رواية يارا وعمر وماهر كاملة جميع الفصول بقلم رهف
المحتويات
وتفهمي ان دا جزاة اللي يعصي ربنا ويخون ثقة اهله
بس أنا
قاطعت كلامها بنرفزة كإني بكلم نفسي اصل
دا الكلام اللي كان نفسي حد يقولهولي.
يا بنتي فوقي أنسي عمر وقربي من ربنا.. هو اللي هينفعك. عمر سابك ومفكرش فيكي انتي ليه لسه ماسكة في حد مش عايزك فين كرامتك وعزة نفسك ليه تجري ورا واحد خانك من الأساس
دموعها غرقت وشها كانت بتهز راسها بنفي وكأنها مش عايزة تصدق و صوتها بيترعش
أنا مش قادرة اعمل كدا.. مش قادرة أنساه.
انا عارفة وجعك عارفة الإحساس ده بس صدقيني التعلق بغير ربنا عمره ما هيجيبلك إلا خيبة وجع. لو حبيتي ربنا بجد قلبك هيتنضف من اللي جرحك وهتلاقي نفسك أقوى. الحب الحقيقي مش في وعود فاضية ولا في الكلام الحلو.. الحب الحقيقي هتلاقيه في حد يخاف عليكي ويخاف على دينه قبل أي حاجة ويخاف يعصي ربنا فيكي.
سكتت إسراء وبان في عيونها لحظة إدراك لكلامي وبدأت تستوعبه مسحت دموعها وقربت مني
يعني.. يعني مافيش امل انه يرجعلي.
ولو في امل ورجعلك انتي مش هترجعي لو عايزة مساعدتي بجد اسمعي مني عمر واللى زيه ميستاهلوش غير كدا لا تعبريه ولا تعمليله قيمة لان دا مش راجل اصلا
بس دا ابن عمك ازاي بتقولي عليه كدا
معاها حق هو ابن عمي.. بس الغلط مابيفرقش بين قريب او غريب الغلط غلط واللى غلط يتعاقب.
وهو علشان ابن عمي ابررله الغلط واقول معاه حق..لا هو غلطان زيك بالظبط ويمكن اكتر وهيتحاسب علي اللي بيعمله دا لو مش في الدنيا يبقي في الآخرة ربنا قال كما تدين تدان.. عمر كان ابن عمي لاكن من النهارده انا معرفوش
بدأت تركز لكلامي وحسيت انها هديت
هو انتي كمان ارتبطتي قبل كدا
انا مارتبطتش ولا اديت مجال لحد يدخل حياتي.. بس غلطت غلطة زيك برضو حبيت حد ميستاهلش حبي حد معندوش قلب ولا ضمير
من طرف واحد قصدك.. وعملتي ايه
لا كانو شويه مشاعر من عشمي يعني... وقفت قدام نفسي وعاقبتها قولتلها ان اللي عملته غلط عرفتها ان كرامتها اهم من الحب عزة نفسها واحترامها لنفسها اهم من اي حاجه
والاهم من دا كله علاقتي برنا اللي اهم من اي حد في الدنيا
واخدت قرار بالبعد عن الشخص دا والقرب من ربنا اكتر.
معاكي حق انا حبي ليه عماني
خلاني اعمل الغلط وانا مقتنعة بيه انا مش هفكر فيه تاني انا خلاص فوقت
وهنساه وأبدا من جديد
متزعليش من كلامي أنا بنت زيك وحاسة بيكي.. بس لو سمحت اعتبري اللي حصل دروس مش جروح. ارفعي راسك وخلي قلبك عند اللي يستاهله.. عند ربنا.
واخيرا ابتسمت.. ابتسامة باين عليها الرضا
الرضا بالمكتوب باللي راح واللى جاي.
ازعل منك ازاي بس دا انا بشكرك من كل قلبي
انتي فتحتي عيوني علي حاجات كتيرر انا ماكنتش شيفاها.
الحمد لله إنك فوقتي خلي دا يكون بداية جديدة ليكي. متخليش حد تاني يستغلك أو يكسرك.. إحنا بنات ولينا قيمتنا واللي يفرط في واحدة فينا يبقى ما يستاهلهاش.
