كنت قاعد في جنينة البيت وبناتي بيلعبوا بالكورة بقلم حمادة هيكل
كنت قاعد في جنينة البيت
وبناتي بيلعبوا بالكورة
كنت مبسوط وانا متابعهم وهما فرحانين
ومستمتعين جدا باللعب...بعدها مراتي جابت
لي القهوة وقعدت جنبي شوية ..تليفون البيت ضرب
قامت ترد عليه وانا انشغلت في شرب القهوه
وقراءة الجورنال اللي كان قدامي
بنتي الكبيرة ملك اللي عمرها سبع سنين
حدفت الكورة ..خرجت بره البيت
مريم أختها الصغيرة اللي عمرها4 سنين
جريت ورا الكورة وفي نفس الوقت
كانت عربية جاية بسرعه اتفاجئ السواق
بظهور مريم قدامه وحاول يتفادها لكنه
للأسف خبطها... وماتت
من يومها والفرحة أختفت من بيتنا
مراتي بتحملني مسئولية موت مريم واني اهملت
في رعايتها ..وعلى الجانب التاني ..ملك حاسه
بالذنب وبتقول انها السبب في موت أختها
كنت متفهم موقف مراتي وحزنها على مريم
وفي نفس الوقت كنت بحاول أقرب اكتر من ملك
وافهمها انها ملهاش ذنب في اللي حصل
وان دا قضاء وقدر
ساءت علاقتي جدا مع مراتي وكتير كنت بعدي
عشان متفهم مدى حزنها على البنت ..بس هي بنتي
انا كمان وزعلان عليها اوي ويمكن أكتر منها
كنت بهرب من البيت لما نتخانق وبدفن نفسي في الشغل
عشان انسى الخناق والنكد بتاعها
فات شهر والتاني ومراتي ابتدت حالتها تهدى شويه بشوية
وأمورنا بقت أفضل
بس ملك لسه حزينه وللأسف مش قادرة تتجاوز المحنه دي
دايما بتصحى بالليل خايفه ومفزوعه من الكوابيس اللي بيشوفها كل ليلة ..لأنها شافت أختها وهي بتخبطها العربية
وهي واقعه ع الأرض والدم مغرق وشها وفستانها
في ليلة كنت نايم في أوضتي ،وصحيت
على صوت ملك بتعيط في اوضتها
وملقتش مراتي جنبي ..قولت يمكن راحت تشوف البنت
بس البنت لسه بتعيط ..قومت وروحت اوضتها
لقيتها قاعده
مالك يا ملوكتي ؟
ماما قاعده مع مريم وسايباني لوحدي
أخدتها وقولت
يا حبيبتي مريم خلاص راحت عند ربنا
وانا وماما بنحبك وانتي أغلى حاجه عندنا
لأ هي قاعده معاها تحت في أوضة المكتب
انا شوفتها من كام يوم وهي معاها بتضحك وبتلعب
يا حبيبتي مفيش الكلام دا أكيد كنتي بتحلمي
لا مش بحلم وهي دلوقت معاها ..انا سمعت صوتهم
بس خوفت أدخل ماما تزعق لي
كنت عارف انها اوهام وخيالات خلقها خيالها
حبيت أثبت لها انه مفيش حاجه والكلام دا مش صح
أخدتها ونزلنا تحت وروحنا ع المكتب
بس قبل ما أمد أيدي وأفتح الباب
سمعت صوت مراتي وهي بتتكلم مع حد
وقفت مكاني وقررت أبص من فتحة المفتاح
ولقيت مراتي قاعده قصادي ..وقدامها
بنت قاعده قدامها ..بس مدياني ضهرها
نفس جسم وفستان وتسريحة شعر بنتي مريم
طب ازاي ..هي مريم رجعت تاني للحياة
في أموات بيرجعوا ؟
ملك قالت يلا يا بابا ..افتح عايزه العب مع أختي
ششش وطي صوتك يا ملك
بعدها فتحت الباب مرة واحده ولما دخلت
اتفاجئت لما !!
لقيت مراتي قاعدة لوحدها في الأوضة
حبيبي انت ايه اللي صحاك دلوقت
هي راحت فين ؟
هي مين ؟
مريم
مريم !! انت ايه اللي بتقوله دا يا علي
بقولك مريم راحت فين
انت أكيد أتجنت مش كدا
ملك فضلت تعيط ومامتها وقالت
ينفع كدا خضيت البنت
البنت اترمت عليا وفضلت تعيط
اخدناها ونيمناها في سريرها
ولما سألت مراتي على اللي حصل قالت
دي خيالات أطفال انت أزاي تصدق حاجه زي دي
ايوه وانتي بتعملي ايه عندك في المكتب في الوقت دا
مفيش قلقت ونزلت أقرى في كتاب
على ما يجي لي نوم كنت هطلع
لمحت مكتوب على غلاف الكتاب
حاجه عن الأرواح
ايوه بس انا شوفت ...
