رواية بيدى لا بيد عمرو (الفصل 21 : الفصل 25 ) بقلم رانيا الطنوبي

لله كلهم في بيوتهم وكويسين وعلاء
لسه جايب مراته من شوية
عمرو وقد اتجه لصعود هي كانت تعبانة ولا كان مزعلها
مديحة والله يا ابني ما اعرف انت عارفني الاحسن مشاكلكم تفضل في بيوتكم اطلع انت بقي شكلك تعبان تصبح علي خير
اكمل الصعود وانتي من اهله
تزامن رنين الهاتف مع فتح عمرو لباب الشقة اتجهت شيرين للرد دون ان تلاحظ وقوف عمرو عند الباب ليسمع عمرو رد شيرين امامه علي المكالمة
شيرين باستغراب وهي تنظر الي الساعة الو سلام عليكم
اقترب عمرو باستغراب دون ان تلاحظه ليجدها بكثير من القلق والخوف ردت انت تاني انا مش سبق وقولتك 
وقف عمرو قريبا منها وبدأ يلاحظ عصبيتها لكنه يريد ان يسمع ردها حتي لا يزيد بداخله الشك لترد شيرين لا مش فاهمة اسمع انا مش خايفة منك عايزك تعرف انك متقدرش تهددني بحاجة واللي عندك اعمله
شعر عمرو بالقلق ووقف خلفها مباشرا فاكملت شيرين بخوف انت مراقبني بقي
عند هذه اللحظة التفتت علي يد عمرو التي امتدت لتسحب السماعة ووضع السماعة علي اذنه ليسمع رد المتصل لا بلاش المسميات دي ليه متقوليش اني مهتم بامرك ليه متقوليش اني بخاف عليكي ليه متقوليش اني حاسس قد ايه انتي محتاجلي محتاجة لراجل يكون جانبك بدل عمرو بكل تصرفاته الخيبة عمرو اللي فاكر نفسه لسه مراهق و رايح يحب بنت في سن ولاده تحبي تعرفي هي مين
اشتعل عمرو غضبا وهو لا يعرف من هذا الشخص انه لا يعرف الصوت من الذي يتصل بزوجته ويقول عنه ما يقول لم يرد عمرو فاكمل اوعي تلومني ان بافتح عنيكي وعايزك تشوفي الحقيقة شيرين شيرين
بملئ غضبه خرج صوته هادرا انت مين يا حيوان يا زبالة انت مين
لم يسمع عمرو اي رد لم يسمع سوي صوت غلق السماعة ثم صوت انقطاع الخط
ببالغ عصبيته وضع عمرو السماعة والتفت الي شيرين نظر بحدة وخرج صوته مرتفعا ممكن اعرف مين ده
حاولت شيرين ان تبدو هادئة وردت معرفش
جذبها من كلتا ذراعيها اليه و زادت حدة نظراته باقولك مين ده يا شيرين انطقي
شيرين بحدة امامه اقولتلك معرفش
ابعدت يده عنها وتوجهت الي غرفة النوم زاد تصرفها من غضب عمرو فاندفع خلفها واغلق باب الغرفة خلفه ثم جذبها مرة اخري لتقف امامه وسأل دي اول مرة يتصل بيكي فيها
رفعت شيرين رأسها ونظرت في عينه لا
صمتت ثم اتبعت دي مش اول مرة يتصل
لازالت شيرين بين يدي عمرو ولازال عمرو علي غيظه وهو يرد ازاي مش اول مرة يتصل وانتي مش عارفة مين ده
حاول ان يتماسك واعاد السؤال لاخر مرة يا شيرين باقولك مين ده
شيرين بعصبية اقولتلك معرفش معرفش معرفش
ثم هدأت انا معرفش مين اللي بيتصل يا عمرو والمكالمات دي بتيجي من يوم ما حضرتك عرفت زيزي بيتصل بيا عشان يحكلي اللي بيحصل في العيادة والحجة طبعا انه خايف عليا وطلب يقابلني اكتر من مرة وانا اللي رفضت و من مدة زقعت معاه وطلبت منه انه ميتصلش وفعلا قاعد مدة ميتصلش وانا نسيت الموضوع لحد ما اتصل انهاردة
