رواية المليونيرة المغرورة والفقير سيلا ورياض جميع الفصول كاملة بقلم إسراء ابراهيم
المليونيرة المغرورة والفقير
ده مستحيل يا مامي! إنتي بتقولي إيه! أنا سيلا التهامي! عايزاني أتجوز الجربوع ده!
أحلام بسخرية
متشوفيش نفسك أوي كده كلنا عند ربنا سواسية وبعدين الراجل بأخلاقه وأدبه ده حتى ما بصلكيش! أنا اللي قلت له عليكي وطلبت منه كده فبلاش تتكبري عليه لأنك أصلا ما كنتيش على باله
سيلا بغضب
مااااامي! ليه كده! أنا عملتلك إيه عشان ترميني الرمية دي!
أحلام بهدوء
ماعملتيش حاجة بس أنا خايفة عليكي وده لمصلحتك يا بنتي
سيلا بضيق
لا يا مامي لو كنت فعلا أمي ماكنتيش رميتيني الرمية دي لو بابي كان عايش عمره ما كان وافق على اللي بتعمليه معايا ده!
أحلام بتنهيدة
الله يرحمه هو دلعك زيادة وده اللي وصلك لكده أبوكي عمره ما كان بابي أبوكي شقي وتعب سنين علشان يوصلك للمستوى ده
ولو هو دلعك فده ما يمنعش إني أنا أربيكي من أول وجديد وأجوزك للي يخاف عليكي ويحافظ على مالك قبل قلبك
سيلا بتحدي
مامي حتى لو انطبقت السما على الأرض عمري ما هتجوزه أنا سيلا! في الآخر تبقى نهايتي مع واحد زي ده مستحيل!
أحلام بحسم
مش بمزاجك يا بنتي أنا حددت معاه معاد الفرح الخميس الجاي
وبعدين متنسيش إن اسمك سامية مش ساسو ولا سيلا
سيلا بانفعال
مااااامي! إنتي عارفة إني بكره الاسم ده بلاش تقوليلي عليه تاني! وبعدين إنتي قولتي إيه فرح إيه اللي الخميس الجاي!
قسما بالله أسيبلك الدنيا كلها وأمشي!
أحلام ببرود
امشي براحتك بس متنسيش تسيبي فلوسك والكريدت كارد عشان هقفلهم لحد يوم الفرح
وبقى شوفي مين من صحابك الجعانين اللي ممكن يستضيفك
سيلا بغرور
هسيبهم يا مامي وهتشوفي صحابي هيعملوا
تخرج سيلا من باب الفيلا غاضبة
أحلام تجلس على الكرسي وتقول لنفسها
ربنا يهديكي يا بنتي
هايدي بحنان عبر الهاتف
طبعا يا روحي تنوري في أي وقت
سيلا بابتسامة
سوري يا هايدي بس مامي أخدت مني كل حاجة فلوسي الكريدت كارد حتى هدومي! فهتقل عليكي شوية
هايدي بصدمة
إيه! إنتي عبيطة يا بنتي ولا إيه في بينا الكلام ده!
بس هستأذنك عندي دكتور النهاردة ممكن تعدي عليا بكرة لأني هتأخر
سيلا باستغراب
تمام بس ممكن أستناكي في شقتكم لحد ما تروحي وتيجي مفيش مكان أروحه
هايدي بتوتر
ممم ممكن تستنيني عند هند أول ما أخلص الدكتور هعدي آخدك مش حابة تفضلي لوحدك
سيلا بفرحة
خلاص هستناكي متتأخريش عليا باي!
رياض وهو بيكلم احلام
تفتكري اللي بتعمليه ده صح
أحلام بتفكير
أكيد محدش هيخاف عليها قدك ولا يحبها زيك
رياض بقلق
أنا خايف بدل ما تحبني تكرهني
أحلام بثقة
اتعامل بقلبك يا رياض وهتحبك أنا متأكدة
بس أوعى حبك ليها ينسيك العادات والتقاليد اللي اتربيت عليها خليك زي ما أنت
رياض بثقة أكبر
أنا لو قلبي هيخليني مش راجل مش عايزه هدوس عليه برجلي!
أحلام بحب
ربنا يبارك فيك يا ابني بس بردو خليك معاها وحدة وحدة هي مش متعودة على كده
رياض بهدوء
متقلقيش عليها أوعدك هعمل كل اللي أقدر عليه عشان أخليها سعيدة وتحبني
أحلام بفرحة
إن شاء الله يا حبيبي ربنا يسعدكم ويهديها
هند بابتسامة باهتة
منورة يا سيلا
سيلا بابتسامة مجاملة
شكرا أنا بقالي شوية برن على هيدي بس فونها مقفول
هند بضيق
عادي يا حبيبتي شكلك زهقتي
سيلا باستغراب
لا بس دي سابع مرة
هند بلا مبالاة
عادي يا روحي بسلم عليكي إنتي قاعدة بقالك ست ساعات بس!
