رواية بيدي لا بيد عمرو كاملة بقلم رانيا الطنوبي(الفصل الواحد والأربعون 41 )

مالك يا ماما في حاجة
جلست مديحة علي احدي الكراسي الموجودة بالمطبخ و ردت.. قلبي مقبوض اوي يا عبير 
ربنا يستر
جلست عبير الي جوارها و ردت.. ليه في حاجة
مديحة.. مبقاش عاجبني حال اخواتك و أنت اولهم.. علا عايزة تفسخ خطوبتها و علاء و ريم و ميار و علي باحسهم زي ما يكون في بينهم حاجة بس محدش منهم عايز يتكلم.. مش عارفة عايزة اعرف عمرو يكلمهم بس باقول بلاش.. خليهم يحلوا مشاكلهم مع بعض احسن
زفرت عبیر و ردت.. ربنا يصلح الحال
استغربت مديحة و سألت.. امال أنت مالك يا عبير
تنهدت و ردت.. مالي يا ماما ما انا كويسة
ابتسمت مديحة و ردت.. بالله عليكي يا عبير بقي أنت عبير.. ايه مصطفى مزعلك و لا ايه ردت عبير بضيق.. ابدا.. بس الظاهر ان عمرو لازم يعمل وقفة جماعية معانا.. يظهر في
شوطة جايلنا كلنا ربنا يستر
وضعت مديحة يدها علي كتف عبير و ردت.. عموما مصطفى ابن حلال.. لا بتاع كده و لا کده و الرجالة كلها عقلها قد كده.. ديتها كلمتين كويسين منك يا بنتي السياسة تلين الحديد.. بلاش البابور اللي كل شوية بيهب في الناس
طرق باب شقتهم فاتجهت عبير لتفتح و هي تستوقف والدتها.. ده اكيد علي
دخل علي و قد بدي عليه الابتسام و هو يلقي السلام.. سلام عليكم
اتت مديحة من المطبخ ترد السلام.. وعليكم السلام يا علي
اتجه الثلاثة للجلوس وعندها سأل علي باستغراب.. عبير أنت مالك ساكتة مش بعادة يعني
زفرت و ردت.. هو انت مترتحش الا لما تنكش.. انا كويسة و زي الفل
ثم اتجهت لباب الشقة.. انا حاطلع بقي عشان احضر الغدا.. عايزة مني حاجة يا ماما
ردت مديحة.. سلامتك
اتجهت للصعود و عندها سأل علي باستغراب.. مالها عبير
ردت مديحة.. ربنا يصلح الاحوال يا ابني
تنهدت بضيق ثم قالت.. انا عايزك تتكلم مع علا يا علي انهاردة.. اهي بتحبك و بتسمع كلامك و بتقتنع برأيك
سأل بقلق.. بخصوص ايه
ردت مديحة بضيق.. علا عايزة تفسح خطوبتها مع كريم وقلعت الدبلة الصبح و قالتلي قبل ما تمشي لو السما انطبقت علي الارض مش حاتجوز كريم
زفر علي و رد.. و الله يا ماما لو علا فعلا مش عايزة الموضوع.. فانا عن نفسي مش حاغصب عليها تكمل
قام من مكانه و اكمل.. عموما انا طالع اتغدي و حانزل بعد الغدا اتكلم معاها المهم بس اهم حاجة ندور علي اللي علا عايزاه
مديحة.. يعني أنت بدل ما تعقلها حتشجعها 
رد علي مهدنا.. يا ماما يا اما علا وكريم يكملوا في علاقتهم وهما راضين عنها مش مفروضة عليهم.. يا اما كل واحد منهم يشوف حاله.. ده الاحسن لهم بدل ما يندموا واحنا كمان . نندم
ثم وقف عند الباب.. انا طالع عايزة حاجة
مديحة.. سلامتك يا ابني
نظرت له و هو يعاود الاتصال مرة اخري و سألت.. في حاجة يا علاء
وقف بالسيارة بسبب الاشارة و رد.. ابدا باشوف ريم.. عايزها تلبس لحد ما اروح
سألت سهيلة بضيق. . هو احنا مش كنا حنخرج سوا انهاردة
زفر علاء ورد.. لا مش حينفع انهاردة.. أروى تعبانة و حنروح بها للدكتور
ردت سهيلة برقة.. حبيبتي كميلة الف سلامة عليها
حينها كانت تنزل ريم من عيادة طبيب الاطفال و استوقفت احدي سيارات الاجرة.. تحركت السيارة بريم بينما انفتحت الاشارة و اتجه علاء يمينا ليمر بسيارته الي جوار سيارة
الاجرة التي كانت تركبها ريم.. صدمت ريم فالتفتت لتتأكد من انها سيارة زوجها و استغربت من مروره بهذا الطريق و لكن سرعان ما لاحت صورة من جاورته امامها و عندها .
