رواية مسك و آسر الراوي زي النهاردة كاملة جميع الفصول بقلم ايمان

النت كان فاصل في كل مكان في القاهره بسبب حريقه ضخمه!
كنت واقفه في البلكونة بتفرج علي الشارع بكل ملل وانا بسأل نفسي ياتري الحياه من قبل الانترنت كانت عامله ازاي!
هل كانت حلوه زي ما بنسمع من الناس الكبيرة هل كانت دافيه ومليانه ونس وحكايات مبتنتهيش غير وقت النوم
طب الحب! 
ياتري الحب كان عامل ازاى وقتها
يعني ازاي كان في تواصل بين اي اتنين بيحبوا بعض 
هل كانت الرسائل اللي بخط الأيد كافيه تعبر عن مشاعرهم طب ازاي كانوا قادرين ميسمعوش صوت بعض ولا يشوفوا بعض بالايام والشهور
_حبيبة بابا بتعمل ايه
سألني بابا وهو بيدخل البلكونه وفجأه وبيحط أيده علي كتفي..
اتنهدت وانا بهز اكتافي بملل
_ولا حاجة بتفرج علي الشارع
_بس!
هزيت راسي
بحيرة وانا لسه ببص علي الناس
_بصراحة بسأل نفسي الحياه من قبل اختراع الانترنت كانت عامله ازاي اكيد ممله يا بابا مش كده!
بص هو كمان للشارع ورد بأبتسامة هادية
_كانت حقيقية
رفعت راسي وانا بسأله بأستغراب
_يعني ايه
اخد نفس عميق و رد و هو بيبتسم بحنين
_يعني كانت كل حاجة حقيقية مش مزيفة زي دلوقتي
الناس كانت أقرب لبعض الزيارات مكانتش بتخلص
المشاعر كانت حقيقيه الاطفال كانت بريئة المراهقين كانوا بيضيعوا وقتهم في حاجات مفيدة زي حفظ القرآن زي القراءة زي الكتابة الشباب كانوا اقرب لربنا كانوا رجاله و قد كلمتهم و مسؤولين البنات كانوا كل همهم ازاي يتعلموا و يتجوزوا شاب محترم اقرب لربنا و يبنوا بيت دافئ و يخلفوا ذرية صالحة الناس الكبيره كانت تتجمع كل اجازه في الحاره و لا علي القهوه
و يقعدوا يحكوا و يضحكوا للصبح كل حاجه كانت جميله وحقيقيه يا مسك انما دلوقتي بسبب النت و بالرغم من انك قادره تتواصلي مع اي حد و في اي مكان إلا أننا في عزله

حقيقيه عزلتنا عن بعض
اخدت نفس عميق و انا ببص قدامي و بفكر في كلامه كان منطقي تماما فعلا كان عنده حق لما قال بالرغم من انفتاح العالم و بالرغم من قدرتنا علي التواصل مع أي شخص في أي وقت وفي أي مكان إلا أننا في عزله حقيقيه عن اقرب الناس لينا واكبر دليل أن كل شخص في كل اسرة قاعد ماسك تلفونه بيتواصل مع ناس بعيده ليل نهار و منعزل عن اقرب الناس حواليه!
الباب خبط راح بابا يفتحه وانا رجعت لشرودي مرة تانيه
_في حد باعت جواب في البريد ليكي
قالها بابا و هو بيدخل و بيقلب الجواب بين أيديه بدهشة وفضول وفي أيده الثانية بوكيه ورد
لفيت و رديت بأستغراب
_ليا أنا
هز رأسه ومدلي أيده بالجواب كان محطوط جوا ظرف بيج وملفوف حواليه فيونكة شكلها رقيق ويجنن
استنتجت وقتها من مين لما شميت رايحه البرفيوم اللي مرشوشة عليه
فتحتها بأيد بتترعش وبدأت اقرأ الرساله
ملقتش افضل من كدة فرصه علشان اكتبلك بخط ايدي عيوني وقلبي ومشاعري وايدي اللي بتترعش وانا بكتبلك كلهم يشهدوا عن مدي الحب وعن مدي الندم وعن مدي الاشتياق عارف اني ضيعتك من ايدي وعارف أن مستحيل اي اعتذار يكفر عن وجعك وعن مدي الآذي اللي سببتهولك انا لسه فاكر فاكر كل لحظه كل لمسه كل مرة شوفتك فيها كل مرة ضحكتيلي وكل مرة قولتيلي فيها بحبك فاكر ومش هنسي ولا الايام قادرة تنسيني ولا الأشخاص قادرين يعوضوا وجودك وتأثيرك في حياتي
مش عارف ازاي قدرت اتخلي عنك في اكتر وقت كنت محتاجة وجودي ازاي قلبي طاوعني اسيبك تتوجعي لوحدك تروحي جلسات الكيماوي بطولك تعيشي مأساة أنت
مش قدها لوحدك ازاي نسيت انك بتخافي بتخافي من كل حاجه بتخافي الوحدة بتخافي الخذلان بتخافي الفقد بتخافي حتي من الحقنة اللي اي عيل صغير ميخافش منها بس أنت علشان بريئه ورقيقه بتخافي من كل حاجة وما صدقتي وجودي في حياتك يقويكي علي الدنيا انا اسف من كل قلبي انا اسف اني اتخليت عنك في لحظه ضعف انت مكنتيش تستاهلي شخص اناني زي شخص جبان انت تستاهلي حد يفضلك سندك ويقويكي ويحميكي ويواجه معاكي كل الظروف ربنا يوفقك ويعوضك ويشفيكي وعموما لو فكرتي تسامحيني هتلاقيني موجود هفضل مستنيكي لحد ما نرجع في الدنيا او يجمعنا سوا في الآخرة
_مين اللي باعت الجواب يا مسك!
