رواية احببت مدمن رغده وقاسم كاملة جميع الفصول بقلم ايمان شلبي
عايز تسيبني قبل فرحنا بيومين !
قولتها بصوت كله خوف ورعشه وانا ببصله والدموع متعلقه في عيني
لقيته اتنهد وهو بيسند ايده الاتنين علي الطربيزه وبيقول ببرود وقسوه
اه مش بحبك مش حاسس من نحيتك بأي مشاعر !
بصيتله بصدمه وانا بقول بهمس وشرود
م مش بتحبني
حط رجل علي التانيه وهو بيولع سجاره وبينفث دخانها بكل برود في وشي
بصراحه كده اكتشفت اني بحب واحده تانيه وبعدين انتي المفروض تشكريني ده انا حتي مرضتش اظلمك معايا مع اني كان ممكن اكمل الجوازه
بس بصراحه كلام الناس مش مهم بالنسبالي الاهم من كل ده راحتي مع الشخص اللي هكمل معاه حياتي وانا بصراحه يا رغده مش حاسس اني مرتاح معاكي
انا اسف عن اذنك
قال كلامه اللي كان بمثابه خنجر مسموم بيدبه في قلبه وقام وسابني ومشي وانا قاعده مش قادره انطق بحرف واحد !
كنت حاسه اني علي حافه الانهيار كل مخططاتي انهارت في لمح البصر
عروسه خطيبها سابها قبل فرحهم بيومين !
وكأن سامر قاصد يكسرني قاصد يموتني بالبطئ مع أنه مشافش مني غير كل خير
ليه يسيبني طب ليه يفضل مكمل لما هو مش مرتاح معايا ليه يمشي ويسيبني بالقسوه ديه
ليه يسيبني أواجه الكل لوحدي ليه يسيبني أواجه نظرات الناس ونظرات الاتهام اللي هشوفها وهما بيسألوا ليه خطيبها يسيبها قبل فرحها بيومين إلا إذا كانت معيوبه !!
غمضت عيني وانا بسمح لدموعي تنزل علي خدي
مش عارفه اتصرف مش عارفه افكر في حل مش عارفه هقول ايه لاهلي
خطيبي سابني ومفيش فرح !!
هروح اقول لماما اللي بتحضر بقالها شهرين لفرحي اللي عينيها كل ما اتكلم عن الفرح تلمع بفرحه انها اخيرا هتفرح بيا
ماما اللي لو عرفت مش بعيد يجرالها حاجه
طب وبابا !
هروح اقول ايه لبابا هقوله خطيبي سابني لانه مش مرتاح معايا هقوله روح بلغ الناس أن فرح بنتك اللي كنت بتستناه بفارغ الصبر اتلغي خلاص مفيش فرح
هقوله روح واجه نظرات الناس الشمتانه هقوله واجه الكلام اللي زي السم اللي بيخرج منهم هقوله ايه ولا ايه !!
هروح أقوله اتحمل مسؤوليه تخلي ظهرك يتحني تخلي راسك في الطين
زاد صوت عياطي لدرجه كل اللي كان في الكافيه سمعني
رغده
رفعت راسي لمصدر الصوت واتفاجئت لما شوفته قدامي
نديم
رغده فيكي ايه انتي كويسه
حطيت وشي بين ايديا وانا بعيط بحرقه
سامر سابني يا نديم س سامر سابني قبل فرحنا بيومين
سابك
قالها بصدمه وهو بيقعد علي الكرسي
رفعت وشي اللي متغرق بالدموع وانا بستنجد بيه
اتجوزني يانديم روح اطلبني من بابا
ر روح قوله الحقيقه قوله إن سامر سابني و وانك مستعد تتجوزني مكانه
م مش انا بنت عمك مش م مش انت بتحبني زي أختك ح حتي اتجوزني شهر شهر واحد بس وبعدها طلقني
ا ارجوك يانديم ارجوك ماما وبابا هيتكسروا لو الفرح اتلغي ارجوك ع عشان خاطري يانديم لو بتحبني
نديم مكانش عارف يعمل ايه كان بيبصلي بشفقه وفي كلام متردد يقوله كلام خايف يجرحني أو يخليني افقد الأمل وانا في الحاله ديه
غمض عينه وهو بيحط أيده علي ايدي وبيقول بغموض
انا هتصرف متقلقيش
رفعت راسي وانا بسأله بخوف
هتعمل ايه !
