رواية زواج لدقائق معدودة (كاملة إلى الفصل الاخير) بقلم زهرة الربيع
المحتويات
بقول لك واللله العظيم ...
بس قاطعو حكم وقال بغضب .....هيه كلمه واحده هتكتب على البت شهر وتطلقها وبعدها كل حي يروح لحاله ... والا من الساعه دي لا انا عمك ولا اعرفك واللي جاي ما هيعجبكش واصل
نوح كان بيسمعوا بصدمه متتوصفش وعقله مش قادر يفكر ولا يتصرف هز راسه بالرفض بقوه وقال ...مهقدرش...مهقدرش اعمل كده في سند لاه ما هقدرش ابص في عينيه واصل انا وعدته وعدته اكلمك على جوازو منها ما اقدرش اغدر بيه ده اخويا ده دمي وكل حاجه ليا ياعمي احب على يدك
حكم قال بغضب وسخريه ....واللي عملته ما كانش غدر لاخوك لاه يا نوح انت كده او كده غدرت بيه وغدرت بيا انا كمان وحطيت راسنا في الوحل
نوح قال بزعيق ودموع....قسما برب العز ما عملت حاجه يا عمي ما عملتش حاجه يا ناس
عمو قال بغضب وزعيق..... عليا الحرام من بيتي لو ما كتبت على البت يا نوح لاكون دافنها الليله دي وتبيت في قبرها واتحمل خطيتها في رقبتك.. قولت ايه
نوح كان هيقع من طوله وحس الدنيا بتدور تحت رجليه قعد بصدمه على الكرسي وهو مش قادر ينطق
حكم بصله بغضب وقال بهدوء .....هكلم الماذون هنكتبو الكتاب الليله والفرح بكره عايزين كل البلد تعرف انك اتجوزت بت عمك
نوح هز راسه بالموافقه بتوهان وهو مش قادر يستوعب اللي بيحصل لحد دلوقتي بس فاق على صوت صرخت دولي لما قالت بغضب...... مين يكتب على مين ....بيخرف يقول ايه الراجل ده ...اللي سمعته صحيح يا نوح وووو
زواج_لدقائق_معدوده
مين يكتب على مين بيخرف يقول ايه الراجل ده اللي سمعته صحيح يا نوح
نوح بزعيق قال ...اطلعي فوق يا دولي ما قادرش اتكلم في حاجه دلوك... اطلعي وانا هفهمك كل حاجه
دولي قالت بسرعه وزعيق ....تفهمني ايه ..اللي قالو مازن صح
نوح بص لعمو اللي كان هينفجر من الغضب بسبب كلامها وقرب منها ومسك دراعها بغضب وقال بحده ....انا قولت اطلعي فوق دلوك هنتكلم بعدين ايه مبتفهميش واصل
دولي دفعت ايده بغضب وقالت..... لا انا مش هطلع فوق انا هطلع من البيت خالص مش قاعده ثانيه هنا خد دبلتك ما بقتش عايزاها
وقلعت الدبله ورميتها في وشه و مشيت من السرايا بغضب
مازن بقى ينادي عليها بس ما وقفتش وجري وراها عشان ما تمشيش لوحدها
نوح غمض عينيه بتعب وجذب شعر لورا وبقى يحاول ياخد نفسه وهو شايف كل حاجه بتطربق على دماغه بس مش همه اي شيء من كل ده قد ما بيفكر في رد فعل سند لما يرجع
فوق حليمه اتصدمت من كلام غنوه وقالت بتوتر...كلام ايه يا بت اللي ما لوش عازه ده.... انا قلت لك اللي حصل هيه صوح قالت هتنام مع امها انا دخلي ايه اذا كانت كدابه وراحت لنوح
غنوه مسكت طرف فستانها من فوق وقالت بسخريه وهي بتبص عليه ....وحياتك عندك وما ليكي علي حلفان لو كنت لابسه توبي كنت قلت لك خشي في عبي بس ده مش هينفع...ضيق
