رواية عمر وحبيبة جميع الفصول كاملة سيد القمر الاسود بقلم زينب مصطفى
رواية سيد القمر الاسود
تحركت حبيبة بتعب بعد أن انهت عملها بإحدى محلات ملابس المحجبات في احدى المولات الشهيرة وهي تنظر إلى ساعة يدها التي تشير إلى الحادية عشر مساء
تنهدت بضيق و هي تغلق المحل لتلفتت إليها زميلتها بالعمل التي تساعدها في غلقه قائلة بجدية
مالك يا حبيبة في ايه.!
قالت حبيبة بضيق
إتأخرت يا منال .. إتأخرت وعلى اما اوصل البيت هتكون الساعه عدت 12 وصاحبة البيت هتسمعني مرشح عن الأدب والأخلاق و ان المفروض الواحدة المحترمة متتأخرش برا البيت لوقت متأخر كده وطبعا هتقعد تهدد انها تطردني برا البيت وترميني في الشارع انا خلاص اعصابي مبقتش متحملة ..
منال بهدوء وهي تتوجه مع حبيبة
الى الباب الخلفي
معلش يا حبيبة ان شاء ربنا هيرزقك بابن الحلال اللي هيريحك من الهم ده كله و بكرة تقولي منال قالت
حبيبة بحسرة
وده هايجي ازاي و اي واحد يعرف ان انا متربية في ملجأ بعد ما عمي رماني فيه بعد ابويا وامي ما ماتوا بيهرب ومبيرجعش تاني
ربتت منال على كتفها بتعاطف
ولا يهمك اكيد ربنا شايلك الاحسن بس خلي املك في ربنا كبير
حبيبه بابتسامة مرتعشة
ونعم بالله .. يووه كفاية كلام و يلا بينا علشان منتأخرش
ثم قامت بالتخلص من الحذاء ذو الكعب المرتفع الذي يكاد
ايوه كده .. يا ساتر اخيرا .. رجليا كانت هتموتني ربنا يتوب عليا بقى
ثم ودعت صديقتها وهي تتوجه سريعا نحو الدرج الكهربائي في طريقها إلى الخارج عندما استوقفها صوت رنين هاتفها القديم
عقدت حاجبيها بتعب وهي تنظر لشاشة هاتفها الذي ظهر عليه اسم شريف ابن عمها والذي تعده بمثابة شقيقها فهو و على الرغم من معاملة والدته السيئة والقاسية معها ورفضها ان تقيم معها واجبار زوجها الراحل على وضعها في ملجأ للأيتام فهو كان على عكسها تماما كان يعامله بود وحنان ..
تنهدت بتعب وهي تقوم بالرد عليه بمرح
ايوه يا اسم على غير مسمى .. عاوز ايه !!
وقبل ماتتكلم انا لسه مقبضتش وممعييش فلوس وقدامي يومين على أما أقب..
الا أن شريف قاطعها وهو يهمس بصوت جاد لم تعتاد عليه منه
حبيبة اسمعيني كويس عشان مفيش قدامي وقت .. انا عاوزك لو جرالي حاجه تاخدي بالك من ماما ومهما حصل متسيبهاش لوحدها
ليكمل وهو يتنهد بتعب
انا عارف ان ماما كانت قاسية عليكي وبتعاملك وحش بس علشان خاطري وخاطر بابا الله يرحمه تاخدي بالك منها في غيابي
حبيبة بتوجس وهي تشعر بإنقباض قلبها بخوف
في ايه
صاح شريف بغضب شديد
انا رايح دلوقتي للكلب الي عاوز ياخد حبيبتي مني ويتجوزها غصب عنها هخلص عليه وهعرفه ان مش كل حاجه يقدر يشتريها بفلوسه وان برصاصة واحدة تمنها ملاليم هنهي حياته وكل ملايينه ونفوذه مش هينفعوه.
هتفت حبيبة برعب
يا نهارك اسود عاوز تقتل وتودي نفسك في داهية .. تموت مين ورصاص ايه اللي بتتكلم عنه !!
ثم تابعت بارتعاش وهي تجري بإتجاه الطريق العام تحاول ايقاف سيارة توصلها لمكانه الذي مازالت تجهله
انت فين يا شريف وغلاوة امك عندك تقول انت فين!
صاح شريف بغضب
مش مهم انا فين المهم انا هاخد حقي وبعد اللي عمله فيا امبارح هقتله ومحدش هيقدر يمنعني وعمري قصاد عمره.
إبتلعت حبيبة ريقها قائلة بخوف
قتل ايه يا شريف اللي بتتكلم عنه انت اتجننت وبعدين مش انا كلمتك امبارح وقلت انك كويس وبايت عند واحد صاحبك.
شريف بغضب وكراهية
انا قلت كده بس علشان أمي متشوفنيش وانا مضروب و كرامتي متبهدلة .. بس انا هاخد بتاري منه و هرد كرامتي اللي داسها في التراب
حبيبة بإرتجاف
مين ده اللي ضربك وبهدلك وعاوز تنتقم منه
انت بتتكلم عن مين .. انا مش فاهمه حاجه..!!
شريف بغضب
بتكلم عن الكلب اللي اسمه عمر الرشيدي
حبيبة بتوتر
عمر الرشيدي مين ..!! ده صاحبك والا حد بتشتغل معاه.!
ثم شهقت برعب واستيعاب
اوعى يكون قصدك عمر الرشيدي بتاع مصانع الحديد والصلب..صاحب المصانع اللي انت شغال فيها !!
شريف بكراهية شديدة
ايوة هو .. اللي فاكر انه ملك الدنيا كلها بماله ونفوذه و اللي نهايته هتكون النهاردة على ايدي
نظرت حبيبة حولها برعب وهي لا تستوعب طريقته الغريبة في الحديث لتصيح برعب
انا مش فاهمة حاجة واحد زي ده هيأذيك ليه ايه اللي هيخليه يعمل كده وايه اللي عرفه بيك أساسا دا انت واحد شغال من الالفات اللي شغالين عنده
شريف بغضب
بعد ماعرف علاقتي ب مي طردني من شغلي وخلى رجالته يرموني برا الشركة وخلاهم يمشوا ورايا و يرقبوني ومن غير ما أحس وفجأة
ليتابع بغضب شديد
لقيت نفسي متكتف ومرمي في جراج قديم
وهو واقف قدامي بكل جبروت
يتهمني اني بطارد خطيبته وبفرض نفسي عليها ولما قلتله اننا بنحب بعض .. ضحك بسخرية وهو بيعايرني بفقري وابتدى يضرب فيا وهو بيقول
دا جزات اللي يبص لحاجه ملك عمر الرشيدي
لحد ما اغمى عليا ومحستش بنفسي إلا وانا مرمي في الشارع .. ومكتفاش بكده لا دا منعها انها تكلمني وخلاها تغير نمرة تليفونها
