رواية أنا لها شمس الجزء الثاني ( الفصل 6 إلى 9 ) بقلم روز أمين
الفصل السادس
حول تلك الطاولة الصغيرة بمسكن حسين البنهاوي اجتمعت العائلة حولها بصحبة يوسف وشقيقته التي توسعت ابتسامتها وكاد قلبها أن يخرج من مكانه جراء سعادتها البالغة تشعر وكأنها سمكة عادت للمياة بعد أن كادت تلفظ أنفاسها على الشاطئ
تحدثت مروة بحفاوة وهي تقوم بوضع الطعام داخل الوعاء الخاص بيوسف
كل يا يوسف ومتتكسفش ده بيت عمك يعني بيتك يا حبيبي
واسترسلت بملاطفة كي تحثه على الإندماج
ولا يكون أكلي مش عاجبك ومكسوف تقول
أجابها بوقار وابتسامة هادئة
بالعكس يا طنط الأكل طعمة حلو جدا تسلم إيد حضرتك
تطوعت زينة بالحديث بمرح على غير عادتها
يوسف أكلته ضعيفة يا مرات عمي
واسترسلت بمشاكسة وهي تتطلع إلى شقيقها
أصله رياضي ومبيحبش يتخن ويبوظ شكله
تنهدتتقى الصغيرة البالغة من العمر سبعة عشر عاما وهي تنظر إليه بهيام مراهقة وتقول
عنده حق خليك كده يا يوسف وبلاش تتخن كدة فيك شبه من الممثل أحمد عز.
ابتسم بمجاملة وهو يقول
متشكر يا تقى
تحدث حسين إلى إبن شقيقه بحميمية فهو يكن له الكثير من الحب بعيدا عن مساعداته المادية له
كل يا ابني واستمتع بنعمة ربنا وأشكر فضله الأكل ده متعة ونعمة من نعم ربنا وطالما ربنا موسع عليك متحرمش نفسك إنت لسه شاب وصغير
ابتسم وبدأ بتناول الطعام ليتحدث حسين إلى تلك الجميلة التي طالما اعتبرها إبنة ثالثة له وعاملها بما يرضي الله
عاملة إيه يازينة في كليتك!
أجابته بابتسامة راضية
الحمدلله يا عمي الدراسة كويسة وأنا اتأقلمت بسرعة معاها
مالت عليهاجنة لتهمس بمشاكسة
وأخبار مزز الكلية إيه مفيش جديد حاجة كده ولا كده
همست بعدما تصبغت وجنتيها باللون الأحمر خجلا
إيه الكلام اللي بتقوليه ده يا جنة إنت عارفاني بردوا بتاعة الحاجات دي
ابتسمت الفتاة بشدة على خجل إبنة عمها المبالغ به لتقول بملاطفة
عمرك ما هتتغيري يا زينة هتفضلي زي ما أنت بروطة في مشاعرك
مش عاوزة أتغير أنا حابة نفسي كده إطلعي إنت منها يا ست جنة...قالتها بنبرة جادة لتضحك الفتاة وهي تقول بمداعبة
خليك لحد ما ييجي اللي يوقعك على بوزك وساعتها هتيجي لحد عندي وتحكي لي
مش هيحصل...نطقتها زينة وهي تنظر بمقلتي جنة بتحدي قابلته الأخرى بهزة رأس ساخرة قطع همساتهما يوسف حيث نطق موجها حديثه إلى أحمد الذي يصغره بعام واحد
إنت في كلية إيه يا أحمد
نطقت جنة تلك المشاغبة كي تلطف من الأجواء
لهو إنت كل ده متعرفش هو في كلية إيه يا يوسف! ده أنت ليك سنتين داخل طالع علينا
أجابها بابتسامة خافتة
مجتش فرصة نتكلم في الموضوع يا جنة
ولا يهمك يا هندسة...قالها أحمد ليتابع حديثه بملاطفة
أنا يا سيدي في أولى حقوق حلوان
وما أن نطق بكلمة حقوقحتى تزلزل قلب الأخر وكأن وقع الكلمة عليه أصبح مؤلما فكلما ذكرت أمامه الكلية تذكر حلمه الضائع وكيف لحقت به جميع أحلامه بتسلسل مريب وسريع بلحظة تذكر حبيبته البريئة وجعه مثلما أطلق عليها ولقبها سأله الشاب بعدما رأى شروده
روحت فين يا هندسة!
نطق بابتسامة مزيفة
موجود يا متر
خرج صوت مروة معترضا وهي تقول لأنجالها
سيبوا إبن عمكم ياكل اللقمة بنفس وبعد العشا إبقوا إرغوا براحتكم
بعدما انتهوا من تناول الطعام إنتقل حسين وابن شقيقه إلى شرفة المسكن يتناولان مشروب الشاي الساخن نطق حسين بكلمات حذرة
أبوك بعت لي حد من طرفه من يومين وطلب مني رقم تليفونك
اتسعت عينيه ذهولا ليتابع الاخر بعدما ارتشف بعض الشاي
بيقول عاوز يكلمك ويطمن عليك إنت واختك ويشوف لو ناقصكم حاجة بس أنا مرضتش أدي له رقمك إلا لما استأذنك الأول
تسمرت ملامحه لبرهة وبدون سابق إنذار انطلقت ضحكاته الساخرة دون توقف تحت نظرات حسين المتعجبة من حال الشاب حاول تمالك حاله وتوقيف قهقهاته لكن بائت جميعها بالفشل لينطق من بينهم قائلا باعتذار
أنا آسف يا عمي بس حقيقي مش قادر أوقف ضحك
تعجب حسين ليسأله باستغراب
هو أنا يا ابني قولت لك نكتة علشان تضحك بالشكل ده!
نطق ومازال مبتسما
هو اللي حضرتك قولته ده مش نكتة يا عمي دي أفيه الموسم زي ما بيقولوا
وبلحظة إحتدم غيظا واحتدت نظراته كالصقر ليهتف ناطقا بسخط ظهر بعينيه
حضرته افتكر الوقت إن عنده عيال وجاي يسأل عليهم!