صمتت
مسافر
قالتها بصدمة و هي علي يقين انه يكذب وعندها رد بثقة.. ايوة يا ميورة.. عندي شغل انتداب في فرع الشركة باسكندرية
ثم مد يده ليطعمها في فمها و اكمل.. هو اسبوع من السبت للاربعاء و حارجع الخميس ان شاء الله
أومأت ميار رأسها و ردت.. طب ممتاز اوي انا حاجي معاك و اقعد عند ماما و انت ممكن تبقي تعدي عليا ايه رأيك
تغير وجه علي و رد بضيق.. لا طبعا مش حينفع لاني مش حسافر لوحدي عشان اقدر اخدك معايا.. انا حيكون معايا رجالة زمايلي مسافرين.. تقدري تقوليلي حاخدك معايا ازاي
ابتسمت میار و ردت.. خلاص يا علي انا ممكن اسافر احصلك علي اسكندرية و انت تكون مستنيني
رد علي بضيق.. تسافري من القاهرة لاسكندرية لوحدك.. ما ينفعش طبعا لازم يكون معاكي حد ما ينفعش تسافري لوحدك
ردت ميار بضيق.. هو انا مسافرة بلد تانية.. ده انا رايحة عند ماما يا علي
رد علي بفراغ صبر.. و انا مش معترض.. انما مدام حتكوني علي سفر لازم يكون معاكي حد
و انا مش حينفع اجي معاكي يبقي أنت مش حينفع تسافري لوحدك
صمتت ميار للحظات ظن علي عندها انه استطاع انهاء الموضوع و لكنها عاودت الحوار و
سألت.. طب ايه رأيك نسافر يوم الجمعة و نبات عند ماما و الصبح انت تروح علي الموقع
صرخ عندها بعصبية.. يوووووووووووووو يا ميار ما انا قلت مش نافع يبقي مش نافع
نظرت میار باتجاهه و عندها قامت من مكانها منهية تناول طعامها.. استوقفها على بيده و
جذبها لتعاود الجلوس و عندها جلست في صمت فاردف علي.. يا ميورة.. انا طالع مع مجموعة تبع الشغل و للاسف حتحرك معاهم من ساعة السفر الصبح لحد ما الشغل يخلص وكده او كده مش حاعرف ابقي معاكي يعني أنت حتكوني هناك لوحدك و حتتضايقي اني مش عارف اجيلك و مامتك حتتضايق مني و علي ايه كل ده 
قبل رأسها و اكمل.. متزعليش و الله اول ما الظروف تسمح حاعوضهالك.. ماشي أومأت رأسها و ردت و هي مصتنعة ابتسامة علي وجهها.. خلاص يا حبيبي و لا يهمك 
المهم تروح وترجع بالسلامة و نبقي نعوضها بعدين
عاود علي تقبيل رأسها بارتياح و رد.. ربنا يخليكي ليا يا ميار
عاودت تناول طعامها و تحدث بطريقة كان باطنها السخرية رغم ان علي لم يتوقع ذلك و
سالت.. و طبعا بكرة برضو عندك شغل بعد الضهر في الموقع مش كده
رد علي و هو يستكمل تناول طعامه.. اه يا حبيبتي
ثم ابتسم لها و اكمل.. تعرفي يا ميورة انا بس اخلص من الشغل اللي واجع دماغي و ليكي عليا نعمل شهر عسل من جديد.. ايه رأيك
ردت ميار بابتسامة ساخرة.. طبعا يا حبيبي.. انت بس خلص شغلك و حيكون ساعتها احلي شهر عسل
نظر يحيى باتجه والده و هو يرتدي ملابس الخروج فعلا الاستغراب وجهه و سال.. خارج يا بابا