وبصت لها بغضب وقالت.... لو فاكراني كيف شروق هتحدفيلي كلمتين واصدقك تبقي غلطانه...انا غنوه الجزار يعني العبك على صوابعي دول كيف عرايس الخيط..واقراكي من جوه قبل بره ....فتعالي دغري معاي عشان لساني بينمل من كثر اللت والعجن
حليمه رفعت حاجبها بدهشه وفهمت ان البنت دي مش سهله خالص وقالت بضيق..... انا مش مضطره ارد عليكي من اساسه ولا حتى فاهمه عايزه تقولي ايه
غنوه نفخت بخنقه وقالت... هنقعد نلفو حوالين بعض زي الحيايا كده كتير.. على راحتك بس انا ما هسكتش عن الموضوع ده لحد ما اجيب قراره
حليمه ضحكه جامد وقالت..قراره...طيب لو لقيتي له قرار هاتيه يا بت الجزار
ومشيت وسابتها واقفه متغاظه وعندها احساس كبير ان حليمه هي اللي ورطت شروق كده بس مش عارفه السبب ولا عندها اي دليل
انما هويده بعد كل اللي سمعته بينهم ولانها عارفه حليمه كويس وعارفه نواياها اتيقنت انها هي اللي خدرت بنتها واخدتها على اوضه سند
وفهمت ان حليمه كانت قاصده تورط شروق مع سند لان امنيتها الاولى والاخيره انها اتجوزها له
و لسه هتنزل تحكي كل حاجه لجوزها بس وقفت مكانها بتردد وابتسمت بخبث وهي بتفكر في شيء تاني خالص
بقلم....زهرة الربيع
عدى اليوم على نوح كانه سنه تعب وحزن عمره كله فيه قاعد في الاوضه وبيفتكر كلام اخوه كلمه كلمه قد ايه كان متحمس وفرحان لجوازه من شروق
افتكر لما وعده وطمنوا انها هتكون ليه وانو هيكلملو عمه
بقى يحاول يرتب كلام بينه وبين نفسه ممكن يقوله له بس ما فيش فايده حتى وهو مش قدامه الكلام مش طالع ازاي هيقدر يواجهو وش لوش
مجرد الفكره هزت كيانو وحس ان دماغه وقفت ولسانه مش قادر ينطق
بس فاق من شروده على صوت تليفونه وكان المتصل والد دولي مسح على وشه بخنقه شديده ورد وقال.... ايوه يا معالي الوزير
ونفخ بزهق وقال بهدوء .... ممكن تهدي شوي معاليك..واللي خلق الخلق لو اي حد غيرك بيتكلم معاي باللهجه دي مكانش نطق بعدها....بتك فهمت الموضوع كله غلط وانا هستنى من حضرتك زياره نتحدت فيها واشرحلك اللي حصل وبعديها اللي عايزه انت وبتك هيتم
قال كده وقفل معاه وخبط التليفون في الارض بغضب و جذب شعره بتوتر وخنقه
عند حليمه كانت في الاوضه رايحه جايه بتوتر ومش مصدقه اللي حصل قالت بزهول.... طيب كيف.... كيف سند مش في اوضته وكيف نوح هو اللي هناك
دخل الشاب اللي خدر شروق وكان متوتر جدا
حليمه اول ما شافته ومسكت في هدومه بغضب وقالت..
ايه اللي عملته ده يا هباب البركه..في كل حاجه غبي اللي كان في الاوضه نوح مش سند يا جحش
ال اجل بلع ريقه بتوتر وقال...و انا ذنبي ايه يا ست حليمه انتي قولتي لي اخر اوضه في الطرقه وانا روحت اخر اوضه
حليمه قالت بغضب وزعيق.... والبعيد حمار كيف ما يقولوا لك تمشي معارفش سند من نوح
قال بتوتر.... انا لما دخلت الشاب كان مغطي وشه وانا ما رضيتش اكشف وشه علشان ما يصحاش حطيت البت جمبه كيف ما قولتيلي ومشيت.