وصاح معترضا بتجهم
كان فين زمان لما كنا محتاجين له كان فين وأنا بتربى في بيت راجل غريب وطول الوقت فاكر إنه أبويا
أشار بكفه للداخل ليتابع مسترسلا بقهرة تسكن قلبه وتستوطنه منذ أن علم بوجود شقيقته ورأى إزدراء حالتها ككل
كان فين والمسكينة اللي جوة دي عايشة عالة عليكم ومحملاكم فوق طاقتكم لأن أبوها راجل أناني كان فين وهي بتتقطع كل يوم وهي حاسة إنها عبئ وحمل تقيل على كل اللي حواليها دمرها بأنانيته وخلاها هشة وضعيفة ولحد الان مش عارفة ولا عندها القدرة إنها تواجه المجتمع
توقف لبرهة ثم رفع حاجبه ليسأله متهكما
الوقت بس إفتكر إن عنده ولاد وجاي يسأل عليهم!
كان يستمع لصرخات الشاب بقلب يتقطع وعينين تنظر أرضا لا تقوى على المواجهة يعلم صحة ما يقوله وداخله حزين تحدث بعدم اقتناع لكن لابد من النصح
أنا عارف إن عمرو غلط في حقكم كتير بس يا ابني ده في الأول وفي الاخر أبوكم وربنا أمركم بطاعته وبره
لا يا عمي ربنا عمره ما يأمر بالظلم...ليتابع بجمود وصلابة
أنا مش مطالب أبر راجل مفيش أي حاجة تربطني بيه غير إن إسمي محطوط قبل إسمه في البطاقة
راجل أناني عمره ما فكر فيا ولا عمل حساب لوجودي في الحياة
نطق حسين كي يهدئ من روع ابن شقيقه الثائر
إزاي بتقول كده على أبوك يا يوسف ده عمره ما حب في حياته حد قد ما حبك!
إستشاط داخله غضبا قبل أن ينطق بحده
مش صحيح الحب مش مجرد كلام إنشا بنردده الحب فعل خوف على الغير الحب أب بيحترم ولاده وحريص على صنع مستقبل أفضل ليهم
وتابع بجرح غائر ينزف دما
الراجل اللي إنت بتقول عليه أبويا كان سبب رئيسي ومباشر بتدميري من كل النواحي سواء العلمية أو الأدبية أو حتى الإنسانية.
بس يا ابني...قاطعه ليهب واقفا لينهي ذاك الحديث الغير مرحب به لديه
أرجوك يا عمي كفاية إحترم عدم رغبتي في الكلام عنه
وتابع وهو يشير إلى بهو الردهة
أنا هروح أقعد شوية مع أحمد والبنات قبل ما نمشي بعد إذن حضرتك.
قال جملته وانطلق كي لا يعطي فرصة لفتح الموضوع تنهد حسين ثم وضع رأسه بين كفيه بحزن وقلة حيلة.
٭
كان يجلس بشرفة الردهة الخاصة بمسكن أبيه ولج إليه حاملا قدحين من القهوة الساخنة وهو يقول بملاطفة بعدما قرر التخفيف من وطأة حزن ولده الذي أصبح ملازما له منذ ما حدث بينه وبين أهل زوجته
عملت لنا كوبايتين قهوة وقولت أجي نشربهم مع بعض
تطلع إلى والده بعينين مهمومتين فتابع الرجل بملاطفة
قولت نتكلم شوية قبل ما أمك تيجي من عند خالتك سناء وتكتم على نفسنا زي عادتها
استطاع رسم البسمة على فاه نجله فتحدث من جديد
أيوا كده يا ابني إضحك وزيح الهم خليه يبعد عنك ويسلاك
نطق بنبرة خافتة تدل على إرهاقه
انا تعبت قوي يا بابا حاسس نفسي مشتت مبقتش عارف إذا كان اللي بعمله ده صح ولا غلط
ناوله كوب القهوة ثم أجابه بخبرة أعوام كثر
أنا قولت لك من الأول بلاش تمشي ورا كلام أمك وأحمد ربنا على كل النعم اللي إنت فيها
اتسعت عينيه ذهولا من حديث والده المدين ليجيب بحدة
ومين اللي قال لحضرتك إن أنا مش حامد ربنا مش معني إني حزين على مستقبل بنتي اللي ضاع وبحارب على اللي لسه جاي أكون سيء ومش بحمد ربنا
وتابع بحيرة وقلب يتمزق كلما تذكر
يا بابا دي بنتي الوحيدة إنتوا عاوزيني أرمي بنتي لواحد أهله كلهم مجرمين وابوه هربان بره البلد
تنهد الرجل ثم تحدث بنبرة تعقلية
محدش طلب منك تجوزها لابن مرات فؤاد من حقك كأب تدور لبنتك على الأحسن والافضل
وتابع ناصحا
بس بلاش تعامل الولد بعنف علشان متكسبش عداوة امه وفؤاد كمان خليك ذكي يا دكتور وامشي معاهم زي ما طول عمرك ماشي وبالنسبة لمستقبلها ده ربنا وحده اللي يعلمه مش يمكن لو كانت دخلت نيابة كانت مسكت قضية وأساءت الحكم فيها وكانت سبب لدخولها النار ولا مسكت قضية لناس كبيرة في البلد او إرهابيين وصفوها زي اللي اتصفوا قبلها
وتابع بيقين
إرضى يا ابني وآمن بالقدر
أومأ برأسه وانتهيا من شرب القهوة حمل والده الاكواب ودخل ليقضي فرض الصلاة وتركه وحيدا شاردا فيما وصل إليه صدح رنين هاتفه رفعه ليزدرد ريقه حين رأى نقش اسم زوجته فمنذ ذاك اليوم لم يتحدث كلاهما للآخر فتح الزر سريعا لينطق متوترا
إزيك يا فريال الولاد كويسين
قال جملته الأخيرة حين وجد صمتها فأجابته بصوت حاد دل على مدى استيائها منه
الولاد بخير أنا بتصل بيك علشان ترجع بيتك بيسان تعبانة ومحتاجة لك جنبها
تعبانة إزاي!...نطقها بلهفة وهلع لتجيبه بهدوء
نفسيا يا دكتور ولا حضرتك ناسي اللي حصل لها!