إسراء مسحت دموعها واخدت نفس وابتسمت...ابتسامة واحدة كانت تايهة ولاقت طريقها اخيرا قامت من مكانها وهي كلها تفاؤل باللي جاي خير خرجت من باب الشقة وهي بتبصلي بنظرة امتنان وعنيها كانت بتشكرني
فضلت واقفة قدام الباب بعد ما قفل حسيت لأول مرة إني مش ضعيفة.. يمكن أنا موجوعة بس على الأقل أنا مش لوحدي. يمكن كلامي ليها كان في الحقيقة علاج ليا أنا كمان.. آه عمر كسرني بس النهارده حسيت إني أقوى منه وأقوي من اي وجع
من النهارده هيكون في يارا تانيه خالص.
______
بعد مرور 6أشهر
سما.. يارا.. يلا يابنات بسرعه العربية واقفة بقالها كتير.
انا جاهزة ياماهر اهو جاية.
كل دا بتجهزي ياسما.. فين يارا!
يارا جوة لسة مخلصتش.
يا يارا يلا يابنتي اتأخرنا.. انا مش عارف انتو كنتوا بتعملوا ايه بقالكم ساعه
جاية ياماهر ثواني.
ادخلي ياسما شوفيها بتعمل ايه كل دا.. وهاتوا الشنط يلا
حاضر
بعد مرور عشر دقايق..
خد ياماهر دي شنطتي الحمرة ودي شنطة يارا البينك
طيب وفين يارا!
انا هنا اهو.. يلا بينا
ماهر وسما بصولي من تحت لفوق وبصوا لبعض وبيضحكوا
ايه ياجماعة بتبصولي كدا ليه الفستان مش حلو!
ماهر قرب مني ولف حوليا وبعدين مسك ايديا ولفني
ايه القمر والحلاوة والشياكة دي يابت.. انتي خسيتي واحلويتي كدا ليه
سما قربت هي كمان والاتنين في بوق واحد
دا انتي بقيتي مزة
منكرش فرحتي بكلامهم بس ولاد الايه كسفوني قوي.. لفيت بالفستان تانى
بجد ياسما بجد ياماهر.. الفستان حلو!
إلحقي يا سما دي بتسأل الفستان حلو ولا لا.. احنا اصلا مش شايفين الفستان احنا شايفين القمر اللي لابس الفستان
حطيت ايدي علي وشي من الكسوف وانا بتمايل بالفستان
خلاص بس بقي بتكسف ياماهر.
فات 6أشهر كاملين.. حصل فيهم حاجات كتيره قوي وأهمهم اني اتغيرت.. بقيت قريبة من ربنا ورميت كل حاجه وجعتني وكسرتني ورا ضهري بقيت ما بفكرش غير في نفسي واخواتي وبس اهتميت بنفسي وبشكلي وبلبسي وبشرتي ووزني
بقيت يارا تانيه خالص عن يارا القديمه.
قرب مني ومد ايده وشد سما كمان
كبرتوا وبقيتوا عرايس زي القمر.. بقيت بخاف عليكم أكتر ربنا يحفظكم ويفرحني بيكم يارب بناتي حبايبي
دمعت اه والله دمعت وماهر قلبها محزنة انا بجد ماليش غيره هو سما في الدنيا دي خلاص هما عيلتي ودنيتي بحالها
بس خلاص بقي انت وهي الميكب هيبوظ وهأخركم تاني!
لا أبوس ايديكي انا مش حمل تشطيب دلوقتي
ضربته علي دراعه بخفة وانا بضحك
ضحك هو وسما .
كفاية بقي بتكسف ياجماعة اللاه.. وامشي يلا احسن ما ادخل اشطب تاني
سما خلصت امتحانات ونجحت الحمدلله ورايحة أولي ثانوي.. قررت انا وماهر نقضي الاجازة عند جدو ابو ماما في المنوفية
______
في المنوفية _بيت الجد
وصلنا واخيرا بعد طريق طويل.. وطبعا دي مفاجأة لجدو لانه مايعرفش اننا جايين
سيبت سما وماهر
فجأة سمعت صوت جاي من ورايا
حاااااسبي يا يارا..