حليمه قالت بغضب.... امشي من قداني غور امشي مش عايز اشوف وشك
واطلع من ورا المندره متجبليش الكلام اكتر من كده
الشاب مشي وجات سماح الخدامه وقالت بتوتر ..عيزاني يا ست حليمه
حليمه جريت عليها وقالت.... ما تعرفيش ايه اللي ودى نوح اوضه سند يا سماح
سماح قالت بتوتر.... ايوه يا ست حليمه اصل هو امبارح كان متضايق من صوت الاغاني اللي جايه من اوضه ود الوزير لانها جنب اوضته وقال هيروح يبيت عند سند بيه
حليمه زعقت فيها بغضب وقالت.... وما قولتليش ليه يا اذكى اخواتك
سماح قالت بتوتر..... ما انا معرفاش حاجه يا ست حليمه انتي ما قولتليش اي حاجه كن اللي ناويه عليه
حليمه قالت بغضب..... امشي من قدامي.... امشي معيزاش اشوف حد الساعه دي
الخدامه مشيت بسرعه وحليمه بصت قدامها بغضب وقالت ..وبعدين يا حليمه كل ما تعملي حاجه تتطربق على دماغك ..وكله كوم والبت الجديده دي كمان كوم تاني... بس اخلص من الورطه دي وهشوفلها صرفه.. بسيطه
عند شروق كانت بتبكي جامد وغنوه بتحاول تهديها وقالت... يا بت الناس اهدي شويه كفاياكي كده عينيكي ورمت من البكى من ساعة اللي حصل وانتي بتبكي اللي بتعمليه ده لا هيقدم ولا هياخر
شروق قالت بدموع .....ما اعرفهاش كيف حصل ده.. والله العظيم ما عملت حاجه يا غنوه يمين بالله ماعملت حاجه
غنوه قالت بابتسامه ...انا مصدقاكي وكمان قولتيلي ان امك صدقتك واكيد هتقول لابوكي وهتتحل
شروق قالت بدموع....لا مفيش حاجه هتتحل اكيد ما صدقنيش لو صدقني صوح كان جيه اتكلم معاي لكن ده لسانه مخاطبش لساني وقاعد تحت من صبحية ربنا ما جاش حدتني واصل وحتى معرفاش نوه على ايه
غنوه قالت بابتسامه....طالت ولا قصرت ده ابوكي لو زعل منك مسيره ياجي يصالحك انتي بس استهدي بالله و قولي يا رب
شروق قالت بدموع ....يا رب يا رب انت العالم بحالي اوقف معايا يارب لجل حبيبك النبي
عند نوح كان في اوضته منزلش منها من الصبح بيحاول يستوعب كل اللي بيحصل وبيحاول بفكر بس موصلش لاي حل
جات سماح الخدامه وقالت من ورا الباب .....احم نوح بيه عمك عايزك
نوح فتح الباب بسرعه وبصلها وقلبه هيوقف من التوتر وقال...عايزني ليه
سماح نزلت عيونها في الارض وقالت ... بيقول لجنابك المأذون وصل تحت
نوح غمض عنيه بوجع شديد وحس زي ما يكون حد ضربه في قلبه بسكين وهز راسه بالموافقه بيأس وقال ....قولي له نازل
بعد دقايق نزل ولقى عمه قاعد ومعاه المأذون والشهود واول ما شافوا قال للماذون....ابدأ ياشيخ جابر اكتب الكتاب قوام
وبالفعل بداوا في اجراءات كتب الكتاب
و الماذون قال.... مش ناخد راي العروسه
حكم بصلو بحده وقال... العروسه موافقه انا ابوها خلص وانا هطلع لها الدفتر تمضي
الماذون هز راسه بالموافقه باستغراب من حالهم وخلص كتب الكتاب وادى القلم لنوح علشان يمضي
نوح مسك القلم وحس بايديه بترتعش لاول مره ورفع عينه لعمو اللي بصله بغضب وقال ...امضي يا نوح