سيلا وهي بتقوم تقف
طيب أنا همشي أنا كنت فاكرة إنك لسه صاحبتي وهترحبي بيا زي زمان ومش كل ده عشان قاعدة شوية لحد ما هيدي ترجع من عند الدكتور بس للأسف إنتي مش طايقاني في الكام ساعة اللي قضيتهم معاكي
هند ببرود
وهو إنتي فاكرة إن هيدي عند الدكتور فعلا! دي كانت بتسربك يا روحي عندها خروجة نار النهارده بصي كانت عاملة لايف من شوية اتفرجي اتفرجي
نظرت سيلا لهند بذهول وقالت بصوت مصدوم
أنا كنت فاكرة إنكم صحابي اللي هيقفوا جنبي وقت الأزمة ليه تعملوا فيا كده! أنا عملتلكم إيه!
هند بجرأة
معملتيش ومعكيش تعملي! إحنا كنا مستحملينك عشان خروجة أكلة سهرة مش عشانك بس دلوقتي! إنتي حتى معكيش تمن التاكس اللي هتروحي بيه دلوقتي
نظرت سيلا لهند بغضب ووجع وسابت المكان ودموعها على خدها خرجت وهي بتفكر في آخر واحدة من اللي كانت فاكرة إنهم أصحابها مروة
استقبلتها مروة ببرود
حبيبتي اتفضلي يا روحي وحشاني
سيلا انهارت قدامها وحكت لها كل اللي حصل
مروة بلا مبالاة
يانهار أبيض عملوا فيكي كل ده! ما هو العيب على مامتك برضو يا سيلا إزاي تسيبك من غير فلوس كده
سيلا بيأس
عشان تجبرني أوافق على ابن صاحب بابا الله يرحمه أصلا أنا مكنتش أعرف إن بابا كان مصاحب ناس زي دول لا شكلنا ولا طريقتنا ولا أي حاجة شبه بعض
مروة ببرود
طيب ما تجربي! يمكن يطلع كويس وبعدين لما تتجوزي هتاخدي فلوسك وأملاكك وساعتها اطلقي منه ومحدش هيقولك بتعملي إيه وهيبقى ليكي حق التصرف في كل حاجة
نظرت لها سيلا بصدمه وقالت
إنتي
مروة ببرود
ما هو لو مش وافقتي مامتك مش هتديكي فلوسك كانت بتخوفك وخلاص
سيلا بيأس
لا كلامها بيقول إنها ناوية تحرمني من كل حقوقي فعلا
مروة بثقة
يبقى زي ما قلتلك لازم تتجوزيه
سيلا بتفكير وصوت مكسور
ده واحد أنا مش طايقة أبص في وشه تقوليلي اتجوزيه!
مروة باندفاع
بصي يا حبيبتي أنا مش هضحك عليكي بقولك الصح متزعليش مني بس أنا لازم أسافر بكرة على الجونة ومعنديش وقت أأجل فلازم أقفل الشقة فبقولك اللي شايفاه في مصلحتك
سيلا بتفهم
آه تمام حقك طبعا أنا آسفة إني ازعجتك
مروة ببرود
لا يا روحي متقوليش كده إحنا إخوات
قامت سيلا من مكانها وهي بتقول
أنا لازم أمشي عشان مامي متقلقش عليا
مروة بكدب
طيب خليكي بايتة عندي والصبح امشي
سيلا بحزن
لا أنا لازم أمشي
مروة ببرود
طيب يا روحي خلي بالك من نفسك
في الجنينة كانت أحلام واقفة قلبها مشغول على سيلا بتدعي ربنا ترجع لها سالمة دموعها في عنيها مش عارفة قرارها كان صح ولا غلط وفجأة دخلت عليها سيلا وهي بتعيط
أول ما شافتها أحلام حمدت ربنا وجريت عليها حضنتها
سيلا وهي بتبكي
كان عندك حق يا مامي
أحلام وهي بتطبطب عليها
خلاص يا حبيبتي دي تجربة وانتي شفتي بنفسك طول ما انتي من غير فلوس محدش هيقف جنبك
سيلا بدموع
أيوه يا مامي فهمت والله الدرس
أحلام بهمهمة
مشكلتك يا بنتي إنك بتتخمي في الناس بسرعة آه لسانك طويل بس من جوه طيبة وغلبانة مبتفهميش في الناس عشان كده مفيش غير رياض هو اللي هيحافظ عليكي من بعدي
سيلا وهي خارجة من حضنها
مامي انتي بردو مصممة
أحلام بهدوء
مش هتفهمي اللي أقصده غير لما تدخلي التجربة دي وأنا أوعدك هكون في ضهرك ومش هسمح له يظلمك في حاجة
