أسكريبت ذكرى تيشيرت كورة بقلم احمد اسماعيل

بابا بابا
ـ عايز إيه؟
ـ عايز أجيب هدوم العيد وكوتشي جديد
ـ لسه بدري على الكلام ده
ـ بدري إزاي؟ فاضل أسبوعين بس
ـ أسبوعين يعني لسه بدري وبلاش رغّي كتير عشان ماقولش مفيش خالص
أنا سكت ودموعي نزلت جوايا وبقول لنفسي مفيهاش تيشيرت كورة خلاص ونمت زعلان والدموع نزلت من غير ما حد يحس
تاني يوم
ـ اصحى يا بني عشان تروح تجيب العيش والطابور طويل وانت صايم
ـ حاضر يا ماما
نزلت جبت العيش ورجعت وصليت
بعد الفطار
ـ حضّر نفسك ياض هننزل الشغل بعد الفطار ومتقعدش تاكل كتير عشان بحب أنزل وانا رايق
ـ اعتبرني مش بفطر أصلاً وهجهز
ـ ايوا يعم ابسط طب خدوني معاكوا اشمعنى انت
ـ ماشي ياعم خلاص هسكت
المغرب أذّن كلت لقمتين بسرعة

ولبست ومسحت الكوتشي القديم بتاعي وجزمة أبويا وبقول لنفسي ابسط يعم فيها تيشيرت كورة وهجيب تيشيرت صلاح بتاع تشيلسي
نزلنا نتمشى من محل لمحل وكل ما نقف قدام محل أطفال بابا يقولي
ـ إيه رأيك يا بيه في التيشيرت ده؟
ـ حلو بس أنا عايز قميص
ـ ماشي يا سيدي
دخلنا محل تاني
ـ إيه رأيك في القميص ده؟
ـ يا حج ده ليك انت!
ـ اهزر معاك إيه يا جزمة ما هو حلو وهيعيش معاك
ضحك هو وانا كسفت وضحكت بالعافية
ـ يا ابني تيشيرتات أحلى عليك انت لسه صغير عايز تغير ليه؟
ـ والله حابب أغير بس
مشينا وأنا عيني طول الوقت على محل تيشيرتات الكورة اللي عارفه
بابا لاحظ وقال
ـ هو انت نازل تجيب لبس ولا تتفرج على تيشيرتات الكورة؟
ـ بتفرج بس يا بابا
ـ بتضحك عليا؟ ولا ده ولا ده يلا نرجع
رجعنا وأنا مخنوق ودموعي على طرف عيني وكل ما أكلمه يزعق
قبل الوقفة بيومين دخل البيت معاه شنط كتير
فرحت بس لقيته جايب لأخواتي وانا قاعد بتفرج
قال
ـ اسمع يا بيه بكرة هننزل نجيبلك طقم وكوتشي ولو عملت زي المرة اللي فاتت صدقني مش هجيبلك حاجة وحلف
قلت حاضر ودموعي نزلت جريت على الحمام عشان ميشوفش
تاني يوم نزلنا نتفرج وأنا مخنوق وكل ما يقولي
ـ إيه رأيك؟
ـ حلو
من غير نفس
آخر حاجة لقى تيشيرت لونه أخضر
ـ جرب المقاس
دخلت جربت
ـ تمام
دفعنا ومشينا
دخلنا محل كوتشيات لقيت كوتشي حلو بس غالي
ـ هات المقاس ده للواد
جربته عجبني دفع ومشينا
ومرة واحدة لقيته ماشي في شارع كله محلات رياضية
وقف قدام محل وبصلي
ـ كنت عايز تيشيرت إيه يا جزمة؟
ـ تيشيرت صلاح الجديد بتاع تشيلسي
ـ ماشي كده كده مش هنشتري
كنت هتقمص لقيته داخل محل جنبه
ـ عندك تيشيرت صلاح؟
ـ موجود بس مفيش مقاسه
بصلي وقال
ـ شوفت؟ فقري
زعلت ومشينا
العيد خلص وبعدها بكام يوم دخل البيت معاه شنطة دخل بيها الأوضة من غير ما حد ياخد باله
بعد الغدا قال
ـ يا واد على السرير فيه شنطة هاتها
دخلت الأوضة فضولي شدني فتحت الشنطة لقيت طقم كامل تيشيرت وشورت نادي تشيلسي بتوع صلاح
فرحت جريت عليه حضنته
ـ فتحت الشنطة ليه يا واد؟
ـ مش مهم المهم التيشيرت
دخلت البسهم وانا فرحان
بابا كان طيب أوي وحنين بس مكنش بيعرف يبين ده وده اللي فهمته بعد ما مات الله يرحمه.

أسكريبت_ذكرى_تيشيرت_كورة.
#بقلم_أحمد_إسماعيل.