قالتها لائمة مشيرة لما حدث بفضله فنطق هو في محاولة منه لفتح الحديث
فريال أنا...
قاطعت حديثه بحدة
أنا مضطرة أقفل لأني رايحة عند ماما ياريت ترجع بسرعة علشان نفسية
حاضر يا فريال... قالها مستسلما لتنطق بنبرة جادة جعلته يرتعب
مضطرة أقفل
نطقتها وأغلقت الهاتف سريعا مما جعله ينظر بالهاتف مذهولا متى أصبحت بتلك القسوة يبدوا أن معركته الأخيرة جعلته يخسر الكثير من محبة واحترام من حوله وأولهم زوجته الحنون.
قطع شروده دخول والدته التي حضرت من الخارج وسألته باستغراب لحالته
اللي واخد عقلك يا دكتور سرحان في إيه
قص جميع ما حدث عليها لتنطق بابتسامة شامتة
يظهر إن الهانم بنت الأكابر بدأت تحن بس مكسوفة وبتجيبها في العيال
تطلع عليها تائها لتتابع ناصحة
عاوز نصيحتي إقعد لك كمان اسبوع وطنشها ولا تعبرها هتلاقيها جيالك زاحفة لحد هنا تترجاك علشان ترجع معاها
دقت على كفيها وتحدثت
ساعتها بقى تقعد وتحط رجل على رجل وتملي شروطك عليها وأولهم حق عيالك في المال السايب اللي سلموه للفلاحة مرات أخوها
واسترسلت بتحريض كالشيطان
لازم تخليها تكلم ابوها في موضوع حقها في الشركة يا ماجد
اجابها كي يحثها على ترك الامر ونسيانه
يا ماما سبق وقولت لك إن سيادة المستشار علام كتب كل أسهم الشركة لفؤاد بعد ما خلف ولاده التوأم وحط مبلغ لفريال في البنك مقابل حقها في الأسهم
تحولت ملامحها لغاضبة وصاحت معترضة
وهي سكتت من خيبتها أهي فلوسها لسه مرمية في البنك بنفس القيمة والشركة كل يوم سعرها بيزيد لما بقت بمليارات المليارات
وتابعت بجنون وحدة
ده حرام يا ناس وميرضيش رينا وإنت لازم تخلي مراتك تتكلم مع ابوها واخوها
هنرجع للموضوع ده تاني يا نوال...جملة حادة قالها عليوة ليتابع وهو يشير لنجله
بلاش تسمع كلامها وتصغر نفسك قدام الناس يا ابني سيبك من أمك وقوم جهز نفسك علشان ترجع بيتك لمراتك وولادك
زفر بحيرة تملكت منه ومازاد الأمر سوءا هي مناوشات والديه الحادة التي بدأت للتو وكالعادة بدأ كلا منهما رمي التهم على الآخر تلك الفترة هي أسوء فترات حياته يعيش حالة من التشتت والضياع ساخطا على نجلته وحلمه بها التي اضاعته من بين يديه للمرة الثانية ناهيك عن إصراره القوي برفضه لإرتباط يوسف منها بالإضافة لتلك الإيثار واستحواذها على ثروة العائلة التي كانت ملكا لأنجاله قبل مجيئها الأسود هي وصغيرها إلى قصر علام الزين.
٭
ولچت للحجرة الخاصة بها وخليل الروح وجدته يجلس فوق السرير يتوسطه مستندا بظهره للخلف يضع جهاز الحاسوب الخاص به فوق ساقيه يتصفح من خلاله أحد المواقع الخاصة بعمله تجاهل دخولها شرعت بخلع المئزر عنها وقامت بتعليقه وهي تقول
الولد مالك بقى مجرم حرفيا هلكني لحد ما نام تخيل كان عاوز ييجي ينام في وسطنا زي إمبارح شكله أخد على دلعك فيه
لم تجد منه سوى الصمت تطلعت إليه لتجده مازال على وضعه نطقت بنبرة متعجبة تسأله
إنت مش سامعني ولا إيه يا فؤاد!
لم يعر لحديثها إهتمام فأدركت أنه مازال غاضبا منها تنهدت ثم قبل أن تنطق بدلال مفرط
هو شرشبيلي الشرس زعلان من حبيبته ولا إيه
ظل متجاهلا حتى دلالها الذي يعشقه مما جعلها تدرك أن غضبه طائل نطقت بنبرة حنون
خلاص بقى يا فؤاد وحياتي عندك ما تعملها زعلة وتتقمص زي العادة
إتقمص!... نطقها مستنكرا لتبتسم وهي تحرك كفها فوق ذقنه بغنج ليزيح كفها عنه وهو يقول بحدة
لو كنتي فاكرة إني هعدي لك حصل بالساهل كده تبقى غبية ولسه معرفتيش فؤاد علام كويس يا مدام
واسترسل مفسرا بإبانة
أنا عديت الموضوع تحت علشان خاطر أبويا وأمي وشكلك قدامهم لكن وحياتك عندي ما هعديه يا إيثار
إعتدلت لتجلس بشكل صحيح بعدما رأت ثورة غضبه ثم تحدثت بجدية
ما أنا شرحت لك اللي حصل وفهمتك وجهة نظري يا فؤاد
إحتدت ملامحه وامتلئت بالقسوة قبل أن يصرخ عاليا
أنا جوزك قبل ما أكون صاحب الشركة يا هانم والمفروض إني أكون على علم بكل خطوة بتخطيها سواء في البيت أو في الشركة أو أي مكان بتروحيه
وتابع بتذكير لها
ومتنسيش إن ده كان إتفاقنا قبل ما تنزلي الشغل وده لأمانك مش تعنت مني لاسمح الله
أخذت تقلب عينيها بضجر قبل أن تنطق مفسرة
يا حبيبي أنا فاهمة كل الكلام ده ومقدرة خوفك عليا بس أنا بالطريقة دي عمري ما هتقدم في شغلي ولا هقدر أحترم نفسي طول ما أنا حاسة إني تابع ليك يا فؤاد
واسترسلت بإبانة
ده غير نظرة الموضفين ليا اللي دايما هتكون دونية
بحدة مفرطة هتف
ملعون أبو أي اعتبارات سيادتك بصالها قدام أمانك بالنسبة لي
أنهي كلماته و إندفع مغادرا الغرفة كثور هائج لا يري أمامه بينما زفرت هي وارتمت بظهرها للخلف مستسلمة.