عندها خرجت نسرين من غرفتها مرتدية ملابس الخروج هي الاخري فزاد الاستغراب و سألت يمنى.. ده انتم خارجين انتم الاتنين بقي
ابتسمت نسرين و ردت.. ايوة حنجيب شوية حاجات و حنرجع علي طول.. لو اتاخرنا انا محضرة العشا.. ابقوا اتعشوا
يوسف.. انتم ناويين تتاخروا
سأل عمرو باستغراب.. هو مين اللي بابا مين.. بصوا لما ارجع ابقي اكتب تقرير مفصل.. دلوقتي بقي سبونا ننزل
نظر الي نسرين و اكمل.. مش يلا بينا
حينها سألت يارا.. طب بابا هو موبايلك لسه مقفول
عمرو متذكرا.. يا خبر.. ده انا نسيته خالص.. عموما حد يحطه علي الشاحن و يفتحه لحد ما
ارجع.. خلاص
ثم نظر لنسرين.. أنت معاكي موبايلك
نسرين.. ايوة يا عمرو
عمرو و هو يتجه للخروج.. طب تمام لو في حاجة كلمونا علي موبايل ماما
زفرت و القت بالموبايل الي جوارها بغيظ و هي تتمتم.. ماشي يا عمرو و الله لاوريك
دخلت الي غرفتها و قالت.. و الله لتتجنني قريب
ردت نهلة بغيظ.. في حاجة مش طبيعية خالص.. ده لا راح الكلية و لا المستشفي و لا العيادة و موبايله قفله.. في ايه لكل ده
ردت والدتها.. ما يمكن سافر اسكندرية مع مراته بدل ما يخدك أنت
ردت نهلة ببالغ غيظها.. انا لو مردش عليا حاخدها من قصيرها و اروحله بيته قدام اهله و اللي يحصل يحصل و اهم بيتجمعوا يوم الجمعة واستحالة لو روحت ينكر قدامهم انا مين و ساعتها حاكون حطيته قدام الامر الواقع
جلست والدتها الي جوارها و سألت.. و لما يحس انك بتلوي دراعه.. يا عالم ساعتها اللي حيحصل
زفرت و اكملت.. أنت خليكي ورا تليفونه و لما يرد قوليله اني عايزاه يجيلي بكرة و لما يجي انا حانهي معاه و حاحط معاه النقط علي الحروف
سالت نهلة بقلق.. حتعملي ايه
ردت والدتها.. حتشوفي بس أنت خليكي ورا تليفونه لحد ما يرد عليكي
قررت سعاد الرد علي الهاتف بالنيابة عن ريم و عندها قالت.. طب شوية و هي حتكلمك
اصلها نامت مع أروى و شكلها تعبانة هي كمان.. لما تصحي حاخليها تكلمك
رد علاء بضيق.. ماشي يا طنط.. طب هي أروى كويسة حرارتها نزلت
سعاد.. ايوة يا ابني بقت كويسة.. الحمد لله وحرارتها احسن و عموما ريم حتكلمك ان شاء الله
علاء.. طب يا طنط مع السلامة
وضعت سماعة الهاتف واتجهت لريم التي كانت الي جوار أروى علي السرير و سألت.. هي ايه الحكاية بالظبط يا بنتي.. أنت جاية غضبانة و لا ايه
تنهدت ريم و سألت.. هو علاء اللي كان علي التليفون
ردت سعاد بقلق.. اه و شكله مضايق اوي
بكت ريم رغما عنها و ردت.. بيعرف يضايق اوي
اطل كريم برأسه و هو يبتسم و قال.. ام أروى عندنا يا مراحب يا مراحب
حاولت ريم مسح دموعها و ردت.. ازيك يا كريم