...........يتبع
حااااسبي يا يارااا..!
صوت ماهر كان مليان فزع وأنا في ثانية حسيت الدنيا لفت بيا عيني ما لحقتش تلمح غير نور العربية اللي جاي بسرعة وبعدها جسمي اتخبط ووقعت على الأرض.
نفسي اتقطع عيني بتتفتح نص فتحة والناس حواليا بتجري الأصوات متداخلة ووشوش كتير فوق دماغي.. ثواني وبعدين كل حاجة اسودت.
_____
جوه المستشفى
ماهر
طمني يا دكتور يارا فيها ايه.. هي كويسة!
حضرتك تبقالها ايه
أنا أخوها.. بالله عليك يا دكتور هي كويسة قولي إنها بخير.
ماهر كان واقف صوته بيرتعش و متوتر عينه حمرا من كتر القلق.
اهدا بس.. هي عندها شويه كدمات في جسمها وخبطة في دماغها عملتلها نزيف داخلي ادي لغيبوبة مؤقتة بس متقلقش كلها يومين والحالة هتستقر.
يعني يارا هتقوم بخير يا دكتور
إن شاء الله خير.
الشاب اللي خبطني
اتكلم بصوت هادي باين عليه القلق
هي كويسة!
ماهر أول ما لمح الشخص اللي كان السبب في الحادثة جرى عليه بسرعة وشه محمر وصوته متقطع من الغضب. مسكه من قميصه وشده بعنف لدرجة إن قميصه كان هيتقطع.
إنت بتسأل! إنت السبب.. دا أنا هوديك في ستين داهية لو جرالها حاجة!
الشاب رفع إيده وحاول يبعد ايد ماهر عن القميص بهدوء
حضرتك أنا مغلطتش.. هي اللي قطعت الطريق فجأة. ممكن تهدى وتسيب القميص.. إحنا في مستشفى ماينفعش نتخانق كدا.
ماهر صوته كان بيرتعش من كتر العصبية وكله غضب
إنت لسه ما شوفتش حاجة! والله لأندمك لو حصلها حاجة!
بس العجيب إن الراجل واقف ثابت.. ملامحه هادية ما حاولش حتى يرفع صوته. واتكلم بهدوء
حضرتك ممكن تقعد.. أنا فاهم إنك قلقان ومتوتر بس الانفعال مش هيغير حاجة. وبعدين إنت كدا ظالمني.. هي فعلا اللي قطعت الطريق فجأة وأنا ماكنش ليا ذنب.. دا طريق سريع.
ماهر رزع إيده بعصبية علي الحيطة اللي جنبه
امشي من هنا!
الشاب رد بنفس هدوءه
ماينفعش أمشي قبل ما أطمن عليها.
وانا بقولك امشي من هنا
فالعادة ماهر عمره ماكان بالعصبية دي ابدا وعمره ما أذي حد او غلط في حد.. بس لما لقاني بروح منه مقدرش يتحكم في عصبيته .
ممكن تهدأ وتستريح انا مقدر الوضع اللي انت فيه وانا لو مكانك هعمل كدا واكتر بس مش قبل ما اتفاهم انا همشي دلوقتي بس هرجع اتطمن عليها.