عمرو بحدة طب انتي قولتيله انتي مراقبني ليه هو قالك ايه ساعتها
شيرين بضيق قالي علي مقابلتي لصاحبتي يوم الاتنين اللي فات بس معرفش هو رد قال ايه بعدها لانك اخدت السماعة
جلس عمرو علي طرف السرير ووضع وجهه بين كفيه يفكر في كلامها ثم رفع وجهه ثم رد طب وطول الفترة دي ممكن اعرف كان بيقولك ايه
شيرين بهدوء مكنش بيقول اكتر من اللي انا عارفها
قام من مكانه ووقف امامها و نظر باستغراب قصدك ايه
شيرين وقد اتجهت هي للجلوس قصدي اني كنت حاسة بكل حاجة من قبل ما اعرف كنت حاسة بتغيرك ومعاملتك كنت حاسة بتأخيرك في العيادة كنت عارفة ان الرقم المتسجل باسم الدكتور خالد يبقي واحدة ست
كل حاجة يا عمرو كل حاجة تحب تعرف
ثم قامت لتواجهه ووقفت وجها لوجه تحب تعرف يا عمرو لو تحب انا حاقولك
نظرت بعينه واكملت تحب اقولك عن ورقة الجواز اللي باسم زينات تحب اقولك زيزي جاتلك كام مرة لحد دلوقتي
زاد صوتها حادة وامتزج بدموع عيناها وهي تكمل بألم تحب اقولك كل مرة كانت بتلبس ايه تحب اقولك سافرت معاك كام مرة تحب اقولك ايه تاني يا كبير عيلة السيوفي عايز تسمع ايه يا عمرو وانا اسمعك عايز تعرف ايه وانا اعرفك
عادت تجلس مرة اخري علي السرير وهي لا تعرف ما الذي دفعها لتلك المواجهة قد تكون اخطأت ولكنها بشر لم تفكر بعقلها وانفجرت امام اول فرصة سنحت لها
تنفست بقوة وكأن جبل تمت ازاحته من فوق صدرها واكملت سنتين سنتين ونص وانا اقول يمكن يفهم اني فاهمة يمكن يحس
ثم ابتسمت بسخرية لكن حتحس ازاي وحتحس بايه
قاطعها عمرو بضيق وليه مقولتليش ليه مقولتليش علي المكلمات دي
التفتت بسخرية اكبر اقولك اقولك علي ايه اقولك ان تفاصيل علاقتك الخاصة عندي اول باول اقولك انك عرضت بيتك ومراتك للحرام وربنا وحده اللي يعلم حتخلص علي ايه كنت حتبرربايه يا دكتور عمرو
تحرك عمرو ووقف امامها بعند انا مخنتكيش يا شيرين انا اتجوزت وانتي بنفسك قولتي انك عارفة ان في ورقة جواز 
رفعت شيرين رأسها وابتسمت حتت الورقة ديه معتبرها جواز يا عمرو يعني انت تقبل تخلي علا تدخل بيت كريم وتعيش معاه بورقة زي دي
عمرو بحدة الظروف مختلفة انا كان عندي ظروف تمنعني من ان الجواز يكون رسمي
شيرين بحدة انت بتبرر ايه يا عمرو الورقة دي عمرها ما كانت جواز ولا تعتبر كده
ثم وقفت يا اخي اعترف مرة واحدة باخطائك انت بتضحك علي نفسك ولا بتضحك علي ربك يا دكتور عمرو
عمرو بغيظ وقد امسك ذراعها انتي اخر واحدة تتكلم عن الاخطاء انتي السبب في كل ده انتي اللي اهملتني و اهملتي نفسك لحد ما اضطرتني اعمل كده لو كنتي افتكرتي ان ليك زوج مكنش ده بقي حالي لكن انتي عمرك ما فكرتي ابدا فيا عمرك ما فكرتي في اللي انا عايزه منك ابدا و اوعي تقوليلي ليه ما قولتليش انا ياما لفت نظرك من يوم موت عمي الله يرحمه وانتي مفيش فايدة فيكي كنتي بتلبسي اسود عليه حتي وانتي نايمة جانبي كل مرة كنت باسافر اي مؤتمر اطلب منك تيجي معايا كنتي بطلعيلي الف حجة حتي حقي كنتي دايما تتحجي باي حجة حياتي معاكي كان كلها احباط وغم مكنتش شايف قدامي غير ست بتعشق النكد ودايما عايشة دور الضحية فوقي بقي