سأل كريم بقلق.. مالك يا بنتي في ايه.. علاء زعلك في حاجة
تنهدت و ردت بهدوء.. انا انا عايزة اطلق
طلاق ايه يا ميار أنت اتجنينتي يا بنتي
ردت ميار باكية بينما كانت تتحدث الي والدتها في التليفون.. انا خلاص يا ماما مخنوقة اوي و
مش قادرة استحمل اكثر من كده.. و على مبقاش حاسس بيا
ردت اماني بضيق.. طب صلي علي النبي كده يا بنتي.. دي شكلها عين حلوة و يا ستي بس اصبري و ربنا حيكرمك أنت و علي عن قريب ان شاء الله و حتقولي ماما قالت
ردت میار ببعض الهدوء.. عليه الصلاة و السلام.. يا رب يا ماما
اماني.. هو علي عندك
ميار.. لا نزل عند مامته و انا قلت اكلمك لاني كنت مخنوقة اوي.. ادعيلي يا ماما بالله عليكي
ربنا يهديكي يا علا يا رب
ردت علا بعصبية.. لا حول و لا قوة الا بالله.. هو يقبل موضوع انا مش عايزاه يا اما اطلع وحشة
رد علي مهدنا.. لا يا علا بس أنت فهمينا أنت ليه عايزة تفسخي الخطوبة و انا اول واحد حاقف معاكي و اجيبلك حقك
دخل علاء معقبا.. خطوبة مين اللي حتتفسخ
ردت مديحة بضيق.. علا وكريم 
علاء لعلا بضيق.. ايه اللي حصل كريم عمل ايه
يا بنتي فهميني احسن من الحيرة دي ده طلاق أنت فاكراه لعبة
ردت ريم باكية.. مش لعبة بس انا خلاص ما بقتش مستحملة و مش عايزة اتكلم في حاجة يا كريم.. نفسي بس اغمض عين و افتح التانية الاقي نفسي خلصت من الموضوع ده و افوق بقي من الخناق و المشاكل و النقار و الخلاف علي اتفه الاسباب
سأل كريم بضيق.. طب أنت فهميني في حاجة معينة حصلت و لا كده و خلاص
صمتت و اكملت بكاء فاكمل كريم.. يا بنتي انا اخوكي الكبير و لو في حاجة انا حاقفلك و اجبلك حقك و كمان حاتكلم مع عمرو اهو كبير العيلة و لو في حاجة هو اللي حترجعله
ظلت علي صمتها فسأل.. اتصل بعمرو دلوقتي و لا اقوم اروحلهم يا بنتي لا خاليها يوم الجمعة كده كده هما جايين
علاء لعلا.. طب لو كريم عمل حاجة قولي انا كده كده رايح اجيب ريم بكرة ممكن اقعد اتكلم معاه
علا لعلاء.. لا خلاص
علي العلاء.. خلينا نكلم عمرو الاول و بعد كده نشوف حنعمل ايه
مشوا متجاورين و قد شابكوا ايدهم و من أن لاخر ينظرون الي المحلات و في ايديهم الاخري كانز يشربون منها ويتبادلون اطراف الحديث وعندها سألت نسرين.. عجبتك الحاجة اللي اشترينها لحضرتك يا دكتور
رد عمرو مبتسما.. اكيد
ثم مازحها.. تعرفي حاسس أنه مش فاضل غير اني اصبغ شعري بني و احط عدسات زرقا و
ابقي مهند
ضحكت نسرين بشدة و ردت.. لا مهند مين.. مهما حصل مش حيكون في زي عمرو
السويفي ده نسخة فريدة من نوعها لا نزلت و لا حتنزل
استوقفته اجابتها فابتسم و سأل.. أنت شايفة كده
تنهدت و ردت.. أكيد
شعر بسعادته و عندها وقف للحظة و نظر