الشاب دا قرر انه يمشي ويرجع في وقت ماهر مايكونش فيه لان ماهر مستحيل يسمحله انه يدخل يشوفني
___
في بيت الجد
يا أهلا وسهلا.. يا أهلا وسهلا
وانا اقول البيت منور النهارده كدا ليه ازيك ياسما ياحبيبتي
طبعا ماهر كان وصل سما لجدو وبعدين طلع على المستشفى كان الشخص اللي خبطني اسعفني وسبقه
أبلة سماح.. جدو فين
سما كان باين علي وشها القلق ووشها مصفر وجسمها كله بيرتعش من الصدمة شافتني وانا سايحة في دمي مقدرتش تتمالك وكانت منهارة
اهدي ياحبيبتي.. مالك ياسما وشك مصفر كدا ليه.. بترتعشي ليه كدا وبعدين جاية لوحدك ليه فين اخواتك
مقدرتش تتمالك فا انهارت من العياط
يارا ...يارا خبطتها عربية ووقعت في الارض مقامتش كان كلها دم يارا ماتت
لا حول ولاقوة الا بالله العلي العظيم سترك يارب اهدي ياحبيبتي اهدي هي فين وحصل كدا ازاي
ماهر اخدها المستشفى
انا خايفه علي يارا انا بحبها مش عايزاها تسيبني.. يارا هتسيبني وتمشي انا عايزة اختي
جدو وخالوا سمعوا صوت سما طلعوا بسرعه علي الصاله خالو رياض كان ساند جدو وكان باين عليه القلق والخوف
سما!!! في ايه.. ايه اللي حصل يابنتي
جيتي لوحدك ازاي فين اخواتك وليه ماعنديش علم بوجودكم في ايه
سما لما شافت جدوا جريت عليه اترمت عليه وهي منهارة حبيبة قلبي
يارا عملت حادثة وفي المستشفى ياجدو.. يارا هتسيبني وتمشي ياجدوا انا خايفه
خالو رياض شدها من جدو ومسح دموعها
اهدي ياحبيبتي متقوليش كدا ان شاء الله يارا بخير
ماينفعش تعيطي كدا احنا قوايا صح
يعني يارا هترجع ياخالو انا خايفه عليها هي ممكن تسيبني وتمشي
جدوا رد عليها وصوته باين عليه الزعل
لا ياسما.. يارا هترجع يابنتي وهتبقي بخير ربنا كريم متعيطيش تعالي يابنتي قربي جنبي
اخدها جنبه ودموعه نزلت علي خده..
انا بقالي كتير ماشوفتكوش اكيد ربناا مش هيحرمني من شوفتها قدامي بخير واشوفها عروسة كمان ربنا كريم ياسما متقلقيش ياحبيبتي
شاور لمرات خالي علشان تاخدها
خودي سما فوق ياسماح مع البنات خليها تغير هدومها واعمليها لمون وخودي بالك منها.. وانت يا رياض يا ابني بينا علي المستشفى نتطمن علي البت واخوها
حاضر يا بابا ثواني هجيب العربية
سما طلعت مع سماح مرات خالي وجدوا وخالوا رياض طلعوا علي المستشفى
___
في المستشفى
ماهر كان قاعد قدام العناية علي كرسي وحاطط راسه بين ايديه زعلان ومخنوق وقلقان عليا.. فجأة الدكتور نادي عليه
أستاذ ماهر.. اتفضل دي أدوية محتاجينها من الصيدلية اللي تحت وبسرعة
ماهر قام بسرعة وعيونه علي باب العنايه
حاضر حالا هجيبه بس هي كويسه يادكتور بالله عليك تطمني
متقلقش يا ماهر ان شاء الله هتكون بخير
ماهر نزل بسرعه علشان يجيب الادوية
ولما نزل تحت الشاب اللي كان السبب في الحادثة كان قاعد تحت وممشيش ولما شاف ماهر نزل طلع هو علي طول
وقف عند باب العنايه وكان بيبص عليا من القزاز
وبعد لحظات كان ماهر جاب الادوية وطلع ولما شافه جري عليه ورمي كيس الادوية علي الكرسي اللي جنب باب العناية ومسكه من قميصه تاني بغضب
انت رجعت تاني ليه هو انا مش قولتلك تمشي من هنا انت مابتفهمش
انا طلعت أتطمن عليها بس
تطمن عليها!! اختي جوة بتصارع الموت وانت السبب في دا
قولتلك كذا مره مش ذنبي هي ظهرت قدم العربية فجأة
في وقت ماكانو بيتخانوا كان وصل جدو وخالو رياض المستشفى
بطيئة ساند علي العكاز وهو بيردد لا حول ولاقوة الابالله العلي العظيم
ماهر في ايه سيب الراجل عيب كدا احنا في مستشفى
هو السبب في حالة يارا هو السبب
خالو بص للشاب بس إتفاجأ باللي شافه
زين!!.. بتعمل ايه هنا
ماهر فلت ايده من القميص وبص لخالي بعصبية
بيعمل ايه هنا!!.. مابقولك هو السبب في حالة يارا هو اللي خبطها بالعربية المجرم.