نديم وهو بيتنهد بحيره
مش عارف بس هفكر وهوصل لحل مش هسيبك متخافيش
طال الصمت لأكتر من خمس دقائق
فجأه لقيته بيقول بفرحه
لقيته
ه هو ايه
الحل لقيته
بصيتله بأمل وانا بمسح دموعي
ايه هو
نديم
ا احم ه هو بصي انا عارف انك ممكن ترفضي بس ياريت تفكري قبل اي حاجه
مش فاهمه !
ا احم بصي يارغده طبعا أنا عارف ان انتي و قاسم اخويا مش بتطيقوا بعض بس بس يعني هو ده الحل الوحيد اللي قدامنا
بصيتله وانا بقول بصدمه
ق قصدك ق قصدك اني اتجوز قاسم
هزلي رأسه بأسف وهو منتظر مني رد فعل متهور كالعاده لكن اتفاجئ لما حطيت راسي في الأرض وانا بقول باستسلام
موافقه بس يارب هو اللي يوافق
هيوافق
قالها نديم بلهفه وثقه لدرجه اني استغربت ثقته الزياده وهو حتي مفاتحهوش في الموضوع !
وايه اللي يخليك واثق اوي كده
نديم وهو بيغمزلي
احساس
اتنهدت وانا بقول بتعب
طب كلمه
نديم
تمام انا هكلمه واخليه يجي علي هنا وانتي تتكلمي معاه في الموضوع
بس ...
انتي الوحيده اللي هتقدري توصلي احساسك لقاسم انتي عارفه أن قاسم رافض فكره الجواز نهائي وانا عارف ان انتي وهو قط وفار بس ده ميمنعش أن قاسم طيب ولو حس انك محتاجه مساعدته مش هيتردد تمام
بلعت ريقي وانا بفرك ايدي بتوتر
ت تمام
وبالفعل كلمه وقاله اني واقعه في مشكله ومحتاجين مساعدته
خمس دقائق كان داخل الكافيه بيجري وهو بيدور علينا بلهفه وقلق واول ما شافنا جري نحيتي وهو بيقول بقلق في صوته
رغده في ايه انتي كويسه حد عملك حاجه حد آذاكي نديم قالي أنك منهاره فيكي ايه ردي عليا انتي ساكته ليه !
ياعم مش لما تسيبلها فرصه ترد عليك !
قالها نديم بضحك وخبث وهو بيبص لقاسم اللي وشه بقي احمر من الإحراج ومن أندفاعه الغريب الغير متوقع بالمره
اتنهد وهو بيحاول يرجع قناع البرود واللامبالاة وقعد علي الكرسي وهو بيقول ببرود عكس اللهفه اللي كانت في صوته من ثواني
ا ايه اللي حصل
نديم
طيب اروح أنا بقي اقعد مع المزه بتاعتي عشان متنكدش عليا واسيبكم تتكلموا براحتكم
قال جملته وسابني معاه
في الحقيقه مكنتش عارفه ابدء كلام بأيه اصلا انا بتوتر منه بتوتر من نظراته اللي كأنها سهام خارجه من عيونه ترشق في قلبي عروق رقبته اللي بتكون بارزه وكأنه رايح يلعب ماتش ملاكمه في وشي
مش قادره افهم ليه لما بيشوفني بيتعصب ويثور ويخلق اي مشكله من الهواء وكأني حد من أعدائه مش فاهمه ماله ومالي البني ادم ده !!!
ياتري هنفضل ساكتين كده للصبح !