اتنهد بحزن وفعلا مضى وهو متدمر حرفيا خصوصا لما جات عينه على صوره لاخوه على الحيط نزلت دمعه على خده وهو حاسس انه مش قادر يبص حتى للصوره ازاي ممكن يواجهه لما يبقى قدامه
الماذون قال ....ودوا الدفتر للعروسه تمضي
سماح زغرطت بس زعق فيها نوح بغضب شديد وقال ....اتكتمي يا بت اكتمي لاقطع لك لسانك ده من حلقك
سماح اترعبت من صوته وجريت على المطبخ وحكم اخد الدفتر وطلع بيه لشروق
عند شروق كانت مش فاهمه اي حاجه من اللي بتحصل تحت وفجأه ابوها فتح الباب بغضب وقال ...خدي امضي يا فاجره ورمى الدفتر على السرير جمبها
شروق اتسعت عنيها بزهول وقالت بخوف....ام..امضي على ايه يا بوي
ابوها بصلها بغضب وقال.... تمضي على خيبتك وورقة رخصك...تمضي عقد جوازك يا عروسه جوازك من ود عمك اللي ما طايقش يبص في خلقتك... ويبص في خلقتك ليه وهو حصل منك كل حاجه بالساهل
شروق قالت بزهول....يامري ..يامري لا يا ابوي والله ما عملت حاجه ما عملتش حاجه ...نوح لاه نوح ما عايزنيش يا ابوي لو مش علشاني علشانه هو مقدرش اقعد مع واحد مضايقنيش يا ابوي
بس فاجئها لما ضربها قلم قوي وقعها على السرير وقال.... ما جاييش اتساير معاكي يا خاطيه يا بت الرفضي امضي بقولك الرجاله تحت مستنين
هويده قربت منها وقالت بتوتر.... امضي يا شروق امضي يا حبيبتي
شروق كانت بتبكي جامد وغنوه حطيت لها الدفتر مع رجلها ومسكت لها القلم وقالت....اسمعي كلام امك وابوكي وامضي يا شروق وكل حاجه هتتحل
شروق مسكت القلم ومضت وهيه بتبكي جامد و قلبها وجعها حرفيا طول عمرها بتحلم باللحظه اللي تكتب كتابها على نوح بس عمرها ما اتخيلت انها ممكن تبقى بالشكل ده وهو مغصوب عليها
ابوها اخد منهم الدفتر ونزل بغضب
وهيه حضنت غنوه وبقت تبكي جامد
حكم نزل بالدفتر وشاور للرجاله طلعوا بره ضربوا نار علشان الناس تسمع
ونادى لنجاتي وقال.....اسمع هتعزم كل البلد طلع العربيات بالمكروفونات و ادعي كل البلد... فرح النايب نوح الحاكم على بنت عمو بكره بالليل الكل لازم يعرف الخبر فهمت
نجاتي هز راسه بالموافقه وطلع وهو بيبص لنوح بحزن مكانش عارف بالي حصل بس شكل نوح كان مزعله جدا
الماذون مشي والشهود كمان
نوح وقف وقرب منه وقال بتوتر .....بكره ....بكره طوالي يا عمي
بقلم...زهرة الربيع
عمو بصلو بسخريه وقال..... اه بكره ولا لسه عايز تدرس اخلاقها
نوح قال بتوتر ...انا قصدي يا عمي بكره قريب قوي خلينا نستنوا سند ونحاول نمهد له الموضوع او ...
حكم قاطعوا وقال بغضب.... سند في جميع الاحوال هيعرف بلاش تعمل نفسك قلبك عليه ...انت اللي عملت فيه كل ده..يشهد ربي انا كت هقنع البت وامها بيه وكنت هجوزها له ...اللي بيحصل له النهارده ده بسببك انت يا نوح انت وبس
نوح قال بسرعه وزعيق ... عظيم بيمين ما عملت حاجه يا عمي انا.