الشاب بص لخالو وهو بيهز راسه بالنفي
والله ما قصدي هي اللي ظهرت قدام العربية فجأة ياعمي رياض انا ماليش ذنب
جدو كان وصل لحد ماهر اخده من ايديه وشده جنبه
وحشتني يا ابني وحشتني ياحبيبي.. اهدي وكل شيء هيتحل يارا هتبقي بخير بس انت اهدي ياحبيبي
ماهر سابه ودموعه علي خده
دي مش اختي ياجدي وبس دي أمي وبنتي يارا دي حياتي دي حبيبتي انا مقدرش اتخيل حياتي من غيرها ياجدي ما اقدرش
إن شاء الله هتبقي بخير ياحبيبي وهتقوم بألف سلامه بس مايصحش اللي بتعمله دا.. زين شاب كويس مايعملش كدا قصد دا قدر ومكتوب هو مالوش ذنب باللي حصل
يعني يخبطها باللي العربية ونقول قدر ومكتوب
أستغفر الله يا حبيبي.. وهو كان يعرف منين ان في الوقت دا هيظهر قدامه حد ويخبطه كلها أسباب ياابني كان مقدر ومكتوب وبإذن الله ربنا هيطمنا عليها
الشاب راح ناحية ماهر واتكلم بأسف وهدوء
انا أسف علي اللي حصل اتمني تكون مسامحني انا والله زعلان وقلقان زيك بالظبط
خالي قرب من الشاب وطبطب علي كتفه
حصل خير يازين ماهر قلبه طيب.. المهم كلنا ندعي ليارا تقوم بالسلامه
وبعدين طبطب علي كتف ماهر بنفس النبرة
مش كدا ولا ايه ياماهر
ماهر بصلهم كلهم وبص علي باب العنايه وقلبه بيتقطع وهز راسه
تمام.. انا هروح اودي الادوية للدكتور جوة
ماهر دخل للدكتور وجدو وخالو كانو واقفين مع زين.. وزين كان جواه أسئلة كتير وقرر يسألهم
انا بجد أسف علي اللي حصل واتمني تسامحوني
جدو حط ايده علي كتفه وقعد علي الكرسي وقال
قدر الله ماشاء فعل.. الحمدلله يا ابني إن شاء الله خير
زين بص لخالو وسأله
هما يقربولكم ايه !
ماهر ويارا وسما ولاد أختي الله يرحمها
كانو عايشين في القاهرة وشكلهم جايين زيارة بقالهم كتير منزلوش المنوفية من ايام وفاة أهلهم
زين بان عليه الزعل عليهم
تقصد يتامي الاب والام
أيوة يا ابني الله يرحمهم
الله يرحمهم ويغفر لهم يارب... انا مش عارف اقولكم ايه بجد حقكم عليا انا أسف
اللهم آمين... ماتقولش حاجه ادعي للغلبانة اللي جوة ربنا يشفيها ويرد عافيتها
ربنا يقومها بالسلامه يارب.. انا هستأذن علشان عندي شغل ضروري مضطر امشي وهرجع بكرا بإذن الله
مع السلامه ياابني.. خد بالك من طريقك الله يسترها عليك وعلينا
الشاب مشي وماهر خرج من عند الدكتور باين عليه التعب جدو وقف واخده جنبه وقعدوا
سلم أمرك لله ياماهر وقول الحمدلله وادعيلها يا ابني
لو جرالها حاجة انا..