في الصباح
فاقت من نومها ولم تجده بجوارها استمعت إلى صوت المياه يأتي من الحمام فعلمت أنه بالداخل أما بالأسفل ولچ الصغير إلى المطبخ وعينيه تجوب على ضالته حتى وجدها فابتسم وهو يسرع إليها قائلا
إنت ليه مش جيتي تصحيني وتلبسيني اليونيفورم زي كل يوم!
بابتسامة واسعة اجابته
علشان كنت بعجن لك البيتزا اللي بتحبها
صفق بكفيه ليقفز وهو يقول بسعادة
يسلام يا زوزة يا جميلة
ضحكت وهي تقوم بتشكيل العجينة وتقوم بوضع المكونات فوقها لتنطق بمشاكسة
وبعدين انا بعت لك البت اللي إنت قولت لي قبل كده إن شكلها حلو وعيونها ملونين كاترينا دي ولا ابصر اسمها ايه
تطلع عليها وبات يهز رأسه وكأنه يستوعب حديثها لتتابع بثرثرة كعادتها
أهي شكلها يفتح نفسك على الصبح بدل ما تصطبح بخلقة عزة اللي حفظتها بقالك ست سنين
ضحك الصغير ببلاهة لتزبهل السيدة سعاد وتقترب منها لتنبيهها
ست عزة الكلام اللي بتقوليه لمالك ده عيب وميصحش
وتابعت بتهديد مبطن
ولو فؤاد باشا عرف رد فعله مش هيبقى كويس
اشاحت بكفها الملطخ بالعجين قبل أن تقول
يختي أنا بهزر مع الواد وبفكه هو أنت هتفضلي واقفة لي كده على الكلمة
صاح الصغير بنبرة ملحة
خليني أحط انا الجبنة على وش البيتزا يا زوزة
نطقت برفض تام
مش هينفع علشان متبهدلش هدوم المدرسة روح يلا عند جدك الباشا وأقعد معاه لحد ما البيتزا تجهز وأخرجها لك
وتابعت بجدية
سيادة المستشار لو نزل من فوق ولقاك في المطبخ هيلسوعك
اتسعت عينيه وتذكر تحذير والده شديد اللهجة له بعدم دخوله غرفة تحضير الطعام وضع كفيه الصغيرين فوق فمه وهو يقول
بابي لو شافني هينفخني
نطق كلمته وهرول مسرعا للخارج لتنطق سعاد باستياء
الولد ألفاظه بقت بيئة بسببك يا عزة مين يصدق إن ده إبن سيادة المستشار فؤاد زين الدين وحفيد سعادة المستشار علام باشا زين الدين
نطقت وداد من بين ضحكاتها
طب والله دمه زي العسل مش أحسن من زين اللي ماشي في البيت زي الرجل الآلي
ضحكت العاملات لتوفقهن نظرة سعاد الحادة التي تحدثت بصرامة
كل واحدة تشوف شغلها وهي ساكتة ويلا خرجوا الأكل ورصوه على السفرة
ثم نظرت لساعة يدها وأكملت
فاضل خمس دقايق والباشا الصغير وحرمه ينزلوا
تحركن سريعا لتنفيذ أوامر تلك الصارمة
بعد قليل كان الجميع مجتمع على طاولة الطعام تحدث زين وهو ينهي كأس الحليب الخاص به
خلصي فطارك بسرعة يا تاج علشان الباص فاضل له خمس دقايق بالظبط ويوصل
وقفت إيثار تغلق صناديق الطعام الخاصة بصغارها وهي تقول
خلي بالك من اختك يا زين
حاضر يا مامي
نطقت الفتاة باعتراض
على أساس إني عيلة صغيرة وإبنك العاقل هياخد باله مني
بطلي لماضة... قالتها إيثار لتمط الفتاة شفتيها باعتراض فتابعت إيثار وهي تجذبها إليها بمداعبة
هاتي بوسة قبل ما تمشي
تدللت الفتاة وابتسمت لترتمي بأحضان والدتها التي عانقتها بشدة وقامت بوضع قبلة حنون فوق وجنتها الناعمة مالت الفتاة على وجنة أبيها بتضع قبلة وهي تقول
باي باي يا بابي
باي يا قلب بابي
قبلت أيضا وجنتي جديها وتحركا للخارج لم يتبقى سوى الصغير الذي صفق بحفاوة وهو يرى عزة قادمة بالشطيرة
بيتزا عزة وصلت وااااو
ضحك علام وتحدث
إحنا لازم نفتح لعزة محل بيتزا ونسميه بيتزا عزة
نطقت بابتسامة
إنشالله يخليك يا سيادة المستشار
بدأت بوضع الشطيرة داخل صحن الصغير لتنطق إيثار لزوجها في محاولة منها لارضائه
أحط لك بيتزا يا سيادة المستشار
متشكر... نطقها مقتضبا ووقف ليحمل حقيبته وهو يقول بجدية
بعد إذنكم
سألته عصمت باهتمام
مش هتشرب قهوتك يا حبيبي
هشربها في المكتب يا ماما... قالها وتحرك مغادرا قبل الموعد المحدد له ليتركها متأثرة بقلب حزين.