بس قطع كلامه بصدمه شديده لما دخل سند وقال بسعاده ..هو يوم واحد لكن اتوحشتك يا ود ابوي
وجري عليه زي الطفل الصغير حضنه بسعاده وهو مبسوط جدا
نوح كان واقف زي التمثال هو وعمو ومصدومين جدا لانهم فاكرينو هيجي بعد يومين
سند ميل على نوح وقال بسعاده ما تتوصفش.....عم جابر الماذون كان طالع من عندينا كنتو بتحددوا لنا معاد وياه صح...والله ووفيت بوعدك يا ود ابوي من اول ما دخلت و لقيتك واقف مع عمك كده عرفت انك كلمته قلت له صح حتى وانا وجاي كمان سمعت ضرب النار من عندنا ربنا يخليك ليا
نوح كان واقف مش بيرد ومتمني الارض تبلعه حرفيا مش قادر يبص له او يرد عليه
وسند كان في قمه السعاده وفاكر انهم كانو بيحددو معاد جوازه من شروق مع المأذون بص لعمو وحضنه وقال بسعاده ....والله يا عمي انا هساعدها وما هخليها تشكي لك مني واصل محدش هيحبها قدي من اساسه
عمو غمض عينيه بحزن شديد وبصلوا والدموع هتنزل من عيونه وقال ....سند يا ولدي الجواز قسمه ونصيب
وبص لنوح اللي بقى يهز راسو بالرفض بدموع بس اتنهد وقال بحزن شديد ...الماذون كان هنا لاننا كتبنا كتاب شروق بت عمك على نوح والدخله بكره
سند مبانش على ملامحه اي علامات دهشه او صدمه لان الكلام لسه ما استوعبهوش اصلا او زي ما يكون ما سمعوش بقى يبص لهم لدقايق بطريقه مش مفهومه بس اتسعت عنيه بزهول شديد لما بص لنوح وشاف دموعه على خده وهنا اخيرا استوعب الجمله اللي قالها عمو ووووو
زواج_لدقائق_معدوده
السابع
مين... مين كتب كتابه على مين.. انا ...ايه الجمله اللي سمعتها دي ها يا نوح بيقول ايه... قصده ايه
نوح حاول يرفع عينه او ينطق بحرف بس زي ما يكون لسانه اتربط مقدرش يتكلم ابدا
سند حس الارض بتدور بيه وهو كل شويه يتاكد ان اللي سمعه مظبوط مسكو من جلابيته بغضب وهو بيهزه وبيقول بزعيق شديد ....يا نوح ما تقعدش ساكت كده.. اتكلم يا ود ابوي قول حاجه.. قلبي هيوقف انطق
هنا نوح قال بالم شديد... انا اسف ...اسف قوي يا سند حقك على راسي يا ود ابويا لو قلعت جزمتك واديتني بيها دلوقتي مهزعلش منك
سند سابوا بزهول ورجع خطوات وهو بيقول بصدمه....لا لا لا انتو انتو بتضحكوا عليا صح ...مهصدقكمش اصلا ما هصدقكمش... انت وعدتني ...وانت كمان يا عمي انت كمان قولت لي شروق ليك يا سند.. ما تعملوش فيا كده انا محاملش الهزار ده ... انا هسال شروق... ايوه هسال شروق
وبقى يزعق بصوت عالي وقال ....شروق يا شرووووق
وجري ناحية السلم وهو مش شايف قدامه
عند شروق لطمت على خدودها اول ما سمعت صوته وقالت..يا مري ده سند شكله عرف.. ما هيسكتش واصل مهيسكتش
غنوه بصت لها باستغراب وقالت..و هو سند دخله ايه بيكم
شروق نزلت عيونها في الارض وقالت.... ما لوش دخل بس كان فاكر ان هو اللي هيتجوزني
غنوه قالت بزهول ..هو مرار راكب جرار خليكي هنا ما تطلعيش من الاوضه
ونزلت هي جري تشوف ايه اللي بيحصل