خالو قطع كلامه
تف من بوقك ياماهر إتفائل بالخير ماتقولش كدا إن شاء الله هتبقي كويسه والله
يارب ياخالو يارب
الممرضة جات وطلبت منهم يمشوا لان الوقت إتأخر ومعاد الزيارة خلص وماينفعش يقعدوا
لو سمحتم ماينفعش القعدة هنا تقدروا تمشوا وتيجوا الصبح في معاد الزيارة واحنا مهتمين بالحالة وعاملين اللازم متقلقوش
جدو وقف وهو ساند علي ايد ماهر وبيبص لخالو
قوم ياماهر يا ابني نروح البيت انت تعبان يا ابني ومحتاج راحة ولقمة تتقوي بيها.. يلا يا رياض شوف عربيتك فين وانا هنزل مع ماهر
انا مش همشي واسيبها لوحدها ياجدو انا هقعد جنبها
ماينفعش يا أستاذ ممنوع
قوم ياماهر القعدة مش هتفيد بحاجة وبعدين انت محتاج تتقوي علشان لما تفوق تشوفك في احسن حالة
مش عايز اسيبها لوحدها.. هي مش بتحب المستشفى ولا ريحتها
معلش يا ابني هنرجع بكرا بإذن الله
ماهر واخيرا وقف بإستسلام للأمر ومسك ايد جدو
وقرر يمشي معاه للبيت
__________________
بيت الجد
جدو وماهر وخالو وصلوا البيت والكل كان مستنيهم ومنهم سما اللي كانت قاعدة بتعيط وماحدش عارف يسكتها واول ما سمعت صوت العربية طلعت تجري علي برا
يارا فين!.. ليه مجاتش معاكم يارا فين ياماهر ليه سيبتوها لوحدها
ماهر قرب منها وهو تعبان ووشه شاحب جدا واخدها في جنبه
يارا بخير ياحبيبتي هي بس ماينفعش تيجي معانا دلوقتي علشان في ادوية بتاخدها
طيب انا عايزة أروحلها عايزة اشوفها
ماينفعش دلوقتي ياحبيبتي الوقت إتأخر
بكرا بإذن الله هاخدك معايا
يعني هي كويسه وهترجع
ايوه ياحبيبتي هي بخير بس تعبانه شويه فا سيبناها ترتاح
جدو قرب منهم هو وخالو
يلا ياحبايبي ادخلو جوة تلاقيكم تعبانين من السفر واليوم كان تعب
دخلو كلهم جوة وباقي العيلة كلها كانت في انظارهم
سماح مرات خالي وابنها معتز وبناتها الاتنين منة ومريم سلمو علي ماهر وسألو علي يارا ودعولها تقوم بالسلامه وبعدين جدو طلب منهم يدخلو يرتاحو
خلاص بقي يا اولاد سبوهم يرتاحو
معتز خد ابن عمتك علي اوضتك يغير هدومه ويرتاح لحد ما امك تحضرلهم لقمة
وانتي يامريم خودي سما معاكي ترتاح شويه
في اوضة معتز
معتز جاب الشطنة بتاعت ماهر فتحها وطلعه طقم علشان يغير هدومه
خد ياماهر الحمام برا علي ايدك اليمين خد شاور وغير هدومك وتعالي ارتاح شويه
ماهر اخد الهدوم ودخل الحمام علشان ياخد شاو ويغير ومعتز كان بيطلع هدوم ماهر من الشنطة ويحطها في الدولاب
في اوضة مريم
مريم أخدت سما وطلبت منها ترتاح شويه
سما ارتاحي ياحبيبتي اعتبري الاوضة بتاعتك
وانا هنزل أجيبلك لقمة تاكلي وتنامي لانك تعبتي النهارده
منة دخلت عليهم
محتاجه حاجه ياسما اجبهالك
لا شكرا
مريم انا هقعد مع سما وانتي انزلي شوفي ماما
_____________
في اوضة
ماهر اخد شاور وخرج وكان معتز خلص ورص الهدوم كلها في الدولاب
ها ياماهر بقيت احسن
احسن ازاي بس وحتة مني في المستشفى الله وحده عالم بحالها
ان شاء الله هتبقي بخير وتقوم بالسلامه
يارب يامعتز يارب
طيب ياحبيبي انا هسيبك ترتاح وهنزل انا ورايا مشوار خد راحتك ماشي
ماشي
ماهر مدد جسمه علي السرير ومعتز نزل
في المطبخ
يلا يامريم خودي الصنية دي ووديها لماهر وخليه ياكل اوعك ينام قبل ماياكل
حاضر ياماما بس قولي يارب ياكل
هياكل دا يحبة عيني من صبحية ربنا وهو في المستشفى من غير اكل هلكان وتعبان
لازم ياكل
ماشي هحاول اخليه ياكل
