بتحكي زوجة عن قصة جوزها وتقول جوزي أمه ماتت وهو عنده سنة

بتحكي زوجة عن قصة جوزها وتقول
جوزي أمه ماتت وهو عنده سنة وعمته هي اللي ربته بحنية لحد ما بقى عنده خمس سنين وبعدها العمة ماتت هي كمان 
وقتها أبوه كان متجوز بعد أمه فراح الولد يعيش مع أبوه ومرات أبوه.
مراته دي كان عندها ولد وبنت من جوزها الأول وخلفت كمان أربعة من أبو جوزي.
كانت بتعامل أولادها كلهم كويس جدا إلا هو! 
قسوتها عليه ماكنتش عادية حتى الأكل كانت تفرق فيه
ولادها ياكلوا فراخ ولحمة وهو تحطله شوية رز أو عدس وخلاص.
ومع كل ده كان دايما من الأوائل في المدرسة 
لكن لما وصل أولى إعدادي فضلت تزن على أبوه إنه يسيب التعليم ويشتغل معاهم
وللأسف أبوه كان ضعيف الشخصية وسمع كلامها.
ساب المدرسة وهو صغير واشتغل نجار مع أبوه علشان يصرف على

إخواته
وعلى أولاد مرات أبوه كمان اللي كانوا في سنه وأكبر منه.
عدت السنين وأبوه مات
وأول حاجة عملتها مرات أبوه إنها طردته من البيت وأكلت حقه في الميراث 
اترمى ما بين بيوت قرايبه وأصحابه لحد ما ربنا رزقه بعقد عمل في بلد عربية.
سافر وهو مكسور بس ربنا عوضه خير.
قعد هناك 15 سنة متواصلة ما نزلش مصر ماكنش له حد ينزله
لكنه تعب واشتغل وربنا فتحها عليه وبقى مليونير ما شاء الله 
رجع مصر بعد 15 سنة
وأول حاجة عملها إنه بنى جامع على روح أمه وأبوه 
وراح بيت أبوه لقى إخواته حالتهم صعبة جدا.
البيت كان مبني بالطين
راح بناه كله مسلح وعمل دور لكل أخ وأخت.
جوز البنات وساعد الرجالة اللي اتجوزوا
واللي لسه متجوزوش إداهم فلوس يتجوزوا
واللي عايز يسافر منهم سفره البلد اللي اشتغل فيها.
وبعد كل ده جه يتقدملي.
كان أكبر مني بعشر سنين وأهلي رفضوه لأنه مش متعلم.
بس أنا أصريت عشان طيبته وحنانه مفيش زيهم 
واتجوزنا والحمد لله
وأول حاجة عملها بعد الجواز خدني أزور إخواته ومرات أبوه!
دخلنا عليهم كانت مريضة ومقعدة
سلم عليها وباس راسها وقالها
إزيك يا أمي دي مراتي فلانة.
وإداها ظرف فيه فلوس ومشينا.
اتجننت أنا! 
قلت له مش دي اللي كانت قاسية عليك
رد عليا وقال
اللي عملته هي عند ربنا واللي بعمله أنا كمان عند ربنا.
أبويا موصيني عليها ومتعودتش أقسى على حد ضعيف
كفاية إنها ربتني وأنا مش ابنها لحد ما بقيت راجل.
ومن يومها وهو بيزورها كل أسبوع وبيصرف عليها وعلى ولادها من الألف للياء.
وربنا مبارك في رزقنا.
لكن حالتها ساءت وجالها مرض الموت.
جوزي وداها أحسن مستشفى في القاهرة
ولما كانت في العناية طلبت تشوفه.
دخل ليها لقاها بتبكي وقالت له
نفسي تاخد حقك مني في الدنيا بدل الآخرة
إنت طلعت أكرم مني ورديت الإساءة بإحسان.
بس أنا عارفة إنك مش مسامحني.
حاولت تبوس إيده فقالها
والله العظيم سامحك سامحيني انتي لو قصرت في حقك.
قالت له عمرك ما قصرت وصيتي إنك ما تاخدش ولادي بذنبي
وملهمش غيرك بعد ربنا
ولما تزور أمك وأبوك افتكرني واقرالي الفاتحة.
وماتت الست 
جوزي بنالها جامع صدقة جارية على روحها
وبيزورها مع أمه وأبوه كل أسبوع ويدعيلهم التلاتة.
القسوة مرض وربنا يعافينا منه
أما الطيبة ولين القلب فهي أعظم نعمة من ربنا 
أنا بحب جوزي وكل يوم بيكبر في نظري أكتر بسبب أفعاله الطيبة.
ربنا يباركلي فيه وما يحرمنيش منه أبدا