٭
ليلا
كانت تجلس بغرفتها تسترجع ألبوم ذكرياتهما سويا تقلب صفحات الألبوم والإبتسامة تشق ثغرها تارة وتارة أخرى تنساب الدموع مازال قلبها مولع يصرخ متألما بفضل فراقه منذ ذلك اليوم وهي تعيش صدمة لم يستوعبها عقلها إلى الآن توقفت أمام صورة لها وهي ترتدي ملابس سباحة مكونة من قطعتين ابتسامة ممتزجة بالدموع خرجت حين تذكرت ذكريات تلك الصورة وذاك اليوم
عادت بذاكرتها لما قبل عامين بعدما انتهت هي ويوسف من إختبارت الثانوية العامة قرر علام الذهاب للفيلا التابعة له بمنطقة الساحل الشمالي كي يحصل الجميع على كم من الاستجمام والراحة قبل ظهور النتيجة
إيه الزفت اللي إنت لبساه ده
خلع عنه قميصه ولف جسدها به ثم سحبها وتحرك باتجاه المنزل ليتابع بسخط
انا مش قولت ألف مرة مفيش مايوهات تتلبس
كان يتحدث وهو يجرها خلفه بسرعة لتصرخ باعتراض
حاسب يا يوسف هتوقعني
أما فريال فضحكت على ذاك الغيور وتابعت التقاط الصور للصغير
أدخلها المنزل ليدفعها للداخل وهو يصرخ بحدة
والله العظيم لو شفتك لابسة مايوة تاني إنت فاهمة ولا لا
نطقت باعتراض وهي تدب الارض بساقيها معترضة
يا يوسف الفيلا خاصة والشط خاص بينا ومقفول يعني محدش هيشوفني غيرك
وأنا مش عاوز أشوفك كده ولا حابب خالك ولا جدو ولا أي مخلوق يشوفك كده اللي إنت لبساه ده حرام ومش مقبول إفهمي
تنهدت لتقول بتفهم
حاضر يا چو مش هلبس كده تاني
أشاح بكفه للأعلى وهو يشيح بنظره عنها
إتفضلي على اوضتك غيري هدومك
حاضر بس ممكن تضحك... قالتها بدلال قابله بحدة قائلا بتحذير
بيسان
ربعت ساعديها لتنطق بدلال وأنوثة
طب إيه رأيك مش هطلع غير لما تضحك وكمان تقول لي يا بوسي
تنهد مستسلما لعشقها المجنون ليبتسم وهو يقول
إطلعي غيري
يا إيه... قالتها بدلال ليجيبها بانصياع
يا بوسي
طالعته بعينين عاشقة قبل أن تقول بنعومة وفراشات العشق تداعب أسفل معدتها
بحبك يا عمر بوسي وقلبها
يلا على فوق... قالها بابتسامة وهو يشير للأعلى بحنو لتنساق لأمره وتصعد الدرج تحت سعادة قلوبهم الهائمة.
فاقت من ذكرياتها لتتحسس بأناملها صورة لهما في نفس المصيف وهي تقف خلفه تستند بذراعيها على كتفيه والسعادة تنطق من أعينهم نزلت دموعها كشلالات وهي تقول بصوت واهن
وحشتني يا حبيبي إزاي هونت عليك يا چو إزاي هانت عليك بوسي وقدرت توجعها بالشكل ده.
٭
بعد مرور يومين عصرا
وقف بسيارته أمام منزله أو بالأدق منزل زوجته الذي اهداه لها والدها أبطل إدارة محركها وجلس متسمرا بمقعده جزءا منه يريد الترجل والدخول إلى عائلته وليسرع لزوجته مهرولا كي يحتضنها ويقدم إعتذاره عما بدر منه وحول ذاك اليوم الكارثي بالنسبة للجميع وليحتوي صغيرته ويتأسف لها عما حدث وجزءا أخر لا يريد ويأبى بل ويطالبه بالإنسحاب الفوري حفاظا على ما تبقى من هدر لكرامته أمام الجميع كانت تتحرك داخل الحديقة الخاصة بمنزلهم تحاول الخروج من تلك الحالة التي أصابتها منذ ذاك اليوم المشؤوم تطلعت بعينيها لخارج البوابة الحديدية فلمحت سيارة والدها راودها شعورا بخجل والدها فتوجهت صوب البوابة لتقوم بتشجيعه للدخول نعم هو كان سببا رئيسيا بكسر قلبها وإجبار حبيبها بالتخلي عنها أمام الجميع بتلك الطريقة المهينة لإنوثتها لكنه بالنهاية يظل أبيها التي تكن له الحب والإحترام برغم قساوته الجديدة عليه
رأها وهي تقبل فزادته رؤيتها خجلا فتح باب السيارة ووقف لتقبل عليه بابتسامة خافتة رسمتها كي تزين ملامحها الحزينة ولكن هيهات إنتفض قلبه حزنا على هيأتها فقد شحب وجهها كثيرا وفقد لون بشرتها حيويته ليبدوا جلدها بلون أصفر باهت إما عينيها فحدث ولا حرج باتت ذابلة واقتحمت الهالات السوداء حولها لتبدوا بهيئة مزرية وكأنها فتاة أخرى غير ابنته بالإضافة إلى فقدانها لبعض الوزن أين صغيرته الجميلة المنطلقة أين حيويتها وروحها المرحة لقد تدمرت بفضله بملامح وجه حزينة وعينين تنطق أسفا طالعها أخرجت صوتها بصعوبة وهي تقول بنبرة خافتة
حمدالله على السلامة يا بابي
بدون كلمة واحدة جذبها لأحضانه وبات يشدد عليها وهو يقول بصوت نادم
أنا أسف يا حبيبتي مكنتش أعرف إن كل ده هيحصل لك
ابتعدت قليلا لتنطق بهدوء كي تخفف من وطاة حزنه وخجله معا
حصل خير يا بابي
وتابعت وهي تجذب كفه لتحثه على الدخول
تعالي ندخل مامي وفؤاد قاعدين جوة محدش لسه إتغدى
تنفس بهدوء ليغلق باب السيارة وينطلق مجاورا لها ولچت للداخل محتضنة كفه ليتفاجأ بخروج فريال من المطبخ وهي تقول بصوت جاد
بسرعة جهزي السفرة يا نادية الولاد جاعوا....