سند جري بسرعه كان هيطلع بس قبل ما يطلع عمو مسك ايده بغضب شديد وقال ....استنى هنه يا سند مش انا اللي بكلمك وبقول لك خلاص كل حاجه خلصت.. فوق لنفسك خلاص يا ولدي لا انت اول ولا اخر واحد مش من نصيبك يا ولدي مش من نصيبك خلاص
سند دفع ايده بغضب وقال بزعيق.... يعني ايه مش من نصيبي لا يا عمي لاه.. بتك نصيبي ومش نصيب اي راجل غيري محدش هياخدها مني هملنيي
وزعق باعلى صوته وقال ....يا شروووق
حكم اتنرفز جدا ومسكه من دراعاته بغضب وهو بيهزه بعنف وقال ....اتكتم خلاص فضحتنا لما انا هقول لك خلاص يبقى خلاص اخوك لازم يتجوزها ما عنديش حل تاني.. يا ريت كان عندي حل تاني يا ولدي يا ريت
سند بصله بصدمه واستغراب شديد وقال.. يعني ايه معندكش حل تاني ليه ...ايه اللي حصل في غيابي
حكم بص لنوح اللي هز راسه بالرفض بسرعه عيونه بتترجاه ما يقولش بس هو غمض عنيه واتنهد ونزل عيونه في الارض بحرج شديد وقال... نوح وشروق غلطو سوا...احم اخوك دخل عليها امبارح كان لازما ولابد يكتب عليها قبل ماحد يدرى
بقلم...زهرة الربيع
سند التفت لنوح بسرعه وذهول ميتوصفش
نوح بقى يبص له بدموع وقال بسرعه... احب على يدك تسمعني لو ليا خادر عنديك يا سند
بس سند بقى يرجع لورا وهو بيبصلو بصدمه ومش سامع اي صوت حواليه وفجاه وقع من طوله
غنوه كانت نازله و جريت عليه في اخر لحظه سندته ونزلت بيه على الارض وهو على رجلها وهي بتقول بزهول وخضه ...يا مري مالك يا ود الناس هاتوا دكتور ..دكتور بسرعه
سند بقى يبص لها بتوهان شديد وغاب عن الوعي بين ايديها عمو جري عليه وهو بيحاول يفوقه ونوح كان واقف مصدوم بيبص لهم وبس مش بيتحرك ولا بينطق
حليمه نزلت جري على السلم وهي بتصرخ باسمه وبقت تحاول تقوم فيه وهي بتقول.... يا مر يا ولدي يا حبيب قلب امك قولتولو ايه... عملتو فيه ايه منك لله يا نوح انت السبب يا حبيبي يا ولدي
نوح حس ان كلامها شق قلبه شق بقى يهز راس بعنف بالرفض وقعد على الكرسي بصدمه وهو مش مصدق ان هو السبب في الحاله اللي اخوه فيها دي و بقت تعدي الاحداث قدامه وهو شبه مش شايف حاجه ولا سامع
عمو اتصل بالدكتور والغفر اخذو اخوه على اوضته وكل حاجه بتمر قدامه ببطء و هو حتى مش قادر ينطق
غنوه بصت عليه بحزن وشفقه و قربت منه وقالت ....طالما ربنا عايز كده يبقى خير ..انت مهتبقاش ادرى منيه
نوح رفع عيونه ليها وبصلها لثواني بتوهان وقام وطلع على اوضته من غير ما ينطق
وهيه متابعاه بعيونها وقالت بحزن... لا حول ولا قوه الا بالله ...الراجل كان كيف الاسد باقي مقادرش يصلب طوله ...ما شاء الله عليكي يا غنوه المكان اللي تفوتي فيه تطربقيه على دماغ اصحابه فقريه مع مرتبة الشرف
ولسه هتمشي سمعت صوت بكاء التفتت وراها شافت حليمه قاعده على الارض حاطه ايديها على دماغها وبتبكي على الحاله اللي وصلت ابنها ليها بايديها
غنوه قربت منها وابتسمت