تنهد بغيظ ثم اكمل دلوقتي افتكرتي تصبغي شعرك وتلبسي في البيت هدوم عدلة بدل الجلاليب العرة اللي كنتي فضحاني بيهم بعد ايه يا شيرين بعد ايه
تنفست شيرين و قررت ان ترد هي دي بقي حجتك يا عمرو ان انا اهملت وانت كنت الضحية لا يا عمرو انت اهملت قبل ما انا اهمل انت كل تفكيرك كان محصور في شغلك ونجاحك وحياتك العملية وبس مكنتش بتيجي البيت الا عشان تاكل وتنام وبس
لما انت عايز زوجة تحسسك انك زوج انت كنت فين كأب انا اللي كنت الام والاب و حضرتك ملتفت لشغلك نجاحك ده انا عملتوا معاك يا عمرو عملتوا وانا باوفرلك وقت تقدر تشتغل وابقي انا مكانك في البيت و مدراس الولاد وانا باجري لولادك في كل مشوار وانت حتي مش بتسألهم اخدتوا ايه انهاردة ولا حياتكم فيها ايه ولا مين اصحابكم جاي في الاخر تفتح عيادتك للحرام وعايزني اتعاطف معاكم ولا اصقفلك لا يا عمرو فوق فوق لان اللي انت بتعملوا ده احنا اللي حندفع تمنه فكر فيا و في بناتك وفي اخواتك فكر و فوق فكر وفوق يا عمرو
صباح الاربعاء
استيقظ علي فلم يجد بجواره ميار كما اعتاد التفت الي الساعة فوحدها الثامنة صباحا لقد تأخر عن عمله نزل من سريره بقلق و هو ينادي ميار ميورة
نظر في الشقة فلم يجد احد فتوجه الي المطبخ و هو لايزال ينادي ميار ميار
الي ان وجدها مغشيا عليها ارضا جري نحوها مفزوعا بخوف ميار ميار ردي عليا يا ميار
ولكنه لم يجد اجابة حملها بين يديه ووضعها علي السرير ثم جري باتجاه التسريحة باحثا عن زجاجة عطر عاد الي ميار وهو يمسح بيده المملوءة بالعطر حول انفها يهز وجهها بين يديه و لكنها لم تستفق بعد
اتجه جاريا بعد ما ترك باب شقته مفتوحا باتجه شقة عمرو واخذ يطرق الباب بصوت بدي مسموعا للجميع وهو ينادي يا عمرو يا عمرو
جري عمرو علي الصوت وشعر انه هناك امر جلل يطرق الباب من اجله هكذا فتح الباب ليجد امامه علي يبدو علي وجهه القلق فيسأل بانزعاج مالك يا علي في ايه يا ابني ع الصبح
علي بتوتر ميار يا عمرو
ثم ابتلع ريقه واكمل ميار مغمي عليها ومش عارف افوقها
التفت عمرو ليتجه الي غرفة مكتبه ساحبا حقيبته ثم نظر لشيرين انا نازل مع علي
شيرين بقلق في ايه يا عمرو
عمرو وهو يخرج ميار تعبانة
جاريا علي السلالم استوقفته ريم بقلق صباح الخير يا علي في حاجة
التفت علي متوترا ابدا يا ريم ميار مغمي عليها
ثم نظر الي عمرو تعالي يا عمرو
دخلت ريم الي شقتها والتفتت لعلاء انا رايحة اشوف ميار علي بيقول تعبانة
فتحت باب شقتها لتجد شيرين تتوجه للدخول الي شقة ميار نظرت ريم الي شيرين و نظرت شيرين لريم