تسمرت حين وجدته يجاور ابنتها يتطلع إليها بنظرات حزينة ممتزجة بشوق بادلته بأخرى عاتبة غاضبة لائمة تسمر كلاهما بمكانه كل ينتظر المبادرة من الآخر شعرت الفتاة بوضع والديها المحرج فقررت التدخل لانهاء ذاك الموقف تحدثت وهي تتحرك باتجاه والدتها ممسكة بكف ابيها الذي تحرك طواعا
إعملي حساب دكتور ماجد معانا في الغدى يا نادية
وقف مقابلا لها لينطق وهو يبسط ذراعه استعدادا لمصافحتها
إزيك يا فريال
الحمدلله...قالتها باقتطاب لتتابع بجدية
حمدالله على السلامة يا دكتور
الله يسلمك...نطقها بصوت خافت لتكمل هي بما املته عليها تربيتها السليمة كإبنة تربت على اتباع الأصول وذلك بعدما شعرت بحرجه
نورت بيتك على ما تغير هدومك هيكون الغدى جهز
عادت إلى المطبخ من جديد دون نطق حرف لتتحدث الفتاة
بصوت مرتفع
فؤاد يا فؤاد
خرج الفتى من غرفة المعيشة لتتابع بصوت أهدى
تعالى سلم على بابي
هرول الفتي ليحتضن والده وهو يقول بحفاوة أدخلت السرور على قلب ماجد
حمدالله على السلامة يا بابي وحشتني
إنت كمان وحشتني يا حبيبي... قالها بابتسامة واسعة.
تناول الجميع الغداء في أجواء هادئة وانتهى اليوم لتستقل فريال غرفة غير غرفتها المشتركة به بعدما قررت إعتزاله وتجنب وجوده كنوعا من الإعتراض على ما فعل بابنتها وما قام به من افتعاله لمشكلة هزت الوسط بأكمله.
٭
داخل الاراضي الفرنسية
كان يتحدث عبر الهاتف الجوال ليصيح بسعادة مفرطة
يعني كده خلاص يا متر حضرتك سويت المشكلة مقابل المبلغ اللي هدفعه
استرسل بعينين زائغتين من شدة سعادتهما
وبكدة هقدر أدخل البلد بشكل شرعي
على الطرف الاخر أجابه المحامي ذات الإسم اللامع الذي اختاره لتسوية الأمر مع السلطات المصرية تحدث بابتسامة وكبرياء
الامر بسيط زي ما بلغتك قبل كده يا عمرو بيه إحنا سوينا الأمر وهتدفع مبلغ مقابل تسوية الامر وبكدة هتسقط قضية الأثار فورا وبعدين الموضوع بسيط ده مجرد إتهام في قضية تهريب اثار ودي تعتبر قضية بسيطة جدا
أغلق مع المحامي ونظر أمامه وهو يبتسم بانتشاء وفخر وكأنه حقق أعظم انتصاراته للتو .
٭
أمام بوابة جامعتها
يقف على الرصيف الموازي ينتظر بلهفة والشوق يقتل جميعه متشوقا لنظرة واحدة ترضي حنينه الصارخ إليها كم من الليالي مرت تمنى أن يزوره طيفها بالأحلام ولو لمرة واحدة وكأن عالم أحلامه تأمر عليه كغيره انتفض قلبه بلوعة حين رأها تخرج من بوابة الجامعة الرئيسية تنتظر الموظف المسؤل عن جراچ خاص بجوار الجامعة تصف سيارتها به يوميا بعيدا عن الزحام كانت قد سبق وابلغته من خلال الهاتف ليحضر لها السيارة أمام البوابة حيث تقف كالعادة اقتحم المدعو نبيل خصوصيتها لينطق بغرور كعادته
هي عربيتك مش معاك ولا إيه
لم تعير لحديثه اهتمام بل تجاهلته تماما فتابع بإصرار وكأنه تعود على الإهانة على يدها برغم مئات الفتيات اللواتي يرتمين عليه بما له من قبول حسن بالمظهر والملبس وأيضا نفوذ والده المالية مما جعل الفتيات تتهافتن عليه ويحاولن جذب انتباهه بشتى الطرق إلا أنه أصر على إمتلاك تلك الفرسة الجامحة واختطافها من خيالها العاشق ومازال يواصل رغم عدم تقبل بيسان له
تعالي أوصلك
إلتفتت لتواجهه تحت غليان قلب ذاك المغروم الذي يشاهد من الجهة المقابلة
قولت لك قبل كده إن طريقنا مش واحد
مين قال لك إنه مش واحد...وتابع بثقة تعجبت منها
إنت ليا يا بوسي وبكرة تقولي لي كان عندك حق يا نبيل
واسترسل بعينين تجوب ملامحها بإعجاب
بصي لنا كويس يا بوسي إحنا كابلز يجنن بنكمل بعض كل واحد فينا مينفعش يكون غير مع التاني
تملللت من كلماته السخيفة وباتت تتطلع من حولها ثم كات أن ترد لتتفاجأ بسيارة الأخر من بعيد تصطف على الرصيف المقابل على الجانب الأخر اشتعلت النيران بقلبه لتطال كل خليه بجسده حيث باتت عروقه تبرز وتنتفض من شدة غليان غيرته على من تملكت من الوجدان بدون إدراك قبض بقوة على عجلة القيادة وشدد بقبضته حتى برزت عروق كفه وابيضت كاد أن يخرج من سيارته ويقتحم وقوفهما ليجذبها ويخبأها خلف ظهره لتلاشي نظرات ذاك الوقح الجريئة لكنه توقف باللحظة الأخيرة فبأي حق سيذهب إليها وبأي صفة ستنساق لأوامره هو الأن قد فقد شرعيته بالكامل فحديثه بذاك اليوم المؤلم يعد بمثابة تنازل رسمي عن حقه بها اشتعل داخلها لتهرول إليه بنار مستعرة تاركة خلفها ذاك الذي تعجب تحولها وهي تهرول بتلك الشراسة من يرى هيأتها وتوسع عينيها يجزم بأنها مقبلة على حرب ضارية لا محال انتفض قلب يوسف حين وجدها تسلك الطريق بحدة وعنف قاصدة سيارته ارتبك واهتز
إنت واقف هنا بتعمل إيه!