وطلعت وسابتها بتبص لطيفها بغضب
في الاوضه عند سند
عدى وقت كبير لحد ما قدر الدكتور يفوقه وبص لعمو وقال ...الحمد لله هو احسن دلوك والابره اللي اديتها له هتخليه يتحسن كمان
حكم بص له وقال بحزن.... شكرا يا دكتور ربنا يحسن ما بين اديك ونادى لنجاتي وقال.... روح وصل الدكتوره يا نجاتي وهات الروشته
نجاتي قال ... امرك يت حكم بيه ومشي مع الدكتور وفضل حكم مع سند اللي ما كانش بيرد ابدا وباص قدامه بشرود ودموعه متعلقه في عيونه رافضه النزول وشكله كان يوجع القلب قوي
حكم اتنهد لما شاف حالته قعد على السرير جنبه وقال... احنا لحالنا دلوك ما تضغطش على نفسك اكتر من كده .. ابكي يا سند الدموع مهيش ضعف واصل يا ولدي بالعكس الدموع لو فضلت جواتك بتخلق القسوه والقسوه هي اللي ضعف وقلة حيله يا ولدي
سند اتكلم بالعافيه وقال.. عملت فيا كده ليه ياعمي ليه تخلوني اخسر كل حاجه في يوم ..كيف..كيف هونت عليكم انتو الجوز
حكم قال بسرعه.... انت ولدي يا سند انا ربيتك على اديا بعد وفاه ابوك الله يرحمه... والله يا ولدي ما ليا صالح امبارح كان يوم مشؤوم يوجع القلب
ونزل عيونه بحرج شديد وقال....كان لازم اعمل كده قبل ما حد بره يشم خبر.
ولسه هيمشي سند قال بجمود.... انا كمان ما بقاش عندي اخوات مش عايز اسمع كلمه اخوك ده تاني
حكم بصله بسرعه وسند كمل بغل وقال....وحياة رقدتي دي وحرقة قلبي والامل اللي اداهوني واخدوا مني في غمضه عين ما هعديها له يا عمي و اللي بيني وبينه من النهارده نار مهتطفاش
حكم بصله بزهول وقال بسرعه..... لاه لاه يا ولدي انتو اخوات والاخوات ما تفرقهمش مره واصل... نوح غلط..غلط قوي بس ده ود ابوك وهو سندك في الدنيا و....
بس قاطعو بغضب وقال....انا سندي ربي وبس يا عمي والحديت ده خلصان ...بكره هرقص في فرح بت عمي وجوزها وانقطهم كمان انا اغلى واعز من اني افضل ابكي على مره بس من النهارده هو اللي هيفضل يبكي طول عمره على اللي عمله ده
حكم كان هيتكلم بس شاف الغضب في عيونه اللي بتشع نار اتنهد بياس وشاف ان ما فيش اي فايده يكلمه دلوقتي خرج من عنده وهو قلقان جدا بسبب كلامه
سند اتنهد وغمض عنيه ونزلت دموعه على خده مسحها بسرعه وحط ايده على قلبه بألم شديد وهو بيبص قدامه بغضب وغل اول مره يحس بيه
في صباح يوم جديد سند صحي من النوم بخنقه لما افتكر اللي حصل وقام خد شاور ولبس هدومه ولسه هيطلع جات عينه على السله وشاف فيها مفرش من بتوعه
واستغرب انو في السله مسكو باستغراب بس اتفاجئ لما لقى عليه دم و افتكر لما عمو قاله... لقيناهم في اوضتك
ضم ايديه بغضب شديد وحس بنار في قلبه حرفيا لمجرد التفكير ان نوح لمسها طلع بغضب شديد وبقى ينادي على الخدامه بزعيق وغضب رهيب
سماح جات بخوف وقالت.... نعمين يا سي سند
سند قال بغضب وزعيق ....انتي اللي نضفتي الاوضه امبارح
قالت بتوتر... ايوه.. ايوه انا