شيرين صباح الخير يا ريم
ريم صباح النور
صعدت علا خلفهم بقلق صباح الخير يا جماعة
ردوا صباح النور يا علا
علا بقلق خير في ايه ع الصبح
شيرين مش عارفة علي طلع قال لعمرو ميار تعبانة ومغمي عليها
ريم بقلق يكون الحمل حصله حاجة
شيرين ربنا يستر دلوقتي عمرو يطمينا
لحظات وخرج عمرو وعلي من الغرفة وقد بدي علي عمرو التوتر
عمرو للجميع هي ضغطها واطي شوية
علي بقلق طب نروح بيها مستشفي ولا ايه
عمرو محاولا التهدئة لا يا علي
اخرج ورقة من جيبه وكتب عليها ثم نظر لعلي هات الحقنة دي وعلا ممكن تديهلها وهي حتبقي كويسة
توجه عمرو للخروج فاستوقفه علي عمرو بجد ميار مالها
استوقف قلقه الثلاثة المتابعين في صمت علا وريم وشيرين استوقفهم حب علي لميار و لم يفكروا بما فعلت ميار لكسب هذا الحب
عمرو وهو يضع يده علي كتف علي يا ابني مفيش حاجة مراتك كويسة بس ضغطها واطي وبعدين اهي فاقت وانا اطمنت عليها وطمنتك
خرج عمرو فالتفتت شيرين لعلي ربنا يطمنك عليها يا علي ان شاء الله تبقي كويسة
علا لعلي طب يلا هات الحقنة واحنا معاها
اتجه الثلاثة الي غرفة ميار بينما اسرع علي الي اقرب صيدلية في غرفة ميار نظر الثلاثة الي ميار
شيرين الف سلامة عليكي يا ميار مش تخلي بالك من نفسك يا بنتي
ميار وقد بدأت تبكي ان شاء الله يا ابلة
علا وهي تجلس بجوار ميار ايه يا بنتي انتي بتعيطي ليه بس مش كفاية الرعب اللي عملته ع الصبح يا ميورة
ريم مبتسمة وهي تمسح علي يدها دخلنا في اكتئاب الحوامل بقي معلش يا ميورة كله بيعدي
طرق علي باب الغرفة ثم نظر لعلا خدي يا لولو
علا طب ماشي يا علي بس فين القطن والسبرتو
ميار لعلي في الحمام يا علي
شيرين طب انا حاطلع عايزين حاجة
ريم وانا كمان عايزة حاجة يا ميورة
ميار بوهن لا شكرا
خرج من الغرفة شيرين وريم وعلي ثم دخلت علا ثم خرجت شيرين لتصعد باتجه شقتها وريم امام باب الشقة
شيرين لريم ريم انتي كويسة
ريم باستغراب ايوة يا ابلة ليه في حاجة
شيرين بتردد لا بس كنت عايزة اطمن عليكي
ابتسمت ريم وردت متقلقيش يا ابلة انا كويسة
امام كافتيريا الكلية اقتربت لتسلم صباح الخير يا مطنشانا
داليا مبتسمة وهي تصافح صباح النور يا حبي معلش كنت مشغولة شوية
سهي امال حبيب القلب مجاش انهاردة ولا ايه
داليا ساخرة قصدك كريم لا كريم انهاردة وبكرة اجازة اصله مشغول علي اخره فرحه قرب
تعالات ضحكات الاثنين ثم ردت سهي وانتي ناوية تسيبي الفرح يعدي كده علي خير
داليا عيب يا بنتي انتي تعرفي عني كده بردوا تعالي معايا
اتجهوا الاثنين الي سيارة داليا فتحوها وركبوا الاثنين مدت داليا يدها وسحبت كيس هدايا وقالت لسهي ايه رأيك
نظرت سهي لكيس الهدايا وردت ايه ده
داليا ساخرة دي تبقي هديتي لكريم وناوية اسلمها له يوم فرحه
سهي باستغراب فيها ايه الهدية دي اوعي يكون متفجرات