سألني بابا فرفعت عيوني ورديت وانا بقطعه مليون حتة بكل جمود هدوء وثبات
_معرفش غالبا الراجل غلطان في العنوان
رميته من البلكونه ورميت البوكيه وراه
بعدها اخدت نفس عميق ودخلت اوضتي من غير ولا حرف
يمكن كانت الرسالة دي لو جاتلي من شهر بس كنت ممكن اسامح!
لكن النهارده!
النهارده انا انسانه تانيه خالص 
مستحيل افكر 
اسامح مين 
اسامحه ازاي
اسامحه ليه
ازاي يأذيني يوجعني يتخلي عني ويموتني بالبطئ ويرجع ندمان مهزوم مكسور بيتمني السماح!!
طلب جرئ وقح بجح
أيا كانت مسمياته
لكنه في النهايه مستحيل 
تمت السيطره علي الحريق الضخم وعودة الانترنت في جميع الانحاء 
في نفس اليوم بليل رجع النت ورجعت الحياه لطبيعتها ورجعنا للعزله من تاني
الفون بتاعي رن برقم غريب 
فتحته ورديت
الو السلام عليكم ورحمه الله
رد الطرف التاني ببحة رجولية خشنة ممزوجة بتوتر
_وعليكم السلام ورحمه الله انسة مسك معايا 
رديت بأستغراب
_ايوة مع حضرتك اتفضل!
_معاكي المقدم آسر الراوي
ضميت حواجبي في بعض ورديت بأستغراب
اتفضل حضرتك
_احم ا انا عايز اخطبك
يخربيتك محدش يقول لحد كده هتجلطني
قالها حد من جنبه بهمس فرفعت حاجبي ورديت
_افندم انت تعرفني
_ اه ش شوفتك في الكليه كتير
رديت بسخرية
_وحضرتك اي حد معدي كده في الشارع تروح تخطبه حتي لو متعرفوش!
همس الشخص اللي جنبه في ودنه
قولها حسيتك مختلفه
رد هو بدون وعي
_حسيتك متخلفة
_متخلفة!!
يامررررراري عليا النعمه ما حد متخلف زيك حد يلحقني قبل ما اتجللللط
_ااحم مختلفه اقصد انك مختلفه عن اي بنت يعني و و.....
مسبتلهوش فرصه يكمل كلامه وقفلت السكة في وشه وانا برطن بضيق
_هي ناقصاك انت كمان ايه البلاوي دي
رن مرة تانيه كنسلت فرن تاني
_يوووووه بقي ايه الملل ده
حظرته وحطيت الفون جنبي وبدأت اغمض عيوني بتعب
جالي اشعار أن في ماسدج علي الواتساب 
طنشتها الحقيقه ولسه هغمض عيوني مره تانيه جالي اتصال!
بصيت علي الشخص الرزل اللي بيرن
دلوقتي لاقيته هو بعد ما حظرته علي المكالمات بيرن واتس
_لااااااا ده أنت تنح بقي
لسه هجيب قائمة الحظر لاقيته باعتلي ماسدج
_ياستي استني بقي عايز اقولك حاجه
نفخت بضيق ورديت عليه
_اتفضل أنجز 
_انجز علي فكره انا عمر ما حد كلمني بالطريقة دي قبل كده
_هتقول انت عايز ايه ولا ارزعك واحد بلوك!
_بغض النظر عن اسلوبك اللي زي الطين ده بس انا زي ما قولتلك عايز اخطبك
_تخطبني ايه يابني آدم انا اعرفك اصلا!!
_ياستي وماله نتعرف 
_ليه شايفني مراهقة قدامك
_هو التعرف للمراهقين بس!
_لا مضيعة للوقت الحقيقه
_ليه محسساني انك وزيرة البيئه ما تضيعي وقت اهو يضيع في حاجة مفيدة بدل مانتي عمالة تصيحي علي الفيس والانتستا وكل مكان انك حاسه بملل
_انت مراقبني بقي!
_عايزه الحق
_اشجيني
_مراقبك اه ومعجب بيكي وعايز فرصة نتعرف 
_النمرة غلط يا عماد مبتعرفش علي حد من غير علم اهلي 
_وماله نعرف اهلك
_تعرفهم ايه 
_اني عايز اتعرف عليكي
وأنت تتعرفي عليا ولو في نصيب نتجوز
رديت بسخرية
_نتجوز مرة واحده انت طموح اوي!!
_طب روحي نامي شكلك مچنونة دلوقتي انا
هجيب رقم والدك وهكلمه بلا خوتة دماغ روح اتخمدي
قالها وعملي بلوك