وانا هاخد الصنية دي لسما هي كمان وشها مصفر وحالتها مش عاجباني
في اوضة معتز
ماهر كان نايم ومغمض عينه بس فتحها لما سمع صوت الباب بيخبط
مين
انا مريم ياماهر
اتفضلي يامريم
ماما عملتلك الاكل دا ونبهة عليا مطلعش من الاوضه دي غير والصنية فاضية
ماليش نفس يامريم انا هنام شويه
مش قبل ما تاكل انت عايزني اخد علقة ولا ايه
ماهر ابتسم ابتسامة هادية
علقة!.. انتي لسة بتاخدي علقة حتي بعد ما كبرتي
والله علي حسب هتاكل وتعفيني ولا هتكون السبب فيها
خلاص مش هاكل
يالهوي اهون عليك تشوفني بتضرب
ماهر قرب منها واخد الصنية
اكيد لا ماتهونيش وعلشان كدا هاكل لقمة صغيرة بس اعفيكي من العلقة
يبقي تكمل جميلك وتاكل علشان خاطر صحتك
وعلشان تعرف تصلب طولك
واجيب النفس منين
اخص عليك يعني الوش القمر دا مايفتحش النفس
ماهر ضحك وهو بيهز راسه يمين وشمال
لسة زي ما انتي لمضة
واحلويت كمان
مابقتيش القلبوظة مريم
لا قلبوظة ايه الحمدلله خسينا واحلوينا
طول عمرك حلوة
ياراجل ومين اللي كان بيتريق عليا ويقولي يا قلبوظة
كنت صغير بقي مش فاهم حاجه.. معرفش انك لما تكبري هتحلوي كدا
مريم حطت راسها في الارض من الكسوف
احمممم...اظن نفسك اتفتح دلوقتي
بصراحه.. ايوه
يبقي عايزة ارجع الاقي الصنية دي ممسوحة مسح
علم وينفذ يافندم
مريم ضحكت وخرجت من الاوضه جري وماهر بدأ ياكل.
في اوضة مريم
يلا ياسما ياحبيبتي تعالي كلي لقمة علشان تنامي
مريم هزت راسها وهي بتعيط
انا مش بعرف اكل من غير يارا انا عايزة يارا
بس ياحبيبتي لازم تاكلي يارا كلها يومين وتيجي
ولحد ماتيجي لازم تاكلي وتتقوي ياحبيبتي انتي خاسة ووشك مصفر ماينفعش تفضلي كدا
لا انا مش عايزة اكل انا عايزة اختي
منة قامت واخدت الصنية من امها وقعدت جنب سما
بصي انا جعانة وامي عامله الاكل ريحته تجنن.. بس انا كمان مش بعرف اكل لوحدي فا هناكل سوا
مش عايزة
لا وحياتك انا هموت واكل يلا بقي
مريم دخلت عليهم
ايه دا.. هو الاكل لسة زي ماهو.. طيب الحمدلله اصل انا جعانة موت وسعي يابت انتي وهي عايزين تاكلوا من غيري
مريم مسكت العيش وقسمته نصين وبدأت تاكل وتبصلهم
الاكل توحفة ياماما تسلم ايدك.. دوقي يامنة كدا
منة كمان اخدت عيش وبدأت تاكل
يالهوي علي الجمال.. انتي حاطة فيه ايه ياماما اول مره ادوق اكل بالحلاوة دي
سما بصتلهم وكان باين عليها هي كمان الجوع مأكلتش من الصبح ولما شافتهم بياكلوا نفسها اتفتحت
الاكل حلو
منة ومريم في صوت واحد.. توووحفة مدي ايدك يلا وسمي
سما مدت ايديها وبدأت تاكل معاهم
هو دا بقي في حد يقاوم الاكل
منة ضحكت وبصت لمريم
طول عمرك تموتي في الاكل
ضحكو كلهم
طيب يابنات هسيبكم انا وانزل اشوف جدكم لو محتاج حاجه
الليلة عدت علي خير ماهر اكل ونام وكمان سما والبنات اكلوا وناموا مع بعض في نفس الاوضة
تانى يوم
رايح فين ياماهر
هروح المستشفى ياجدي
لسة بدري ياحبيبي خليك نفطروا سوا ونروح مع خالك
لا ارتاح انت انا هروح لوحدي ولو فاقت هديكم خبر
سما نزلت على السلالم جري
ماهر.. ماهر استني انا جاية معاك
خليكي ياسما انا هتطمن عليها وجاي
لا ماليش دعوه انا عايزة اشوف يارا.. انت قولتلي هتاخدني معاك النهارده
جدو رد عليه
خودها معاك يا ابني برد نارها وانا شويه وهاجيلك انا وخالك
طيب البسي وانا مستنيكي برا
عدي 10دقايق سما لبست ونزلت وخرجت لماهر
يلا انا جاهزة
طيب يلا بينا.