داليا بضحك تقدري تقولي حاجة زي كده انا فعلا ناوية افجر الفرح
علا رنين الهاتف فاتجه للرد سلام عليكم
مي وعليكم السلام ازيك يا بشمهندس علي
علي بضيق اهلا يا بشمهندسة خير
مي بانزعاج من لهجته خير يا استاذ علي انا بس كنت عايزة اطمن عليك انت مش جاي انهاردة
علي لا يا بشمهندسة اصل المدام عندي تعبانة شوية اكمنها حامل وكده فمش حاقدر اجي حضرتك كنتي عايزة حاجة
مي بضيق لا ابدا الف سلامة عليها عموما انا كنت باطمن علي حضرتك مع السلامة
علي مع السلامة
التفت ليجد ميار قد قامت من سريرها ايه اللي قومك يا ميار
ميار الموضوع مش مستاهل كل ده يا علي انا اصلا بقيت كويسة
اقترب منها علي واحتضانها بجد خضتني يا بنت الايه حتة خضة
ميار وهي تبكي معلش يا علي بجد اسفة
علي باستغراب مالك بس يا ميورة انتي اتحسدتي ولا ايه
ميار وهي تمسح دموعها لا بقيت كويسة
علي وهو يمسح وجهها بكفه مالك بس يا ميار حاسة انك تعبانة نروح للدكتورة
ميار وهي تحاول الهدوء لا خلاص يا علي بقيت كويسة صدقني بجد بقيت كويسة
علي مازحا طب روحي ارتاحي وانا حاحضر الفطار انهاردة بس اي خساير في الارواح انا مش مسئول اتفقنا
ضحكت ميار وردت فطار ايه يا علي ده الضهر اذن
علي يا ستي المهم ممكن مقادير البيض المسلوق لو سمحتي
ميار ضاحكة يا خبر البيض المسلوق مرة واحدة بس ده صنف صعب اوي يا علي
علي نعمل ايه بقي المهم تبقي راضي عننا يا جميل
ميار مبتسمة راضية يا حبيبي ربنا يخليك ليا
انهت ليلتها بجملة واحدة تصبح علي خير
وتركته طوال الليل يفكر في كلامها وفي اخر جملة قالتها شوف يناسبك يوم ايه و نروح سوا علي اي مكتب مأذون وننهي اجراءات الطلاق
مر اليوم كله دون مواجهات اخري لكن علاء لم يجد امامه سوي التودد من بناته سبيل سبيل لعل ريم لما تري ما بينهم من مزاح ولعب تعيد نظرتها للموضوع مرة اخري
ريم اثرت الصمت خصوصا بعدما رجعت من شقة ميار وانهمكت في اعمال المنزل
دخل علاء للمطبخ خلصتي الاكل ولا لسه
التفتت ريم لترد ايوة خلاص
علاء و هو يتابع معالم وجهها الواجم تحبي اساعدك في حاجة
لم تلتفت ريم وشعرت بسخرية في داخلها وردت لا انا خلاص حاغرف الاكل دلوقتي
اقترب علاء منها ورد طيب
ظل واقفا في المطبخ يتابعها ثم حاول ان يتحدث في اي شئ ولكنه صدقا لا يعرف من اين يبدأ بدأت تضع الاطباق فحملها وخرج بها الي السفرة وعاد مرة اخري الي المطبخ ليعيد الامر حتي اتي الي ريم محاولا المزاح السفرة جاهزة يا فندم علي الله خدمة تعجب سيتك
لم ترفع ريم وجهها حتي تنظر له واكتفت بحمل ابريق الماء وكوب وخرجت من المطبخ جلست علي السفرة وبدأت في اطعام بناتها دون النظر او الكلام الي علاء
قطع علاء الصمت تسلم ايدك
لم ترد ريم ولم تعقب كانت تشعر بسخرية تزيد بداخلها كلما تكلم وما كان يزيد من سخريتها ان ما قالته اميرة من ردة فعله علي طلب الطلاق هو ما حدث التودد لها ولبناته ومحاولة الهروب من المواجهة والباقية بالتأكيد ستأتي