قالها وهو بيسند بأيده الاتنين علي الطربيزه وبيبصلي بنظرات مرعبه
بلعت ريقي وانا الدموع متعلقه في عيني
ا ا انا ا انا
لقيته بيحط أيده علي ايدي وهو بيقول بنبره كلها هدوء ورقه لاول مره
لو سمحتي اتكلمي من غير عياط ومتخافيش
هزيت راسي بسرعه وانا بمسح دموعي بسرعه وببدء احكيله كل حاجه لحد ما خلصت
اتنهد وهو بيقول بهدوء
يعني عايزاني اتجوزك
نزلت راسي لتحت وبلعت ريقي وانا بحاول اتكلم بس الكلام هرب من علي لساني
وانا موافق اتجوزك
رفعت راسي بلهفه ودموع وفرحه
بجد ياقاسم ب بجد
هزلي رأسه بابتسامه خبيثه وهو بيقول بنبره صوت هاديه لكنها مريبه
طبعا بجد قومي يالا اروح اطلبك من عمي
يتبع
نعم انت بتقول
قالها بابا بأنفعال وهو بيتنفض من مكانه وبيبوزع نظراته بيني وبين قاسم اللي كان قاعد بكل هدوء وبرود وكأن محصلش حاجه
قرب منه بابا وهو بيشده من هدومه وبيجز علي أسنانه بعنف
الظاهر أن المخدرات اللي بتضربها لسعت مخك يابن اخويا وعايز حد يفوقك
اتنهد قاسم وهو بيغمض عينه وبيضغط علي ايده بقوه
انا في كامل قوايا العقليه ياعمي وبكرر طلبي تاني انا عايز اتجوز رغده بنتك
بابا وهو بيضربه قلم جامد علي آثره اتنفضت وشهقت بعنف وانا بحط ايدي علي بوقي
لا الظاهر انك محتاج تتربي من اول وجديد بقي امشي اخرج برا يالا برررررا
قالها وهو بيشده من هدومه نحيه الباب وانا واقفه متنحه مش عارفه اقول ايه ولا اعمل ايه
بنتك فرحها مش بعد بكره ولا حاجه ياعمي سامر سابها
قالها قاسم وهو واقف علي الباب لبابا اللي بعد عنه بصدمه وهو بيهز رأسه برفض وكأنه رافض يصدق أن سامر هيتخلي عني عنده حق في الحقيقه انا لحد دلوقتي مش قادره اتخيل رافضه فكره ان هو سابني رافضه فكره اني هتجوز شخص تاني غيره بين يوم وليله الحال بيتشقلب والاقدار بتتغير
عمري ما كنت أتوقع أن نصيبي مع شخص زي قاسم !!
بابا وهو بيرجع خطوه لورا وبيهمس بضعف
لا انت بتكذب سامر بيحب بنتي استحاله يسيبها
لفلي وانا واقفه حاطه وشي في الأرض ودموعي مغرقه خدي رافضه ارفع راسي واشوفه بالضعف ده رافضه اشوفه ضعيف ومخذول بسببي
أما عن ماما بالرغم اني مكنتش بصالها إلا أني سمعت صوت عياطها وشهقتها القويه وهي بتقول بصدمه
يامصيبتي خطيبك سابك
كنت بترعش عيوني مش شايفه بيها من كتر الدموع مكنتش قادره انطق بحرف واحد مش عارفه هقول ايه طب ولو حتي قولت السبب بابا وماما هيصدقوني طب هيستوعبوا اسباب سامر الوهميه !!
انا نفسي مش قادره أصدقها اكيد في أسباب اقوي عشان يسيبني بالشكل ده اكيد في بنت تانيه لعبت عليه عملتله عمل مثلا اكيد شرطت عليه عشان تكمل معاه أنه يسيبني سامر كان بيحبني كان مرتاح معايا هو بنفسه كان بيقولي انتي اكتر شخصيه مريحه اتعاملت معاها كان طول الوقت بيحمد ربنا عليا كنت بشوف نظره الحب في عيونه خاصه بيا انا اكيد في أسباب اقوي من كده في جزء مفقود ولازم اعرفه
غمضت عيني وانا بقول بصوت يكاد يكون مسموع
قاسم بيقول الحقيقه يابابا س سامر سابني
فوقت من شرودي وماما بتقرب مني وهي بتهزني
خطيبك سابك ليه ردي عليا ايه اللي حصل
هزيت راسي بدموع
معرفش ياماما م معرفش صدقيني
ماما بزعيق ودموع
يعني ايه يعني ايه متعرفيش سابك من الباب للطاق كده جه قالك يارغده انا مش عايز اكمل معاكي من غير اسباب اكيد في سبب اكيد عملتي حاجه اكيد زعلتيه منك ايه اللي حصل ردي عليا
معرفش والله معرفش قالي مش مرتاح معاكي قالي مش بحبك وسابني ومشي والله هو ده اللي حصل
بعدت عني وهي بتقعد علي اقرب كرسي بضعف
يعني ايه يعني مفيش فرح طب والناس اللي عزمناهم طب والعفش اللي نقلناه بيتك طب وجهازك اللي انا تعبت فيه وحطيت القرش علي القرش عشان ادخلك باحسن حاجه خلاص راح طب والفستان اللي كنت نفسي اشوفك بيه قبل ما اموت طب وكلام الناس هقولهم ايه هقولهم بنتي فرحها اتلغي وابوكي
مفيش حاجه هتتلغي ياسعديه
قالها بابا بجمود وهو بيبص لقاسم اللي ابتسم بهدوء وخبث كعادته وكأنه ناوي علي شر !