_______________
في المستشفي
ماهر وسما وصلوا وطلعوا علي طول علي العناية
علي طول
انت جاي هنا ليه!
الشاب اللي خبطني زين كان وصل قبل ماهر وكان واقف برا مستني الدكتور علشان يسألوا عن حالتي
انا جيت اتطمن عليها
واتطمنت! يلا امشي بقي
ماهر كان لسة هيتخانق معاه بس فجأة الدكتور طلع وقطع حديثهم واتكلم
يارا.!!
........ يتبع
يارا أختك فاقت.. اتفضل لو حابب تشوفها
ماهر سمع الدكتور وهو بيقول فاقت الابتسامة اترسمت علي وشه تلقائيا ومسك سما جنبه والفرحة مكانتش سيعاه
يارا فاقت ياسما يارا بخير
زين كان واقف وهو كمان اتبسط بالخبر قرب من ماهر
الحمدلله على سلامتها
ماهر اتجاهله واخد سما ومشي ورا الدكتور
داخل العناية
ريحة الادوية وصوت الاجهزة مكانش احسن حاجه
منظر يجيب ضيق تنفس كدا لوحده
انا كنت نايمة علي السرير ولابسة ماسك الاكسجين ومفتحة عنيا وباصة للسقف بحاول استوعب انا فين وايه اللي حصلي ماهر دخل هو وسما وكانو مبسوطين لما شافوني
ماهر قرب مني
ألف حمد وشكر ليك يارب.. الحمدلله
انتي كويسه يا يارا
ماكنتش قادرة اتكلم كنت بغمض عيني وافتحها بمعني اني كويسه
سما قربت هيا كمان وبتعيط
وحشتيني يا يارا.. انا خوفت قوي عليكي الحمدلله انك بخير
ماهر
قلقتينا عليكي يا يارا.. انتي مش عارفه انا كنت حاسس بايه الحمدلله يارب انك بخير ياقلب اخوكي
سما
هي هترجع معانا دلوقتي صح
الدكتور
للأسف ماينفعش هي محتاجه تقعد يوم كمان تحت المراقبة وبعدين هكتبلها علي خروج
سما قربت مني ومسكت ايدي
خلاص انا هقعد معاها انا مش عايزة اسيبها لوحدها هنا
ماهر قرب من سما
خلاص ياسما لازم نسمع كلام الدكتور.. كلها يوم ويارا هترجع معانا
كنت سمعاهم ومش قادره اتكلم دموعي نزلت علي خدي بس كنت مبسوطه بشوفتهم وبحمد ربنا في سري اني بخير
زين كان واقف برا علي الباب وكان بيبص علينا من القزاز
الدكتور
بعد اذنكم لازم تطلعوا دلوقتي ماينفعش تفضلوا في العنايه اكتر من كدا ممكن تيجو بليل في معاد الزيارة التانيه
ماهر هز راسه وبعدين قرب مني
متابعة القراءة