بالطبع لم تجد إجابة ومازاد من جنونها هو تطلعه للأمام وتركيزه بنقطة اللاشيء بمبالاة فصرخت بحدة وهي تعيد عليه السؤال
رد عليا إنت واقف هنا بتعمل إيه ومتحاولش تكذب لأني كشفاك
إلتفت يطالعها بجمود مصطنع ثم خرج صوته متزنا
جاي اشوفك واطمن عليك
ليه!... باغتته بذاك السؤال وتابعت بحدة أكبر تكاد تصل للعداء
تطمن عليا بتاع إيه!
صمت لتصيح من جديد
رد عليا يا يوسف
ممكن تهدي... قالها كي يستقطب هدوئها لكنها باغتته بحدة أكبر
ميخصكش أهدى أولع ميخصكش إنت تجاوب على سؤالي وبس
أغمض عينيه ورمى رأسه مستندا بها على خلفية المقعد باستسلام زادها مظهره جنونا فصاحت وهي تجذب وجهه تجبره على النظر إليها اقشعر جلده حين لامست أناملها الرقيقة ذقنه النابتة وما شعر بحاله سوى وهو يشدد على تلك الأنامل كي يجبرها على الإطالة بلمسته زاد جنون غضبها من تصرفه ونظراته المتلهفة التي كشفت عن مكنون صدره وما يحمله من عشق دفين لها جذبت كفها بحدة وتحدثت بعصبية مفرطة
قولت لك جاوب على سؤالي إنت بتعمل إيه هنا
اتسعت مقلتيه بذهول من تصرفها العنيف فتلك هي المرة الأولى التي تقاوم فيها لمسته ونظرات عيناه يبدو أنه توغل في أذاها للحد الذي جعل كرامتها تتحدى مشاعرها وتتفوق عليها
لام حاله على ذاك التصرف الأهوج فقد اتخذ قرار الإبتعاد أو بالاصح النفي فهو سيفنى بابتعاده عن محبوبته وخليلة الكيان تحمحم كي ينظف حنجرته ليستطيع التحدث بشكل يظهر عدم مبالاته
إعتبريها غلطة ومش هتتكرر تاني يا بوسي
دفعته بصدره بقوة لتهتف بألم ينخر بقلبها
متقوليش يا بوسي ولا حتى تنطق إسمي كله على لسانك أنا بكرهك يا يوسف بكرهك ومش عاوزة أشوفك قدامي تاني
شعر بصفعة قوية نزلت على جدران قلبه زلزلته وبرغم أنه استمع إلى تلك الكلمة منها أثناء تواجده بالمشفى إلا أنه إعتبرها هزيان من شدة الصدمة لكن تلك المرة كانت التأكيد لا يدري ما حدث له فقد تملك التحدي منه وأراد تعرية مشاعرها أمامها فتحدث ناظرا بعينيها بقوة
عمرك ما هتقدري تكرهيني عارفة ليه
طالعته بحقد ليتابع بنعومة مشيرا على صدرها
لأني محفور هنا جوة قلبك اللي بينا مش مجرد قصة حب عابرة يا بيسان اللي بينا سنين ومواقف وعمر بحاله ومهما تحاولي تمحيه مش هيطلع غير بالموت
بجبروت وعنفوان جديدا عليها أجابته
يبقى الموت أهون عندي من إن حب واحد زيك يفضل ساكني
واحد زيي!... قالها بذهول ليتابع متسائلا بحدة
إنت شيفاني إزاي يا بيسان!
شيفاك واحد خاين للعهد... نطقتها بحدة لتسترسل بنبرة ساخطة
وعدتني بالحب وعشمتني بالجنة معاك
واسترسلت بملامح متأثرة وغشاوة دموع تلألأت داخل مقلتيها
خلتني طيرت في سماك وبنيت معاك كل أحلامي ربطت كل حاجة تخصني ووقفتها على وجودك
رفعت كتفيها لتتابع مسترسلة باستسلام
وفي النهاية سبتني ومشيت خلتني متعلقةر لا أنا اللي طايلة سما أطير فيها وأعيش أحلامي اللي رسمتها ولا أنا اللي واقفة على أرض ثابتة أقدر من خلالها أكمل حياتي مع حد تاني
توسع بؤبؤ عينيه حين اشارت بحديثها على أحدهم أيمكن ان يمتلكها غيره من الرجال!
شعرت بصراع حاد ظهر بين بمقلتيه ومن غيرها يشعر به ويلمس روحه تحاملت على حالها لتسأله تعلم أنها جارت على كرامتها بما يكفي لكنها ستعطيه تلك الفرصة عله يرأف بحالها ويتراجع عن صرامته وعنده
لأخر مرة هسألك يا يوسف لو لسه بتحبني خلينا ناخد فرصة تانية ونحاول
وتابعت مسترسلة بتحذير
وقبل ما تجاوب لازم تعرف إن دي الفرصة الأخيرة اللي هديها لك
إمتلئت عينيه بحيرة امتزجت بألم وباتت عينية تجوب ملامحها بنظرات زائغة صراع عنيف هاجمه بضراوة انقسم كل شيء به ما بين الرفض والقبول قلبه حالما يزجه على أن يظفر بتلك الفرصة ويغتنمها لصالح قلبيهما ولينسى الماضي ويضعه جانبا متلاشيا جل شيء مقابل التنعم داخل أحضان الحبيب والفوز بالمستقبل بينما العقل والكرامة اتحدا ليكونا فريقا شرسا ليهاجما القلب بعنف قائلين
أصمت أيها الخاضع الخنوع يالك من قلب فاقدا للكرامة أين نخوتك وعزة نفسك أيها البائس ألأجل حب إمرأة لا تختلف عن مثيلتها من بنات حواء تخضع وتخنع لأبيها وتدع حالك تحت قدميه ليدهس على كرامتك ذهابا وإيابا
رد القلب بهيام يكاد يقتله
لكنها ليست كباقي النساء هي حبيبتي خليلتي وشريكة أحلامي هي من بقيت صامدا لسنوات لأجلها هي من حلمت أن أسكن مدينتها هي فقط دون غيرها.
