منتج ملعون بقلم حور حمدان
روحي منك لله مش هسامحك أبدا على اللي عملتيه في شعري دا حرام عليكي والله العظيم.
كنت قاعدة في مكتبي براجع المسدجات اللي ما بين الأدمن والعملاء لحد ما لقيت رسالة من عميلة كانت واخدة المنتج بتاع الشعر من يومين بالظبط.
فتحتها وأول ما شوفت الصورة اللي بعتها اتصدمت كمية شعر رهيبة واقع في الصورة!
دا ولا كأن الشعر متقصوص بمقص.
كتبتلها وأنا بحاول أهدى من التوتر
اهدي بس حضرتك في إيه!
دا أكيد ويستحيل يكون من المنتج بتاعي أبدا.
بس هي ردت بعد وقت طويل بعد ما سابتني قاعدة على أعصابي وقالت
لأ أنا ما استخدمتش على شعري غير المنتج بتاعك. لو عندك ضمير وذمة رجعيلي فلوسي أنا مش بس شعري راح دا كمان دافعة قد كدا في منتج يقرف!
سكتت شوية بعد ما قريت كلامها وقلبي كان بيدق بسرعة إيه اللي
يعني معقولة المنتج اللي أنا متأكدة من جودته ومن نتيجته يبقى هو السبب! مستحيل. أنا متأكدة إن في حاجة غلط.
رجعت أبص تاني على الصورة اللي بعتها حسيت إنها مش طبيعية كمية الشعر اللي واقع مش منطقية خالص كأنها مقصوصة بمقص واتلمت في كومة واتصورت.
حاولت أسيطر على أعصابي وكتبتلها
بصي أنا عارفة المنتج بتاعي كويس ومش أول مرة يتباع. فمستحيل يعمل كده بس خليني أساعدك. لو في أي حاجة حصلت ممكن نلاقي لها حل.
هي ردت بسرعة وكأنها مستنية
أنا مش عايزة غير فلوسي ترجعلي وخدي المنتج بتاعك. أنا اتخدعت ومش هسكت.
فضلت ساكتة دقيقة بفكر إزاي يعني المنتج يرجعلي بعد ما استعملته! ده لو حتى كان صحيح إن حصل مشكلة الطبيعي العميلة تكلمني تسأل أو تستفسر قبل ما تتصرف. لكن هي من أول دقيقة داخلة
رغم كده قلت
تمام ممكن تبعتيلي المنتج تاني وأنا أرجعلك فلوسك.
سكتت شوية وبعدين قالت
المنتج أنا رميته! مش هستعمله تاني لو عندك ضمير ابعتيلي الفلوس وخلاص.
وقتها الشك كبر جوايا. رميتيه إزاي بعد يومين بس من الاستعمال! وكمان من غير ما تستشيريني أو تفكري إن في حل تاني!
فضلت أفكر دي مش أول مرة أشوف النوعية دي من العملاء. فيه ناس بتفتكس أي حكاية علشان يركبوا قصة وياخدوا المنتج ويرجعوا فلوسهم يعني خسارة مضاعفة للي شغال أونلاين.
كتبتلها بحزم
بصي أنا مقدرة إنك متضايقة بس من غير ما المنتج يرجعلي مفيش فلوس هترجع. دي سياسة معروفة لأي بيزنس ومش معقولة آخد خسارتين مع بعض. ولو كنتي صادقة فعلا كان أسهل حاجة إنك ترجعي المنتج مع الشعر اللي وقع ونشوف القصة كلها.
بعدها مر نص ساعة ومردتش.
وفجأة لقيتها عاملة بلوك للصفحة!
ضحكت بمرارة الموضوع كان واضح هي من البداية داخلة تكذب عايزة تاخد المنتج مجانا وتسترد الفلوس. وده اللي بيحصل كتير أوي في الشغل أونلاين ناس فاكرة إن الضمير بيتباع ويشترى.
قعدت ساعتها أفكر وكتبت عندي ملاحظة كبيرة بخط أحمر
مهما حصل خليك واثق في شغلك وماترجعش فلوسك إلا لما يرجعلك المنتج. الكذب موجود بس الأمانة هي اللي بتخلي البزنس يعيش.
قفلت اللابتوب وأنا متمسكة أكتر من أي وقت إني أحافظ على حقي وإن مهما قابلت من النوعيات دي دايما هافضل أعتمد على الناس اللي تعرف قيمة الضمير قبل أي شيء.
وحشتوني اوي اوي اووووي اووي كمان مرة
البارت ملخص انهاردة عشان بفكر اكتب كمان اسكربت
ف قولولي اي رايكم انزل كمان بارت.
تمتت
منتج_
حكاوي_كاتبة
حور_حمدان
