناس كتير.
ذهبت معهما و جلست نهله تتناول الفطور و الأم تتحدث.
الأم سيبت خالتك و ادهم لوحدهم و طبعا هو هيتجنن عشان عاوز ييجى القاهره هنا انتى عارفه انه بعد اسبوع هيبدأ الشغل فى الشركه زى ما حازم اتفق معاه.
نغم ادهم اللى جه هنا فى عيد ميلاد ندى مش كدا
نهله اه هو... طيب و مستعجل على ايه يا ماما ما لسه اسبوع.
الأم انتى عارفه انه من زمان نفسه ييجى هنا بس انا اتفقت معاه انه يستنانى
لما ارجع عشان خالتك متبقاش لوحدها.
نغم خليكى قاعده كام يوم لحد ما نهله ترتاح.
الأم مبتسمه انا متعوده على بيتى يا حبيبتى و بعدين عشان انتوا كمان تبتدوا تشوفوا شغلكم و متتعطلوش.
نهله و ايه اللى هيعطلنا بس يا ماما... ربنا يخليكى متضايقينيش بقى انا فرحانه انك جيتى هتكلمينى فى انك تروحى.
الأم خلاص بلاش كلام دلوقتى و كملى فطارك.
انهت نهله فطورها و جلست تتحدث معهما قليلا ثم قالت هو فين حازم... عاوزه اشكره.
نغم فى مكتبه... مش قولتلك.
فهمت نهله انها تقصد كلامها بالأمس فنظرت لها بقوه ثم نظرت لوالدتها لتنبهها ان تصمت فهمت نغم و سكتت.
تركت نهله باب غرفة مكتبه فأذن لها بالدخول.
نهله صباح الخير.
حازم مبتسما صباح النور... شكلك احسن النهارده.
نهله الحمد لله احسن كتير... و خصوصا بعد المفاجأه اللى انت عملتهالى.
حازم كنت عارف انك محتاجاها جنبك.
نهله اوى.
حازم يعنى مبسوطه
ابتسمت له و هزت رأسها.
حازم طيب واقفه ليه... اقعدى عاوز اتكلم معاكى.
جلست نهله بالكرسى المقابل للمكتب فوقف حازم و اخذها من يدها ليجلسا على كنبه موجوده بالمكتب.. كانت نهله مندهشة كثيرا من تصرفه هذا.
حازم عاوز اكلمك فى حاجه مهمه.
نهله بإستغراب خير.
حازم فاكره الكلام اللى اتكلمناه و احنا راجعين من المنصوره
نهله عن احمد
حازم اه.
نهله فاكره بس ايه لازمة الكلام فى الموضوع دا دلوقتى.
حازم ليه لازمه طبعا... انتى قولتيلى انك مش لاقيه سبب مقنع انك تسيبيه بس انا عندى.
نهله و ايه هو بقى
حازم انى بحبك.
صدمت نهله من اعترافه و كانت الصدمه واضحه عليها.. صمتا لثواني.
حازم ساكته ليه... يا ترى دا سبب مقنع بالنسبه لك و لا لا.
نهله انا بس مستغربه.
حازم من ايه
نهله امتى حسيت بكدا و خصوصا ان مكنش باين عليك.
حازم معرفش ازاى يبان عليا بس انا كان لازم اتأكد من مشاعرى قبل ما اقول حاجه زى كدا و بالنسبه لأمتى فأنا كنت شاكك من فتره بس لما شوفتك تعبانه قدامى حسيت انى هتجنن و انى بتمنى انا اللى ابقى تعبان بدالك و كنت خايف عليكى اوى و عاوزك تفضلى قريبه منى على طول.. عرفت ان اللى جوايا ليكى حب بجد خوفى عليكى كان اختبار اخير لمشاعرى خلانى ابقى واثق منها كويس.. بس اللى عاوز اعرفه انتى حاسه بأيه
فى هذه اللحظه دخل فارس دون استأذان.
فارس سورى انا بحسبك لوحدك.
حازم و حتى لو لوحدى مش تخبط.
فارس خلاص يا عم هو انا عشان قولت ابقى ابن ناس و اقولك سورى هتسوق فيها.... مالك قاعد جنب البنت كدا ليه و هى وشها احمر... عملتلها ايه اعترف.
حازم هعملها ايه يعنى يا اهبل انت
فارس يعنى مش قاعد على مكتبك و مقعدها جنبك على الكنبه و وشها احمر و امبارح تختفى و ترجع بمامتها و قبلها كمادات و سهر طول الليل... هو فى ايه
نهله فى ايه يا فارس
فارس بخبث انا اللى بسأل
حازم و انت ايه بقى رأيك يا نبغة عصرك.
فارس انا و نغم قولنا رأينا لنهله امبارح.
شعرت نهله بإحراج كبير من كلام فارس.
حازم يا سلام انت و نغم و ايه بقى يا ترى اللى انت و نغم بعبقريتكم قولتوه.
فارس وقعت يا كبير.
نهله بعتاب فارس.
حازم و ايه بقى العبقريه اللى نزلت عليكم فجأه دى... على العموم مجيبتوش حاجه جديده... انا لسه كنت بقول لنهله.
فارس بدهشه بتقولها ايه.
وقفت نهله مسرعه و غادرت الحجره.
حازم قولتلها انى بحبها.
فارس قولتلها انك بتحبها... ببساطه بتقولها كدا كأنك بتقولى قولتلها انى خارج اشترى بنطلون.
حازم عاوزنى اقولها ازاى.
فارس طيب و هى قالتلك ايه
حازم ملحقتش تقول حاجه لأن فى واحد دخل زى القطر المكتب من غير ما يستأذن و قعد يستظرف و يخف فى دمه.
فارس اسف و الله مكنتش عارف انك اخيرا نطقت... و الله البت نغم دى طلعت بتفكر.
حازم اشمعنى
فارس هى اللى لفتت نظرنا... قالت طالما عملتلها كمادات تبقى بتحبها.
حازم اه عندها حق.
فارس اه انت اللى تحبها تعملها كمادات على طول.
حازم تفتكر هى هيبقى رأيها ايه
فارس نغم
حازم بطل غباء... انا مالى بنغم انا بتكلم عن نهله.
فارس و الله يا معلم مش عارف بس كسوفها الزياده دا معناه ان هى كمان بتفكر فيك.
حازم بس هى مقالتش لأحمد لا.
فارس يمكن كانت بتغيظك عشان تتلحلح و تتكلم.
حازم اتلحلح
فارس اه و تتكلم.
حازم طيب غووور.
فارس اغور
حازم ايوا.
فارس و انا اللى كنت جاى اقعد معاك عشان تفضفضلى... ياللا خير تعمل شر تلقى.
حازم طيب ياللا عشان ورايا شغل.
فارس دلوقتى وراك شغل ما انت مكنش وراك حاجه و انت زانق البنت جنبك.
حازم يا ابنى عيب اللى انت بتقوله دا... اتلم شويه.
فارس اوكى... على العموم انا فرحان اوى عشانك لأن اخيرا لاقيت حد يستاهلك.
ابتسم حازم فتركه و خرج.
الفصل الحادى و العشرون
لم تصدق نهله ما سمعته من حازم
كانت ندى تتحدث على الماسنجر مع ادهم.
ندى تعالى يا حبيبتى انا بتكلم مع ادهم.
نهله سلميلى عليه و اقفلى معاه شويه و تعالى عاوزه اتكلم معاكى