لا داعي للمبالغة ف فالنهاية كلهن سواسية كلهن نساء... كانت تلك كلمات العقل قبل أن يخرجه من تلك الحرب صوتها الناعم وهي تترجاه بعينيها
قولت إيه يا يوسف
بعد صراع عنيف هز رأسه وهو يقول
مش هقدر
ليتابع بذل وألم
أرجوك قدري موقفي
ابتسمت ساخرة لتنطق بنبرة ضعيفة سيطرة عليها الهزيمة
كنت متأكدة إن ده هيبقى ردك كنت واثقة إنك هتبيعني وتدوس على حبي دايما بتختار المقابل ليا قصاد التخلي عني
هز رأسه ناكرا تفكيرها لتتابع مسترسلة بعينين يملئهما التحدي وكأنها تحولت لأخرى شرسة
بس وحياة حبك اللي لحد اللحظة دي مش قادرة أخرجه من جوايا لانساك يا يوسف ولو روحي متعلقة فيك هخرجها بإيدي ولا إني أعيش مذلولة تحت رحمة حبك.
وتابعت بحدة وصلت للإهانة
إوعي تخليني أشوف وشك مرة تانية ولو عندك كرامة بجد متجيش بيت جدو علام بعد النهارده خلي عندك ضمير وابعد علشان أقدر أتنفس في بعدك وأعيش.
اكتفت بهدر تلك السهام بقلبه وبدون مقدمات خرجت لتنطلق بطريقها نحو سيارتها برأس شامخ وصلابة محاربة عزمت الامر على اقتحام ساحة المعركة.
تاركة خلفها قلبا تحطم وفؤادا من العشق تمزق
ليقابها على الجهة الأخرى نبيل بابتسامة منتصر وكأنه كان ينتظر رجوعها إليه.
دمعة حارة إنزلقت من عينيه وهو يراقب ابتعادها وكأن روحه سلبت منه برحيلها خرجت كلمة بصوت ضعيف وقلب صارخ يأبى القادم
متمشيش
شهقة حادة خرجت لتتابعها دموعا انهمرت كشلالات من عينيه دموعا احتجزت طويلا والأن لم يعد بمقدورها الإنتظار أكثر
متسبنيش لوحدي هموت في بعدك يا بيسان
مال برأسه جانبا لينطق وكأنه يحتضر
إرجعي.
وكأنها استمعت لمناداتها لتستدير تنظر باتجاهه ولكن بنظرات حادة ممتلئة بالقوة والتحدي وكأنها تتوعد قلبه وتطالبه بانتظار ما هو قادم للإنتقام ألقت عليه نظرة ساخطة لتستدير وتتابع طريقها من جديد وهي تتحرك بخطوات واثقة نحو الأمام نحو ذاك المبتسم بشماتة ظهرت بعينيه وهو يتطلع على ذاك الزجاج المفيم متأكدا أن من خلفه يناظره بحقد دفين.
إنتهى البارت
أذناب الماضي
بقلمي
روز أمينبسم الله لا قوة إلا بالله
لا إله إلا أنت سبحانك إني كنت من الظالمين
الجزء الأول من الفصل السابع
أذناب الماضي
_أنا لها شمس الجزء الثاني بقلمي روز آمين
هذه الروايه مسجلة حصريا بإسمي روز آمين
وممنوع نقلها لأية مدونة أو موقع أو صفحات أخري ومن يفعل ذلك قد يعرض حالة للمسائلة القانونية
كل منا يتخذ نهجا لحياته ويتعامل معها وكأنها لوحة بيضاء خاوية من أية معالم يرسم بريشته أحلامه الوردية وكأن العالم أجمع سخر لتحقيق أماله يأخذ خطواته للأمام نحو ذاك المستقبل المنتظر بكامل ثقته حتى تباغته الحياة بسيل من الأحداث المغايرة لما خطط له وبلحظة تنهار أحلامه حلما تلو الآخر حتى تختفي وكأنها تحولت إلى سراب لم يكن له أثرا ذات يوم يداهمه اليأس بضراوة ويكاد أن يفتك به إلى أن يقضي الله أمرا كان مفعولا.
بقلمي روز أمين
____________
كان يجلس داخل المكتبة الخاصة بجامعة القاهرة مندمجا لأبعد حد وهو يتصفح إحدى المراجع الخاصة بمجاله بعدما قرر الإنخراط في الدراسة والعمل كي لا يعطي لعقله المجال بالتفكير فيما حدث بينه وبين تلك الحبيبة قرر أيضا تجنب التفكير وإرهاق عقله بحل تلك المعضلة وتركها لله ولعامل الوقت وهو كفيل بحل جميع المشاكل معتمدا على عشق تلك المغرمة الجارف له وبأن قلبها سينصاع بالنهاية لمشاعره وينتظر حتى قدوم الحبيب وإنتصار الحب هكذا كان ظنه بها لكنه نسي أن بعض الظن إثم عظيم.
وأثناء إندماجه بالقراءة شعر بظل أحدهم يجلس بالمقعد المقابل له لم يشغل باله ولم يهتم فاضطرت تلك الشابة لآخراج صوت حمحمة كي ينتبه لوجودها بالفعل رفع رأسه بهدوء لتتقابل عينيه مع خاصتي تلك الجميلة ساندي صديقته بنفس الفرقة فبرغم علمها بقصة غرامه مع بيسان إلا أنها عشقته بكل جوارحها وبرغم عدم تجاوبه مع محاولاتها للتقرب منه إلا أنها لم تتوانى بلفت أنظاره طيلة الوقت تبسمت وهي تقول برقة
ممكن أخد من وقتك شوية صغيرين
تطلع إليها متعجبا لطافتها الزائدة لتتابع هي برقة
عاوزة
أومأ بهدوء قائلا
لو خاصة بالدراسة أكيد مش هتأخر عليك.
مطت شفتيها وتحدثت بدلال استدعى لاستغرابه
يعني لو حابة أتكلم معاك في أي موضوع تاني هتكسفني يا يوسف
حدثها بنبرة جادة متلاشيا طريقتها التوددية
إتفضلي وأنا سامعك يا باشمهندسة
تنهدت بيأس بعد فشل المحاولة اللاعدد لها من التقرب منه وبدأت تطرح عليه بعض الأسئلة التي طرأت بمخيلتها