شوفت ايه ؟
مش عارف
في ايه بس فهمني ؟
اترميت وفضلت أعيط وانا بقولها
مريم وحشتني أوي يا أسماء
حطت ايدها على شعري وقالت
معلش يا حبيبي ..ربنا يرحمها ويصبرنا على فراقها
فات أسبوعين وفي ليلة كنا بنتفرج على التليفزيون
انا ومراتي في الصالة وطافيين النور
وفي نص الفيلم ..لقيت مراتي راحت في النوم ع الكنبة
حسيت بالعطش قومت اجيب مايه من المطبخ
أخدت كوبايه وفتحت الحنفيه ومليتها
بعدها سمعت صوت أنفاس متسارعه
في حد موجود معايا في المطبخ
كان في ترابيزه في نص المطبخ ..عليها مفرش
نزلت على ركبي وقربت من مصدر الصوت
واللي بدأ يهدأ بالتدريج ..ولسه هرفع
المفرش ..سمعت مراتي واقفه ورايا وبتقولي
بتعمل ايه عندك يا علي ؟
سبت المفرش وانا بقولها ..ها لا مفيش
انتي ايه صحاكي ؟
عيني غفلت وانا بتفرج ع الفيلم ولما فتحت
ملقتكش جنبي
انا جيت اشىرب
طب ممكن شوية مايه
ثواني هجيبلك
وانا بملا الكوبايه ..مراتي قعدت ع الكرسي
اللي قدام الترابيزة ..وبعدها
قولتلها اتفضلي ..خدت تشرب وقعدت قصادها
نتكلم شوية ..وكانت بتقولي ايه رأيك
لو نقلنا التلاجه من هنا وحطيناها في الزاوية دي
ايه رأيك مش كدا أفضل
بصيت ناحية التلاجه وأنا بقول
اه بس انا شايف ان مكانها هنا مناسب أكتر
وخصوصا ورجعت أبص ناحية مراتي
لكني لمحت رجل طفل صغير لابس نفس شراب
بنتي مريم بيحبي على ركبه وخارج من المطبخ بسرعه
بصي يا اسماء بصي ؟
ايه في ايه
انا كنت حاسس انه في حد معايا ..انا سمعت نفسها
هي مين !
مريم يا اسماء مريم
تاني يا علي ! انت مش ناوي تنسى بقى
بقولك انا شوفتها وهي خارجه دلوقت وجريت
يا حبيبي انت نفسيتك متأثرة بفراقها
بس انا مشوفتش حد ومفيش
الا انا وانت بس ؟
يعني ايه انا اتجننت ؟
مقولتش كدا بس انت مرهق اوي
ولازم تهدى ..يلا عشان نطلع ننام بقى
وارجوك بلاش تضغط على أعصابي بالشكل دا
طيب خلاص ..يلا نطلع
تاني يوم أخدت ملك وروحت وصلتها الحضانه
وكملت طريقي للشغل
بس كنت حاسس أن في حاجه غلط بتحصل
انا متجننتش وواثق من نفسي
أسماء مخبيه عني سر ولازم أعرفه
مروحتش الشغل ورجعت البيت
فتحت الباب ودخلت بهدوء وسمعت صوت مراتي في المطبخ
بتقول
دقايق يا مريومتي والفطار هيكون جاهز !
أسختبيت بسرعه ورا الستارة
واستنيت لحد ما طلعت فوق وشايله الفطار
طلعت وراها بسرعه ووقفت ورا باب الأوضة
وسمعتها وهي بتقول
لحقتي تنامي ياروح مامي...يلا قومي يا مريومه كفايه دلع
فتحت الباب ..ومراتي اتفاجأت لما شافتني
علي !! انت ايه رجعك دلوقت
رجعت عشان اكشف كدبك
البنت صحيت واتفزعت
مين دي ؟
ابعد عنها يا علي ..البنت خايفه
بقولك مين دي !!
شديت البنت منها ..ولقيتها خايفه وبتعيط
في نفس سن مريم وملامحها قريبه منها جدا
لابسه لبسها ونفس تسريحة شعرها بس مش مريم طبعا
بعد مشاده مع مراتي وبكاء الطفلة
اخدتني بره وحكت لي كل حاجه
مراتي قالت أن دي بنت من أطفال الشوارع
شافتها في أشارة مرور بتتسول
واتفاجأت انها تشبه لحد كبير بنتنا
قررت تاخدها البيت ..نضفتها وعالجتها
وقررت تسميها مريم ..وحاولت تخليها نسخه منها
عشان تحس ان مريم لسه عايشه
خافت تقولي اطردها ..فقررت تخبيها
وخوفتها من الظهور ليا او لملك
والا هترجع تاني للشارع
وفضلت تترجاني أهلي البنت عندنا وبلاش
نرميها تاني للشارع ..وأنها أتعلقت بيها جدا
وحاسه أن ربنا بتعها لها عشان تعوضها عن مريم
مراتي تعبت نفسيا جدا وكانت متخيله
وعشان كدا خبتها عني ..قررت أخدها لدكتور نفسي
وبعد فترة العلاج ..طلبت اني اخلي البنت عندنا
فكرت كتير ..وكنت مش عارف أعمل أيه
لكن مع خوف الطفلة وتعلق مراتي بيها قررت أني أمشي بشكل قانوني في اجراءات بقاء البنت معانا
تمت
حماده_هيكل