مرت ثلاثة ساعات بعد الغداء ولازال الحال هو الصمت خرجت ريم من المطبخ وهي تحمل صنية عليها كوبان من النسكافية وضعت الصنية بينما علاء يلعب مع بناته نظر الي ريم وهي تسحب بعض الكتب وتجلس بها علي السفرة ترك بناته والتفت اليها مستغربا ايه الكتب دي يا ريم انتي بتذاكري
ريم وهي تنظر الي الكتب ايوة يا علاء عايز حاجة
علاء وهو يجلس علي الكرسي المقابل ما تيجي نخرج تعالي ناخد البنات ونخرج انهاردة
ريم ولاتزال عينها في الكتب معلش يا علاء بجد مش فاضية عندي امتحان بعد بكرة
علاء باستغراب ايه ده انتي بتذاكري بجد
ريم ايوة
علاء امتحان ايه
ريم امتحان في الانجلش اصلي حاخد كورس فعندي امتحان تحديد مستوي وبعد كده حاقدم في المركز وحاخد كورس
علاء مقولتليش يعني الموضوع ده قبل كده
ريم مجتش مناسبة وبعدين اديني قلت اهو
شعر علاء بالغيظ من طريقة تجاهلها زفر بشدة واخيرا باضطرار من شدة غيظه ممكن نتكلم بخصوص الطلاق ممكن تدي نفسك فرصة تفكري كويس احنا في بينا بنتين صغيرين مش معقول يتربوا من غيرنا احنا الاتنين مهما كان انتي مش حتقدري لوحدك و لا ايه
رفعت ريم وجهها بهدوء و ردت متقلقش يا علاء انا مش حاكون لوحدي انا حاقعد مع ماما والبنات اي وقت عايز تشوفهم انا مش حامنعك منهم حتي لو كل يوم وانا ان شاء الله حاشتغل والحياة حتمشي مش بتوقف علي حد و لا ايه
علاء بغيظ ياه ده انتي مرتبة نفسك و لا كأن حاجة حتحصل ولا كأني فارق معاكي
ريم وهي تنظر بضيق زي ما انت رتبت حياتك مع سوسن من غير ما تاخد رأيي انت عايز تحطني قدام الامر الواقع وعايزني بعدها اعمل ايه اتعامل عادي ولا كأن حاجة حصلت تعمل اللي انت عايزه وبعدين انا اساعدك ويمكن كمان اعينك صح اقولك لا يا علاء مدام اتجوزت اتنين لازم تعدل بينهم لا يا علاء وفر وقتك لمراتك التانية وفر عدلك لبيتك التاني وانا حاستعين بربنا واكمل حياتي مع بناتي وبعدها اذا ربنا اراد وعوضني بالراجل اللي يستهالني اوكي مكنش اديني مع بناتي
اشتعل علاء و رد ببالغ الغيظ طب انا مش حاطلق يا ريم وابقي وريني حتعملي ايه ساعتها
ريم بلامبالاة حاعمل يا علاء بس خلينا بالمعروف احسن
علاء بغيظ لا يا ريم طلاق مش حاطلق
ريم خلاص بس اوعي تزعل لو قررت ادخل ابيه عمرو واخلي الموضوع بايده و ساعتها انا واثقة انك حاطلق
جذبها من ذراعها طلاق ايه ده بقي اللي حيبقي بايد عمرو لا يا ريم القرار ده قراري وانا مش حارجع فيه انا اللي بايدي اطلق او لا مش عمرو
قام من مكانه و كان متوجه لغرفة النوم
فقاطعته ريم بتحدي خلاص يبقي خلع حارفع قضية خلع
تسمر في مكانه ثم التفت لريم نعم خلع انتي عارفة انتي بتقولي ايه
ريم بهدوء انا باقول الامور تنتهي بما يرضي الله و بلاش مشاكل وباقول اني في الاول حادخل عمرو انا عمري ما حاخد الخطوة دي الا لو وصلنا لطريق مسدود