سند قال بغضب اشد....مرمتيش الزباله اللي جوه دي ليه... غوري فضيهم واغسلي الاوضه بحيطانها وطلعي المرتبه دي وهاتي اي مرتبه غيرها من الاوض الفاضيه سامعه
سماح انتفضت بخوف وقالت ..امرك..امرك
وجريت على الاوضه وهو لسه هيمشي شاف شروق طالعه من الاوضه كانت عايزه تروح لامها بس اول ما شافته رجعت تاني على اوضتها بس وقفها لما قال ....صباحيه مباركه يا بت العم ..معلش متاخره بس مكنتش موجود علشان اقولها لك
شروق اتوترت قوي لما عرفت انه عرف كل حاجه وبلعت ريقها بخوف وفضلت واقفه مكانها
سند قرب منها وقال بغضب .... ومبارك عليكي كمان جوازك من نوح حبيب القلب اللي كنتي متمنياه.. معارفش الصراحه ابارك لك على ايه ولا ايه
شروق حاولت تتكلم تقولو اي حاجه كان صعبان عليها جدا رغم كل ده نطقت بالعافيه وقالت ....انا عارفه انك زعلان بس يمكن ربنا حايش لك حاجه احسن و...
بس قاطعها لما قال بغضب.... اي حاجه هتكون احسن وانظف من اللي غدرت باهلها عشان تتجوز واحد مطايقهاش.
شروق بصت له بزهول وعيونها بيلمعو بالدموع وهو قرب وبص لعيونها بغضب وقال بوجع شديد.... هسالك سؤال واحد بس ...ليه في اوضتي وعلى فرشتي.. كنتي حاسه بايه وانتي بتعملي كده مجيتش على بالك واصل
شروق كانت ساكته ومنزله عيونها في الارض وهو زعق بغضب شديد وقال..ردي ما تسكتيش كده
شروق انتفضت بخوف ودموعها بقت تنزل بغزاره ولسه هترد خرج نوح من الاوضه واول ما شافته جريت دخلت اوضتها بسرعه وكسوف ما كانتش قادره تواجهه ابدا
سند اول ما شافه ابتسم بسخريه وقال ....شكلها عروستك لسه بتتكسف منك... غريبه يعني لسه فيه كسوف بينكم
نوح اتنهد وقال بحزن ....انت عامل ايه دلوك
سند ضحك بسخريه وقال..... لا يا ود ابوي متقوليش بتطمن علي.. حلوه قوي دي... على العموم انا بقيت زين قوي ما تخافش ولا عشره زيك ولا زيها يرقدوني اكتر من ليله
وقرب منه وبص لعيونه بتحدي شديد وقال بغضب... سألتها سؤال بس ملحقتش تجاوب عليه.... ليه كنتو في اوضتي يا نوح للدرجه دي انا مفارقلكش واصل
وقبل ما يرد سند قال بسرعه وسخريه .... انا بقول ايه اصلا هو انا لو كنت فارقلك كنت عملت كده من اساسه
نوح قال بسرعه..... ورحمه ابوي انت فاهم الموضوع كله غلط وانا لو عارف كيف ده حصل كنت هشرح لك واقول لك و...
بس قاطعه لما قال بغضب شديد..... لا لا لا ما تشرحش حاجه من هنا ورايح اسمع وبس كفاياك شرح ....بعد ماوعدتني انك هتجوزهالي واجي الاقيك انت اللي متجوزها ما عادش في حاجه تتقال ولا هصدقك تاني يا نوح... العبيط خلاص فاقلك يا ود ابوي من النهارده الراس بالراس والعين بالعين وكل اللي كنت فايتهولك بمزاجي هاخده منك الطاق طاقين..و استنى مني نقوطك الليله وهديه فرحك
و مشي وسابه واقف بتوتر من الغضب اللي في عيونه ومن كلامه الغريب
بالليل كانت الاضويه في كل مكان والعشا نازل للبلد كلها وضرب النار في كل مكان والزغاريد
متابعة القراءة