لسه عند طلبك يابن اخويا
طبعا ياعمي
قالها قاسم وهو بيضحك ضحكته المريبه اللي خلت الخوف ينهش قلبي ويحذره أن اللي جاي مش احسن من اللي فات بل بالعكس في صدمات ووجع قلب لسه مستنيكي يارغده في آذيه مستنياكي مع قاسم اللي معرفش ليه كميه الكره اللي بشوفها في عينيه ليا ولاهلي!
تمام مفيش اي حد يعرف باللي حصل كده كده محدش يعرف سامر ولا شافه لأننا عملنا قرايه فاتحه علي الضيق
ماما وهي بتتنفض وبتبص لبابا بخوف
يعني ايه يعني هتجوز بنتك لمدمن مخدرات !
قاسم بحزن مصطنع
ربنا يسامحك يامرات عمي
بابا وهو بيتنهد بحزن
مش احسن ما نتفضح !
وبعدين قاسم ابن عمها ومستحيل يأذيها مش كده يابني
قاسم وهو بيهز رأسه ببراءه
طبعا ديه هتكون في عيني وفي قلبي ياعمي متنساش انها بنتك
قال جملته الآخيره بنبره صوت كلها كره وشر متخفيه ورا ابتسامته المريبه اللي مش مفارقه وشه
ابتسامه كره ممزوج بشماته بفرحه وكأنه حقق انتصار
تمام يبقي علي بركه الله بعد بكره باذن الله الفرح هيتعمل في معاده بس بشرط
اتفضل ياعمي
قرب منه بابا وهو بيرفع صوابعه بتحذير
شهر واحد ياقاسم شهر واحد وتطلق بنتي ومتلمسش شعره منها عايز بنتي زي ما هتخرج من هنا ترجع واظن فاهم قصدي !
قاسم وهو بيتنهد وبيحط أيده في جيبه بجديه
ده ازاي يعني !
بابا بغيظ
زي الناس انت قدمت مساعده وانا وافقت بس مش عايز المساعده تأذي بنتي
قاسم وهو بيبصلي بنظرات حقيره وكأن نظراته بتحرق جسمي
اكيد طبعا مش هأذيها ديه بنت عمي قبل ما تكون مراتي متقلقش ياعمي وبعدين ياعالم مش يمكن الشهر يبقي اتنين وتلاته يمكن يبقي سنه
بابا وهو بيجز علي أسنانه
انسي ياقاسم انسي اني اسيب بنتي تكمل معاك روح نضف نفسك وابقي انسان مسوؤل الاول وابقي اتكلم
قاسم بسخريه
انا كده وهفضل كده عن اذنك يا ياعمي سلام يا ياحرمي المصون
قال جملته وبصلي وهو بيغمزلي بوقاحته المعتادة اللي خلت جسمي كله يتنفض وانا بدعي من قلبي الايام تعدي علي خير لاني مش حمل وجع قلب مع اني من جوايا كان عندي احساس كبير أن كره قاسم ليا هيتحول لانتقام
فات يومين والنهارده فرحي هه ضحكت بسخرية علي كلمه فرحي اللي لو ينفع تتبدل بحزني بعزايا بموتي بأي كلمه من دول كنت بدلتها
كنت بلبس فستاني بعد ما حطيت الميك اب اللي أصريت يكون خفيف مش مبهرج كنت حاسه اني جسد من غير روح حوليا اكتر من شخص صحابي وماما وخالتو وكل الناس اللي اعرفهم بس مكنتش معاهم نهائيا
كنت في دنيا تانيه دنيا بفكر فيها في مستقبلي مع شخص معرفش حاجه عنه حرفيا كل اللي اعرفه انه ابن عمي الشخص المنطوي اللي مش بيظهر في أي تجمع عائلي أو افراح او حتي احزان كان اول ظهور ليه في حياتنا لما كنت في تانيه كليه كان وقتها لازم يظهر عشان ياخد عزاء باباه الله يرحمه وقتها شوفته منكرش ابدا ان قلبي دق بشكل غريب بالرغم اني كنت يشوفه وانا صغيره وافتكر أنه كان بيلعب معايا وكل ما يشوفني يروح يجيبلي حاجه حلوه من مصروفه كنت ببقي مبسوطه اوي كنت طفله