لانت صوتها ونظرت بود يا ريت بلاش نوصل للخطوة دي
علاء بضيق يعني مفيش فايدة
ريم خلينا نفضل ولاد عم نفضل نحترم اللي بينا من عشرة قبل اي حاجة
علاء بفراغ صبر طب علي الاقل نحضر فرح علا متجوزين قدام الناس
ريم ماشي وانا موافقة
نظر علاء الي ريم نظرة لم تستطع تفسرها ثم نظر الي بناته الاثنين بكثير من الهم و هو لا يعرف هل سيستطيع ان يواجه هذه الخطوة ام لا
الحلقة الخامسة و العشرين
كانت كلماتها تدوي في اذنه و شعور قاتل بالذنب يملئه كيف لها ان تكون علي علم بكل ما قالت و تكمل معه الحياة كأن شيئا لم يكن ما الذي دفعها لتتحمل سنتان و نصف من الخيانة بمرارها و من الذي يتحدث اليها في الهاتف هل وجود هذا الرجل هو ما دفعها للتغير الذي طرأ عليها أوقف السيارة ثم زفر بشدة من كثرة الضيق و اتجاه الي صعود الي الشقة التي كان يريدها
طرق الباب ليسمع ردها من الداخل ايوة حاضر حاضر يا اللي بتخبط فتحت الباب لتصدم من رؤيته امامها عمرو
بكثير من نظرات الغيظ و الضيق نظر اليها دفع باب الشقة ليدخل ثم اغلقه خلفه
بكثير من السخرية نظرت زيزي باتجاه عمرو الذي لايزال علي نظراته المملؤة بالغيظ و قالت انا بردوا قلت الشوق حيجيبك يا عمرو بس كنت متوقعة الزيارة دي بكرة مكنتش متخيلة انك حتيجي انهاردة
اقترب عمرو منها ونظر اليها بقوة ثم بادرها بصفعة دوي صوتها بقوة اشعرت زيزي ان زلزال قد اتي الي المكان وضعت يدها علي خدها ثم نظرت اليه مصدومة انت بتضربني هي حصلت يا عمرو
بدأ صوتها يعلو و قد قررت المواجهة انت مين انت عشان تجرأ تعمل كده
قررت ان ترفع يدها لترد الصفعة لتجده امسك يدها بقوة وقام بليها واقترب منها ليتحدث في اذنيها و قد خرج صوته متوعدا انتي اللي فكرة نفسك مين انتي حتة واحدة مش محترمة عرفتها يومين و اهم راحوا لحال سبيلهم بس اظاهر ان الذوق مبينفعش مع اللي زيك انا بكرة حاودي الشيكات اللي معايا القسم عشان لما تنامي في الحجز تبقي ساعتها تعرفي ان الله حق و مش بس كده انا حاقدم بلاغ حاتهمك فيه بسرقة العيادة بتاعتي وحبايبي كتير ممكن يخدموني في الموضوع ده
دفعها امامه لينظر اليها وقد جذبها من كلتا ذراعيها بس انا باقول بلاش اهو بردوا في يوم من الايام كان اسمك مراتي صح يا حلوة
لم ترد و اكتفت ببعض الدموع لتجد من امسك شعرها بين يديه بقوة و قد زادت حدة صوته صح و لا لا
ابعدت يده و ردت بعصبية هو كان ايه حصل لكل ده كل ده عشان اتصلت بيك و كنت عايزة اشوفك
عمرو بسخرية و الله يعني انتي مش عارفة كل ده ليه زاد عمرو من نظرات غيظه و تقدم امامها و بدي انه ينوي علي صفعة جديدة لتتحرك هي خطوات للخلف و قد ملأها الكثير من الخوف حتي تصدم باحدي المقاعد لتسقط عليها جالسة عندها يزيد ما حدث من اضطرابها فتجد عمرو يجذبها من ذراعيها ليوقفها امامه مين اللي بيتصل بشيرين و بيحكلها اللي بيحصل 
