رواية الغريبة (الفصل الاخير ) كاملة وحصري على لمحة نيوز

الفصل الثامن و الثلاثون والاخير 
انشغلا فارس و نهله بالتحضيرات للمعرض خلال الاسبوعين و انشغلت نغم و ندى بالتحضيرات للخطوبه.. بقى موضوع المعرض مفاجأة لم يخبرا احدا بها.
انهوا الصور و الرسم و اختاروا ما قررا عرضه و بدءا تجهيز المعرض الذى استأجراه.
اما ادهم فقد وافق احد الناشرين على نشر احدى رواياته و انشغل فى هذا الامر بالأضافه إلى عمله.
بعد اسبوعين كانت حفلة الخطوبة الرائعه و التى كانت فيها نغم و ندى احلى عرائس و اعجب الجميع بهما و بالحفله و سعد الجميع بهما و خصوصا ان هذا قرب بينهم اكثر و اكثر.
بعد اسبوع من الخطبه كان افتتاح المعرض. قضيا نهله و فارس اليوم كاملا فى التحضيرات و بعثوا بكروت دعوه لكل معارفهم بما فيهم اهل بيتهم و كانت مفاجأه تشوق الجميع لها.
حضر الجميع فى المساء لمكان المعرض و استقبلهما نهله و فارس تفاجأ الجميع بالفكره المبتكره فكان كل منظر يصوره فارس بعدسته بأسلوبه الخاص و ترسمه نهله برؤيتها الخاصه.. اعجب به كل من حضره من نقاد و صحفين لدرجة انهم طلبوا منهما عمل لقاءات صحفيه
و ندوات معهما. كان يوما ناجحا جدا.

بعد عودتهم للمنزل جلسوا جميعا يتحدثون سويا.
حازم بجد متخيلتش ان المفاجأه اللى بتحضرولها تبقى بالحجم دا.
نغم المعرض فعلا رائع.
ندى مفاجأه تجنن بجد.
فارس و لسه فى مفاجأة تانيه بس لنهله.
نهله ايه هى دى
فارس خليكوا هنا ثوانى.
صعد مسرعا إلى غرفته ثم عاد و معه اللابتوب الخاص به. جلس و هو يشغل جهازه.
فارس طبعا فاكره لما كنت بصورك فيديو من اول ما ابتديتى تشتغلى فى الجنينه و لحد ما وصلت للشكل الرائع اللى بهرنا كلنا و بيبهر اى حد يزورنا.
نهله ايوا.
فارس و كنتى بتسألينى دايما ليه مهتم اعمل كدا.
حازم متخلصنا يا ابنى و تفهمنا فى ايه.
فارس انا كنت بعمل لنهله حاجه زى تليفزيون الواقع كدا.
نغم ازاى يعنى
فارس كنت بصورها و كل ما اصور فيديو ارفعه عندى على الفيسبوك من اول ما كانت الجنينه ملهاش منظر لحد ما وصلت للشكل اللى هى عليه دا.. كانوا اصحابى و كل معارفى بيتابعوا فيديوهاتها على طول و كانوا منبهريين باللى هى عملته لدرجة انى لما كنت بتاخر فى انى انزل فيديو كانوا بيقعدوا يبعتولى يسألونى عن الفيديوهات و لما شافوا النتيجه انبهروا.
حازم يعنى افهم من كدا ان حضرتك كنت بتصور مراتى و هى بتشتغل فى الارض و تحط الفيديوهات على النت لأمة لا اله الا الله كلها تتفرج عليها.
فارس و ايه المشكله يا حازم
حازم انت عبيط.. ايه هو اللى ايه المشكله
فارس اولا التركيز مكنش على نهله التركيز كان على الارض و هى مظهرتش الا قليل اوى و صوتها كان هو بس اللى ظاهر لما كنت بخليها تشرح بتعمل ايه.
حازم برضه مش مرتاح لكدا.
فارس خلاص يا حازم الهدف من الفيديوهات دى حققناه و ممكن احذفها دلوقتى. 
حازم و ايه الهدف بقى يا عبقرى
فارس الهدف ان نهله بقت مشهوره جدا فى مجالها دا و ان ناس كتير اوى من معارفى بيطلبوا منها ان هى تشرف على تنظيم و تصميم الجناين بتاعت بيوتهم و الفيلل بتاعتهم و دى حاجه هى بتحبها و ممكن اعملها سايت خاص بيها و من خلاله الناس تعرفها اكتر.
نهله بفرحه بجد دى حاجه عمرى ما كنت احلم بيها.
حازم ايوا يا جماعه فعلا دى حاجه كويسه بس ايه ضمننا ان الناس اللى تروحلهم دول يبقى موثوق فيهم و محدش يضايقها.
فارس لأن دول هيكونوا عائلات معروفه و موثوق فيهم و هى كمان هيبقى ليها تيم هو اللى هيشتغل هى هيبقى دورها اشرافى.
نهله حازم بجد دى فرصه تجنن.
حازم مبتسما لها و ماله نجرب بس يبقى ناس موثوق فيهم.. بس هتقدرى على الشغل دا و شغلك فى الشركه.
نهله ايوا متخافش عليا.
بارك لها الجميع و كانت فى قمة سعادتها.
مرت الشهور التاليه بهدوء و سعاده على الجميع و لم يعكر صفو حياتهم اى شئ حتى انتهت السنه التى حددها جدهم و جاء يوم اللقاء مع الاستاذ طارق المحامى.
طارق اهلا بيكم.. انا ملاحظ ان الاوضاع مختلفه عن لما اتقابلنا اول مره.
حازم كتير.
طارق بصراحه انا كنت خايف متقدروش تكملوا السنه سوا.. و خصوصا مدام نهله.
ابتسمت نهله له.
طارق على العموم دلوقتى و بعد ما اتحقق شرط جدكم كدا كل املاكه هتتقسم عليكم بالعدل و حسب الشرع و كل واحد هياخد نصيبه و هيبقى حر فى التصرف فيه.. و اللى حابب انه يستمر فى شغله فى الشركه هو حر و اللى حابب يشتغل شغل تانى فهو برضه حر.
حازم شكرا يا استاذ طارق احنا تعبناك اوى معانا.
طارق مفيش تعب دا شغلى و جدكم كان صديقى بس فاضل حاجه اخيره.
حازم خير.
طارق فى رساله تانيه لمدام نهله من جدها.
نهله بإستغراب رساله تانيه.
طارق ايوا.. اتفضلى.  
و ناولها ظرف يحوى رساله من جدها.
غادر الجميع