ثم يصرخ في وجهها انطقي
تلعثمت كثيرا و ملأها الخوف وردت مين اللي بيتصل بشيرين
عمرو بعصبية ما انا باسألك لما الاقي مراتي عارفة التفاصيل اللي بينا يبقي ده معناه ايه فهمني
ابتلعقت ريقها و ردت متلعثمة انا انا معرفش حاجة عن الموضوع ده زاد ردها من غيظه و عصبيته و لم يتمالك نفسه الا و قد صفعها مرة اخري هذه المرة اردتها ارضا فصرخت انت اكيد اجننت يا عمرو اكيد اجننت
عمرو و قد جذبها من شعرها لتقف من الارض وقد بدأ يصرخ فيها لا لسة مجننتش بس ناوي اوريكي الجنان حتنطقي و تقولي مين اللي بيتصل و لا اكمل عليكي
لم تستطع زيزي ان تصمد امام مواجهته و رغم صعوبة الاجابة اجابت انا انا عملت كده عش عشان شيرين تطلب الطلاق كنت عايزاك تطلقها و جوزنا يكون رسمي
انهت اجابتها و نظرت لعمرو في انتظار رد فعله صمت عمرو و ظل ينظر لها ثم رد و لكن بهدوء انتي طالق
التفت ليتجه الي باب الشقة و فتحه و قبل ان يخرج نظر لها مش عايز اشوف وشك و لو حتي بالصدفة بس اللي حصل ده اوعدك اني حادفعك تمنه فاهمة
ثم اغلق الباب خلفه بقوة و خرج
تصنعت شيرين النوم رغم ما امتلكها من قلق فمن بعد يوم المواجهة و الصمت هو عنوان حياتها مع عمرو شعرت بدوران المفتاح في الباب و في دخول عمرو حتي اتجه الي غرفة مكتبه ليخرج عمرو من احد ادراج مكتبه عدة شيكات نظر لها مليا ثم قال في نفسه انا فعلا اجننت لما دخلت واحدة سافلة و حقيرة علي حياتي كان فين عقلك يا عمرو كان فين
اما زيزي فكانت تغسل وجهها الذي بدا عليه التورم و من شدة الصفعات خرجت من الحمام و اتجهت الي دولابها لتجرج منه سي دي و عدة صور تنظر له مليا و تقول في نفسها مهما كان جنانك يا عمرو و لا تهديدك حتي انا بقي ميهمنيش سجن عشان السجن ميساويش حاجة قدام فضيحتك وبكرة تشوف يا عمرو
صباح الخميس علي العائلة الكريمة و اخر يوم في امتحانات نصف العام ليوسف و يارا و نور كلا الي عمله و الي حال سبيله
الي شركة المحمدي وضع حقبته ثم نظر الي ماجد و هو يجلس صباح الخير
ماجد صباح النور ايه يا عم تاخد اجازة فجأة كده
علي المدام تعبت شوية فاضطرت اني اخد اجازة
ماجد باستغراب مكنتش قايل يعني انها حامل
علي بضيق هو انا المفروض اقول المفروض دي حاجة تخصني
صمت ثم اكمل هي مي بقي اللي قالتلك
ماجد انت مش قولتلي اقولها علي موضوع الشقة و اديها رقم السمسار اهو الكلام جاب بعضه
نظر علي باتجاه مكتبها ثم نظر الي ماجد امال هي فين
قبل ان يرد ماجد كان باب المكتب يطرق لتدخل و هي تلقي السلام صباح الخير
لم تنظر باتجاه علي كما توقع بل ظلت تنظر في اوراقها قابل علي ما فعلت بكثير من الاستغراب لكنه ترك الامر خلف ظهره وانشغل فيما بين يديه من عمل
وضعت امامها كوب العصير و ابتسمت يعني انتي تفتكري اللي بتعمليه ده ممكن يجيب نتيجة
لترد ريم انا مبقاش فارق معايا